អន្តរជាតិ
នយោបាយអន្តរជាតិ
រូបភាព៖ គណនីហ្វេសប៊ុកលោកស្រី Yingluck Shinawatra
×![]()
ដោយ: ថ្មីៗ
អតីតនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត្រា បានបើលក់អង្ករទៅឲ្យប្រជាជនថៃនៅទីក្រុងបាងកក ក្រោយពេលលោកស្រីប្រមូលទិញអង្កទាំងនោះពីប្រជាកសិករថៃនៅតាមទីជនបទនោះ។ ការប្រមូលទិញស្រូវអង្ករនេះជាសកម្មភាពជួយគាំទ្រកសិករថៃដែលកំពុងប្រឈមមុខបញ្ហាធ្លាក់ថ្លៃនៃតម្លៃស្រូវអង្ករនោះ។
ក្រោយប្រមូលទិញស្រូវអង្ករពីកសិករនៅតាមខេត្តភាគឥសាន្តហើយនោះ អតីតនាយករដ្ឋមន្ត្រីថៃលោកស្រី យីងឡាក់ ស៊ីណាវ៉ាត្រា បានបានបើកកន្លងលក់អង្ករនៅកន្លែងចតឡានមួយកន្លែងនាក្រុងបាងកក ទៅឲ្យប្រជាជនថៃ កាលពីថ្ងៃសៅរ៍ទី ៥ វិច្ឆិកា។លោកស្រី ធ្វើបែបនេះ ដើម្បីជួយរកទីផ្សារសម្រាប់ប្រជាកសិករថៃ ដែលជួយប្រទះបញ្ហាតម្លៃអង្ករធ្លាក់ថ្លៃខ្លាំងមិនធ្លាប់មានក្នុងរយៈពេលមួយទសវត្សរ៍នេះ ។
បើតាមទីភ្នាក់ងាព័ត៌មាន AFP លោកស្រី យីងឡាក់ បានចេញលក់អង្ករដោយផ្ទាល់ ដោយលក់ក្នុងមួយគីឡូតម្លៃ ២០បាត។ គេឃើញអ្នកគាំទ្រលោកស្រីជាច្រើនរយនាក់បានតម្រង់ជួរបន្តកន្ទុយគ្នាចាំទិញអង្ករពីលោកស្រី ហើយពួកគេសប្បាយចិត្តនឹងជួយ ព្រោះលោកស្រីតែងតែជួយពួកគេកន្លងមក។
ក្នុងចំណោមអ្នកតម្រង់ជួរចាំទិញ មានលោក Umaporn Kaewthongkha វ័យ ៦០ឆ្នាំដែលជាអ្នកបើកតាក់ស៊ីដែរ។ លោកបានអះអាងថា៖«ខ្ញុំមកទិញអង្ករពីលោកស្រី យីងឡាក់។ ខ្ញុំធ្វើបែបនេះដើម្បី ជួយលោកស្រី ព្រោះកន្លងមកលោកស្រីបានជួយខ្ញុំ។ លោកស្រី យីងឡាក់ជាមនុស្សល្អ ស្អាត ហើយជួយអ្នកក្រីក្រ តាមដែលលោកស្រីអាចធ្វើបាន»។
តាមពិតទៅ លោកស្រី យីងឡាក់ បានធ្វើដំណើរទៅកាន់ខេត្តនៅភាគឥសាន្ត ដើម្បីជួយទិញអង្ករពីកសិកររងគ្រោះដោយសារតម្លៃអង្ករធ្លាក់ថ្លៃ ហើយលោកស្រីរៀបចំគម្រោងរួចជាស្រេចដើម្បីយកទៅលក់បន្តនៅក្រុងបាងកក។ លោកស្រី ក៏មានគម្រោងជួយផ្តល់ទីតាំងនិងហិរញ្ញវត្ថុខ្លះសម្រាប់ប្រជាជនក្នុងការនាំអង្ករមកលក់ផ្ទាល់នៅក្នុងទីក្រុងបាងកកផងដែរ។
តាំងពីដើមមក ប្រជាកសិករនិងប្រជាជនក្រីក្រជាកម្លាំងស្នូលដែលគាំទ្រលោកស្រី និងបងប្រុសលោកស្រី កន្លងមកក្នុងពេលធ្វើនយោបាយ។ ពួកគេស្រឡាញ់ពេញចិត្តគ្រួសារត្រកូលស៊ីណាវ៉ាត្រា ដោយអះអាងថា អ្នកនយោបាយត្រកូលស៊ីណាវ៉ាត្រា បានប្រឹងប្រែងជួយពួកគេកន្លងមក។ ប៉ុន្តែខាងអភិជនដែលកាន់កាប់នយោបាយក្រុងបាងកក និងក្រុមយោធា វិញនោះយល់ឃើញដាច់ស្រឡះ ហើយពួកគេបន្តចាត់ទុកលោកស្រី យីងឡាក់ និងលោក ថាក់ស៊ីន ជាអ្នកនយោបាយពុករលួយ ដែលប្រើប្រាស់គោលនយោបាយប្រជាជននិយមដើម្បីរក្សាឥទ្ធិពលរបស់ខ្លួនលើប្រជាជនក្រីក្រ។ ហើយពួកគេបន្តធ្វើសព្វគ្រប់បែបយ៉ាងដើម្បីទប់ស្កាត់ ត្រកូលស៊ីណាវ៉ាត្រា ត្រឡប់ចូលនយោបាយវិញ។
ក្រោយធ្លាក់ពីតំណែងក្នុងឆ្នាំ ២០១៤ លោកស្រីយីងឡាក់ ត្រូវប្រឈមមុខការកាត់ទោសឲ្យជាប់ពន្ធនាគារ ១០ឆ្នាំ និងត្រូវរងការពិន័យ ១ពាន់លានដុល្លារ ដោយសារគោលនយោបាយស្រូវអង្ករនៃរដ្ឋាភិបាលលោកស្រីមានជាប់ពាក់ព័ន្ធបញ្ហាពុករលួយនិងធ្វើឲ្យបាត់លុយរដ្ឋរាប់ពាន់លានបាត។
សូមបញ្ជាក់ផងដែរថា ស្របពេលដែលលោកស្រី យីងឡាក់ បន្តជួយរកទីផ្សារជួយកសិករ ខាងរបបសឹកបានទម្លាក់កញ្ចប់ហិរញ្ញវត្ថុសម្រាប់សង្គ្រោះប្រជាកសិករ និងដើម្បីធ្វើយ៉ាងណាទប់ស្កាត់បញ្ហាចលាចលនិងបាតុកម្មតវ៉ានានានោះដែរ។ សប្តាហ៍នេះ របបសឹកបានសម្រេចអនុម័តកញ្ចប់ថវិកា ១,៣ពានលាន់ដុល្លារសម្រាប់ផ្តល់កម្ចីនិងជំនួយដល់កសិករក្នុងពេលដែលពួកគេប្រឈមបញ្ហាវិបត្តិស្រូវអង្ករនេះដែរ៕
Tag:
យីងឡាក់ ស៊ីណាវ៉ាត្រា
ថៃ
© រក្សាសិទ្ធិដោយ thmeythmey.com
