ពីនេះ ពីនោះ
×![]()
ដោយ: ថ្មីៗ
ប្រជាពលរដ្ឋចាក់ដីលំនៅឋានរបស់ខ្លួន ខ្ពស់ជាងផ្លូវថ្នល់ ដែលមិនអាចឲ្យទឹកភ្លៀងហូរចេញពីថ្នល់បាន។ កត្តានេះ ប្រាកដថានាំឲ្យខូចខាតផ្លូវជាមិនខាន។ ពេលមានភ្លៀងខ្លាំង ហើយបើដីផ្ទះពលរដ្ឋខ្ពស់ផងនោះ ទឹកដក់ដល់ពាក់កណ្ដាលផ្លូវឯណោះ។ គេឃើញជង្ហុក ក្រហូង បន្ទាប់ពីទឹកជ្រាបអស់ទៅវិញ។ ទឹកដក់លើផ្លូវច្រើនធ្វើឲ្យខូចខាតផ្នែកជាយផ្លូវជាដំណំ ព្រោះទឹកដក់យូរនៅផ្នែកនេះ។
ទឹកដក់លើផ្លូវថ្នល់ ភាគច្រើននៅទីប្រជុំជន ដែលសំបូរផ្ទះប្រជាជន។ ទីនោះ ហើយដែលគេឃើញផ្លូវខូចខាត ជង្ហុកច្រើន ពិបាកធ្វើដំណើរ ជាងផ្លូវដែលអមដោយវាលស្រែ ឬដែលគ្មានលំឋានក្បែរផ្លូវ។
ចំពោះបញ្ហានេះ ម្ចាស់លំនៅឋាន អាចមិនដែលគិតដល់ ឬមិនខ្ចីខ្វល់ថា ទង្វើរបស់ខ្លួនជាការបំផ្លិចបំផ្លាញផ្លូវនោះទេ។ ទោះយ៉ាងណាពលរដ្ឋទាំងនោះ ត្រូវរងផលលំបាកជាងគេ ព្រោះថាវាស្ថិតត្រង់មុខផ្ទះរបស់ពួកគាត់ ដែលនាំឲ្យពិបាកពេលធ្វើដំណើរចេញ-ចូលផ្ទះម្ដងៗ។ ហើយរឹតតែពិបាក បើផ្ទះពួគគាត់បើកលក់ដូរទំនិញទៀតនោះ។ ពេលខ្លះពួកគាត់រុញដាក់គ្នាថា«បើខ្ញុំមិនចាក់ដីឲ្យខ្ពស់ទេ នោះទឹកនឹងហូរពីផ្ទះរបស់អ្នកជិតខាងដែលដីផ្ទះគេខ្ពស់ជាងផ្ទះខ្ញុំ ដូចនេះ ខ្ញុំត្រូវតែចាក់ដីឲ្យខ្ពស់ដែរ»។ វាក៏ស្ដែងឲ្យឃើញពីការគិតកម្មសិទ្ធិឯកជនធំជាងកម្មសិទ្ធិសាធារណៈផងដែរ។
បើស្ថាប័នពាក់ព័ន្ធ មិនមានវិធានការ ឬបទបញ្ញត្តិ ចំពោះការចាក់ដីផ្ទះខ្ពស់ជាងផ្លូវថ្នល់ទេ នោះពិតណាស់ថា ផ្លូវថ្នល់នៅតែរងការបំផ្លិចបំផ្លាញពីកត្តាមួយនេះជារៀងដរាប៕
© រក្សាសិទ្ធិដោយ thmeythmey.com
