ក្រុមសន្តិសុខបានស្ទុះស្ទារជម្លៀសលោក ដូណាល់ ត្រាំចេញពីវេទិកានៅ Reno នារដ្ឋ Nevada ក្រោយពេលបុរសម្នាក់ស្រែកថា «កាំភ្លើង» នៅយបថ្ងៃសៅរ៍ទី ៥ វិច្ឆិកានេះ។ គេបារម្ភខ្លាចមានការគំរាមកំហែងសន្តិសុខបេក្ខជនប្រធានាធិបតីរូបនេះកើតឡើងស្របពេលដែលការបោះឆ្នោតនឹងមកដល់ក្នុងរយៈពេល៣ថ្ងៃទៀតប៉ុណ្ណោះ។
ខណៈបេក្ខជនប្រធានាធិបតីម្នាក់ៗប្រឹងប្រែងឃោសនាទឹកបង្ហើយមុនការបោះឆ្នោតមកដល់បញ្ហាសន្តិសុខមួយ កើតឡើងចំពោះលោក ដូណាល់ ត្រាំ នៅយប់ថ្ងៃសៅរ៍ ទី ៥វិច្ឆិកា។ លោក ដូណាល់ ត្រាំ ត្រូវបានភ្នាក់ងារ Secret Service ជម្លៀសចេញពីវេទិកាទាំងបន្ទាន់បង្ខំក្នុងពេលលោកផ្តល់សុន្ទរកថាទៅកាន់អ្នកគាំទ្រនៅរដ្ឋ Nevada។
យោងតាមទីភ្នាក់ងារព័ត៌មាន Reuters ខាងប៉ូលិសនិងភ្នាក់ងារសន្តិសុខសម្ងាត់ Secret Service បានឃាត់ខ្លួននិងនាំខ្លួនបុរសស្បែកសម្នាក់ចេញពីទីតាំងជួបជុំគ្នានេះភ្លាមៗ ប៉ុន្តែគេមិនបានរកឃើញកាំភ្លើងឬអាវុធអ្វីឡើយ។ មកទល់ពេលនេះ ប៉ូលិសនិងភ្នាក់ងារ Secret Service នៅដុតដៃដុតជើងបន្តស៊ើបអង្កេតបញ្ហាសន្តិសុខនេះនៅឡើយ។
ខាងប៉ូលិសអះអាងថា បុរសដែលគេមិនអាចកំណត់អត្តសញ្ញាណបាននេះបានស្រែកនៅមុខវេទិកាថា «កាំភ្លើង» ហើយគេបារម្ភពីបញ្ហាសន្តិសុខផ្ទាល់ខ្លួនរបស់ប្រធានាធិបតីទើបបានជាខាង Secret Service ជម្លៀសលោក ដូណាល់ ត្រាំចេញបែបនេះ។
ប៉ុន្មាននាទីក្រោយមក លោក ដូណាល់ ត្រាំ បានត្រឡប់មកកាន់វេទិកាវិញដើម្បីបន្តសុន្ទរកថារបស់លោកទៀត។ លោកបានថ្លែងថា៖« គ្មានអ្នកណាម្នាក់ធ្លាប់និយាយថា វាជារឿងងាយស្រួលសម្រាប់យើងទេ។ ប៉ុន្តែគ្មានអ្នកណាអាចបញ្ឈប់យើងបានឡើយ»។
ក្រៅពីនេះ បេក្ខជនប្រធានាធិបតីអាមេរិកបក្សសាធារណរដ្ឋរូបនេះបានថ្លែងអំណរគុណយ៉ាងជ្រាលជ្រៅចំពោះក្រុម Secret Service និងភ្នាក់ងារអនុវត្តច្បាប់ដទៃនៅក្នុងក្រុង Reno នៃរដ្ឋ Nevada ដែលបានសម្រួលនិងឆ្លើយតបចំពោះបញ្ហាសន្តិសុខនេះទាន់ពេលវេលានិងប្រកបដោយវិជ្ជាជីវៈថែមទៀត។
-ទុកបញ្ហាសន្តិសុខផ្ទាល់ខ្លួនមួយឡែក នៅសល់៣ថ្ងៃទៀតការបោះឆ្នោតមកដល់
ទោះជាមានបញ្ហាសន្តិសុខដែលបង្ហាញពីការគំរាមកំហែងសុវត្ថិភាពក៏ដោយ បេក្ខជនប្រធានាធិបតីទាំងបន្តយុទ្ធនាការឃោសនារបស់ខ្លួនយ៉ាងសស្រាក់សស្រាំជាទីបំផុត។ ប៉ុន្មានថ្ងៃចុងក្រោយដែលនៅសល់នេះជាពេលវេលាសំខាន់បំផុត សម្រាប់បេក្ខជនទាំងពីរ ក្នុងការទាក់ទាញប្រជាប្រិយភាពរៀងៗខ្លួន។
ខណៈដែលលទ្ធផលស្ទង់មតិបង្ហាញឲ្យឃើញពីសំឡេងគាំទ្រប្រកៀកប្រកិតគ្នា លោក ដូណាល់ ត្រាំ និងលោកស្រី ហ៊ីឡារី គ្លីនតុន បានចំណាយពេលវេលាភាគច្រើននៅរដ្ឋ Florida ។ រដ្ឋ Florida ត្រូវបានគេចាត់ទុកជាសមរភូមិនយោបាយមួយដ៏ក្តៅនិងសំខាន់បំផុតដែរ។ កាលបោះឆ្នោតឆ្នាំ ២០០០ លទ្ធផលចុងក្រោយកំណត់នៅក្នុងរដ្ឋ Florida នេះ ក្រោយពេលជម្លោះលើលទ្ធផលបោះឆ្នោតកើតឡើងរហូតដល់មានការប្តឹងប្តល់នៅតុលាការកំពូល ហើយតុលាការកាត់ក្តីឲ្យបេក្ខជនបក្សសាធារណរដ្ឋលោក George W. Bush ឈ្នះលោក Al Gore មកពីបក្សប្រជាធិបតេយ្យនោះ៕