ចុងក្រោយរឿងអាស្រូវអ៊ីម៉ែលដែលរួបរឹតបេក្ខជនប្រធានាធិបតីបក្សប្រជាធិបតេយ្យលោកស្រី ហ៊ីឡារី គ្លីនតុន ឈានដល់ទីបញ្ចប់ហើយ ក្រោយ FBI ប្រកាសជាថ្មីថា គ្មានការចោទប្រកាន់លោកស្រីឡើយ។ គណបក្សប្រជាធិបតេយ្យស្វាគមន៍ការប្រកាសនេះ ខណៈក្រុមលោក ដូណាល់ ត្រាំ រិះគន់ FBI វិញ។
លោកស្រី ហ៊ីឡារី គ្លីនតុន រួចផុតអស់ពីរឿងអាស្រូវអ៊ីម៉ែលដ៏ចម្រូងចម្រាសហើយក្រោយពេលដែលប្រធានស្ថាប័នស៊ើបអង្កេត FBI បានផ្ញើលិខិតទៅកាន់សភាដោយបញ្ជាក់ថា គ្មានការចោទប្រកាន់លោកស្រី ហ៊ីឡារី គ្លីនតុន ឡើយ។ការប្រកាសនេះធ្វើឡើងប្រហែល ៣៦ ម៉ោងប៉ុណ្ណោះមុនការបោះឆ្នោតប្រធានាធិបតីមកដល់។
យោងតាមទីភ្នាក់ងារព័ត៌មាន AFP ប្រធានភ្នាក់ងា FBI លោក James Comey ប្រកាសបិទបញ្ចប់សំណុំរឿងអ៊ីម៉ែលលោកស្រី ហ៊ីឡារី គ្លីនតុន ដោយផ្តល់ការសន្និដ្ឋានដូច សេចក្តីសន្និដ្ឋានកាលពីខែកក្កដា។ លោក James Comey បានថ្លែងថា៖ «យើងត្រួតពិនិត្យអ៊ីម៉ែលទាំងអស់ដែលផ្ញើមកពីឬផ្ញើទៅកាន់លោកស្រី ហ៊ីឡារី គ្លីនតុន ក្នុងពេលលោកស្រីធ្វើជារដ្ឋមន្ត្រីការបរទេស។ យោងតាមការស៊ើបអង្កេតនេះ យើងមិនផ្លាស់ប្តូរការសន្និដ្ឋានដែលយើងបានធ្វើកាលពីខែកក្កដាឡើយ»។
ដូច្នេះមានន័យថា លោកស្រី ហ៊ីឡារី គ្លីនតុន មិនមានទោសពៃ ដោយធ្វើឲ្យរឿងសម្ងាត់អាមេរិកស្ថិតក្នុងស្ថានភាពគ្រោះថ្នាក់ដោយសារលោកស្រី ប្រើអ៊ីម៉ែលផ្ទាល់ខ្លួនដើម្បីបំពេញការងារជារដ្ឋមន្ត្រីការបរទេសឡើយ។
ក្រោយ FBI ប្រកាសបែបនេះ ក្រុមឃោសនាលោកស្រី ហ៊ីឡារី គ្លីនតុន បានប្រកាសស្វាគមន៍ ហើយ ប្រធានក្រុមឃោសនារបស់បេក្ខជនបក្សប្រជាធិបតេយ្យលោកស្រី Jennifer Palmieri បង្ហាញក្តីរីករាយដែលគ្មានអ្វីប្រែប្រួលក្នុងសំណុំរឿងនេះ។
លោកស្រីបានថ្លែងថា៖ «យើងរីករាយណាស់ដែលសំណុំរឿងនេះត្រូវបានដោះស្រាយចប់សព្វគ្រប់»។
យ៉ាងណាក៏ដោយចុះ ក្រុមឃោសនារបស់លោក ដូណាល់ ត្រាំ បានប្រតិកម្មខ្លាំងៗចំពោះការប្រកាសបិទសំណុំរឿងដោយគ្មានការចោទប្រកាន់លោកស្រី ហ៊ីឡារី គ្លីនតុន។ ហើយគេរិះគន់ថា ការស៊ើបអង្កេតរបស់ភ្នាក់ងារ FBI មិនបានរៀបចំឲ្យបានត្រឹមត្រូវតាំងពីដើមមកម្ល៉េះ។
សូមបញ្ជាក់ថា កាលពីខែមុន ស្របពេលដែលលោកស្រី ហ៊ីឡារី គ្លីនតុន កំពុងកើនឡើងប្រជាប្រិយភាពនិងត្រៀមខ្លួនយកជ័យជម្នះលើលោក ដូណាល់ ត្រាំ ផង ស្រាប់តែលោក James Comey រកឃើញអ៊ីម៉ែលថ្មីជារបស់ស្វាមីជំនួយការផ្ទាល់របស់លោកស្រី ហ៊ីឡារី គ្លីនតុន លោកស្រី Huma Abedin ។ ហើយប្រធានស្ថាប័នស៊ើបអង្កេតនេះក៏ផ្ញើលិខិតទៅបណ្តាសមាជិកសភា ដោយអះអាងថា ខ្លួនត្រូវបើកការស៊ើបអង្កេតទៀត ព្រោះគេសង្ស័យថា អ៊ីម៉ែលថ្មីអាចនឹងពាក់ព័ន្ធលោកស្រី ហ៊ីឡារី គ្លីនតុន។
ការសើរើរឿងអាស្រូវនេះបានបង្កឲ្យមានផលប៉ះពាល់ដល់ប្រជាប្រិយភាពរបស់លោកស្រី ហ៊ីឡារី គ្លីនតុន ដែលកំពុងប្រកៀកប្រកិតជាមួយលោក ដូណាល់ ត្រាំ ស្រាប់នោះ។ គណបក្សប្រជាធិបតេយ្យជាពិសេសក្រុមឃោសនាលោកស្រី ហ៊ីឡារី គ្លីនតុន ហាក់ព្រួយបារម្ភពីបញ្ហានេះ ប៉ុន្តែពួកគេអះអាងថា សកម្មភាពរបស់ FBI ជារឿងនយោបាយច្រើនជាង។ មន្ត្រីជាន់ខ្ពស់ក្នុងក្រសួងយុត្តិធម៌អាមេរិកក៏ព្រមាន FBI ផងដែរ ដោយបញ្ជាក់ថា សកម្មភាពរបស់ស្ថាប័នស៊ើបអង្កេតនេះបំពារបំពានទំនៀមទម្លាប់និងគោលការណ៍របស់ក្រសួងយុត្តិធម៌អាមេរិក។