អន្តរជាតិ
ឆ្មាមួយក្បាលរួចផុតពីមរណៈ ដោយសារវេជ្ជបណ្ឌិតម្នាក់ប្រឹងប្រែងម៉ាស្សាបេះដូងឲ្យវា
×![]()
ដោយ: ធីតា
ជួបគ្រោះថ្នាក់នៅនឹងទ្វារក្នុងគ្លីនីកមួយក្នុងទីក្រុងអ៊ីស្តង់ប៊ុល ប្រទេសតួកគី សត្វឆ្មាមួយក្បាលស្ទើរតែរងគ្រោះថ្នាក់បាត់បង់ជីវិត។ ចៃដន្យល្អ វាត្រូវបានគ្រូពេទ្យផ្នែកសង្គ្រោះបន្ទាន់ម្នាក់ ស្រោចស្រង់ជីវិត តាមរយៈការធ្វើម៉ាស្សាបេះដូង ហើយក៏រស់រានមានជីវិតដូចធម្មតា។
ទស្សនាវីដេអូដូចខាងក្រោម៖
ជារឿងដ៏អស្ចារ្យបំផុតសម្រាប់សត្វឆ្មាមួយក្បាលដែលទទួលបាននូវការយកចិត្តទុកដាក់ខ្លាំងបំផុតពីមនុស្ស។ កាលពីថ្ងៃទី២៧ ខែតុលា បុរសម្នាក់បានបានដើរចេញពីគ្លីនិកមួយដោយបានច្រានទ្វារទៅគាបនឹងសត្វឆ្មាមួយក្បាល។ កាម៉េរ៉ាសុវត្ថិភាពបង្ហាញឲ្យឃើញថា សត្វឆ្មាបានរងគ្រោះថ្នាក់យ៉ាងធ្ងន់ធ្ងរដោយស្ថិតនៅចន្លោះទ្វារ និងជញ្ជាំង។
យោងតាមការផ្សាយរបស់ភ្នាក់ងារព័ត៌មានតួកគី IHA ប៉ុន្មាននាទីក្រោយ មនុស្សដែលនៅក្បែរនោះ បាននាំគ្នាជួយសង្គ្រោះសត្វឆ្មា ដោយក្នុងនោះមានលោកវេជ្ជបណ្ឌិត Halil Akyurek ជំនាញផ្នែកសង្គ្រោះបឋមប្រចាំគ្លីនិក Ozel Akgun Tem ផ្ទាល់។
លោក Halil Akyurek បានរៀបរាប់ថា ករបស់ឆ្មា រងការគាបយ៉ាងខ្លាំង ដែលធ្វើឲ្យវាពិបាកដកដង្ហើម ហេតុដូច្នេះហើយបានជាលោកចាប់ផ្តើមម៉ាស្សាបេះដូងឲ្យវា។ បន្ទាប់ពីទទួលបានការសង្គ្រោះបន្ទាន់ សត្វឆ្មាដឹងខ្លួនឡើងវិញ ហើយលោក Akyurek បានយកវាចូលក្នុងគ្លីនិកដើម្បីដាក់អុកស៊ីសែន។
លោក Akyurek បានសុំជំនួយពីមិត្តភក្តិរបស់លោកម្នាក់ដែលជាពេទ្យសត្វ ដោយស្នើឲ្យមានការព្យាបាល និងប្រើប្រាស់ថ្នាំតាមស្តង់ដា។ សត្វឆ្មាជាឡើងវិញដូចធម្មតា ហើយលោក Akyurek ផ្ទាល់បានសម្រេចយកវាទៅចិញ្ចឹមបីបាច់ ដោយដាក់ឈ្មោះថា «Mucize» (ភាសាតួកគី និងមានន័យជាភាសាខ្មែរថា អព្ភូតហេតុ)។
លោក Akyurek បានអះអាងថា៖ «ខ្ញុំត្រូវផ្តល់សេចក្តីគ្រប់បែបយ៉ាងដល់ឆ្មានោះ ហើយចាំឆ្លើយតបជានិច្ចនៅរាល់តម្រូវការរបស់វា»៕
Tag:
ប្លែកៗ
ឆ្មា
© រក្សាសិទ្ធិដោយ thmeythmey.com
