អន្តរជាតិ
ចិន បារម្ភខ្លាំងពី«ភាពផុយស្រួយនៃសន្តិសុខឧបទ្វីបកូរ៉េ» ខណៈអាមេរិក-កូរ៉េខាងត្បូង ជម្នះដំឡើងខែលការពារមីស៊ីល
× ទោះបីជាមានការទិតៀន និងជំទាស់ពីបណ្តាមហាអំណាចដូចជារុស្ស៊ី និងចិនក្នុងការដំឡើងប្រព័ន្ធការពារមីស៊ីល(THAAD) ក៏ដោយ អាមេរិក និងកូរ៉េខាងត្បូង នៅតែបន្តមហិច្ឆតារបស់ពួកគេក្នុងការសម្រេចឲ្យបានមូលដ្ឋានយោធាប្រឆាំងនឹងសកម្មភាពគឃ្លើនរបស់កូរ៉េខាងជើងឲ្យបាន។ ក្រុងសេអ៊ូល និងក្រុងវ៉ាស៊ីនតោន បានប្រកាសពីការសម្រេចចុងក្រោយរបស់ពួកគេក្នុងការដំឡើងប្រព័ន្ធការពារមីស៊ីលនៅក្នុងរយៈពេលមិនដល់១ឆ្នាំទៀតនោះទេ ដោយថែមទាំងអះអាងថា ឥទ្ធិពលរបស់ប្រព័ន្ធការពារនោះ ខ្លាំងក្លាជាងប្រព័ន្ធការពារនៅកោះ Guam ទៅទៀត។
មេបញ្ជាការកងទ័ពអាមេរិកប្រចាំកូរ៉េខាងត្បូង លោក Vincent Brooks នៅថ្ងៃទី០៤ ខែវិច្ឆិកាកន្លងទៅ បានអះអាងថា អាមេរិក នឹងពង្រាយប្រព័ន្ធការពារមីស៊ីលនៅក្នុងទឹកដីកូរ៉េខាងត្បូងនៅក្នុងរយៈពេល៨ទៅ១០ខែទៀតប៉ុណ្ណោះ។ លោកមេបញ្ជាការ ក៏បញ្ជាក់ជាថ្មីដែរថា ការសម្រេចដំឡើងសព្វាវុធយុទ្ធសាស្ត្រនេះនៅក្នុងឧបទ្វីបកូរ៉េ ដើម្បីប្រឆាំងទៅនឹងការបង្កហេតុរបស់កូរ៉េខាងជើងដែលបាននិងកំពុងតែបន្តបំពានបំរាមសហគមន៍នោះ។ នេះបើយោងតាមការចុះផ្សាយរបស់សារព័ត៌មានកូរ៉េខាងត្បូង។
អ្វីដែលគួរកត់សម្គាល់នោះ តាមប្រភពព័ត៌មានដដែលនោះ មេបញ្ជាការកងទ័ពរូបនោះ ក៏បានសង្កត់ធ្ងន់ដែរថា ផែនការនៃការដំឡើងប្រព័ន្ធការពារមីស៊ីល (THAAD)នោះ មានលក្ខណៈធំជាង និងឥទ្ធិពលខ្លាំងក្លាជាប្រព័ន្ធការពារដែលមាននៅក្នុងមូលដ្ឋាន Guam ដែលស្ថិតនៅក្នុងតំបន់អាស៊ីប៉ាស៊ីហ្វិកផងដែរនោះ។
ចិន បន្តប្រឆាំងការដំឡើង ដោយចាត់ទុកថាវា ជាការបំផ្លាញសន្តិសុខនៅក្នុងឧបទ្វីបកូរ៉េ និងផលប្រយោជន៍របស់ខ្លួនទៀតផង
ជុំវិញនៃផែនការនោះ ចិន ក៏មិនបានទុកយូរដែរ ដោយ ក្រុងប៉េកាំង បានចោទសកម្មភាពនោះ ថា មិនបានជួយស្ថានភាពឲ្យថមថយឡើយ តែជំរុញឲ្យកាន់តែគ្រោះថា្នក់ទៅវិញនោះទេ។ នាសន្និសីទសារព័ត៌មានប្រចាំថ្ងៃនៅថ្ងៃទី០៤ ខែវិច្ឆិកា អ្នកនាំពាក្យក្រសួងការបរទេសលោកស្រី Hua Chunying បានហៅការដំឡើង THAAD នៅក្នុងទឹកដីកូរ៉េខាងត្បូង ថា ជាការរំខាន និងបំផ្លាញតុល្យភាពយុទ្ធសាស្ត្រនៅក្នុងតំបន់។
អ្នកនាំពាក្យរូបនោះ ពន្យល់ថា ការដំឡើង THAAD បង្កគ្រោះថ្នាក់កាន់តែខ្លាំងដល់ផលប្រយោជន៍យុទ្ធសាស្ត្រ និងសន្តិសុខនៃប្រទេសពាក់ព័ន្ធនៅក្នុងតំបន់ ដែលរាប់បញ្ចូលទាំងចិន និងចាត់ទុកសកម្មភាពនោះថា បញ្ច្រាសទៅនឹងកិច្ចប្រឹងប្រែងក្នុងការរក្សាសន្តិភាព និងស្ថិរភាពនៅក្នុងឧបទ្វីបកូរ៉េ។ ហើយក្រុងប៉េកាំង ក៏បានទទូចឲ្យបញ្ឈប់សកម្មភាពនោះជាបន្ទាន់ទៀតផង។
នាសន្និសីទសារពត៌មានដដែលនោះ អ្នកនាំពាក្យ ពណ៌នាស្ថានភាពបច្ចុប្បន្ននៅឧបទ្វីបកូរ៉េ ថា ផុយស្រួយ រសើប និងស្មុគស្មាញ ហើយ ក្រុងប៉េកាំង ក៏សង្ឃឹមដែរថា អាមេរិក និងកូរ៉េខាងត្បូង អាចធ្វើកិច្ចការបន្ថែមចូលរួមកសាងសន្តិភាព និងស្ថិរភាពនៅឧបទ្វីបកូរ៉េ និងបញ្ឈប់សកម្មភាពអុចអាលឲ្យមានជម្លោះ និងភាពតានតឹងកាន់តែធ្ងន់ធ្ងរនោះ។
ជុំវិញការបង្ហើបពីផែនការដំឡើង THAAD នេះដែរ គេមិនទាន់ឃើញមានសេចក្តីថ្លែងការណ៍ប្រតិបតិកម្មពីរុស្ស៊ីនៅឡើយនោះទេ។ តែកន្លងមក មិនខុសពីចិនឡើយ រុស្ស៊ី មិនគាំទ្រចំណាត់ការអាមេរិក និងកូរ៉េខាងត្បូង ដំឡើងប្រព័ន្ធការពារមីស៊ីលប្រឆាំងកូរ៉េខាងជើងឡើយ ដ្បិត បើអាមេរិក អាចដំឡើងបានដោយជោគជ័យនោះ អាមេរិក នឹងកាន់តែអាចពង្រឹង និងពង្រីកអំណាចយោធាខ្លួនបានកាន់តែខ្លាំង។ រុស្ស៊ី ធា្លប់ទាំងព្រមាន ថា នឹងពង្រាយកងទ័ពដើម្បីតទល់ជាមួយនឹងប្រព័ន្ធការពារមីស៊ីលនោះទៀតផង។
កូរ៉េខាងជើង នៅស្ងៀមសិន តែ មានតម្រុយថា អាចនឹងបាញ់សាកល្បងមីស៊ីលឆ្លងទ្វីបជាថ្មី
ងាកមកចាប់អារម្មណ៍កូរ៉េខាងជើង ដែលអាមេរិក និងកូរ៉េខាងត្បូង ចោទថាជាមេអ្នកបង្ករឿង និងជាដើមហេតុនៃការដំឡើងប្រព័ន្ធការពារមីស៊ីលនោះ ក៏មិនទាន់ឃើញប្រតិកម្មអ្វីខ្លាំងក្លាឡើយ។ តែបើតាមមន្ត្រីអាមេរិក និងកូរ៉េខាងត្បូង កូរ៉េខាងជើង អាចបាញ់សាកល្បងមីស៊ីល និងនុយក្លេអ៊ែរគ្រប់ពេល។ ជាពិសេសនោះ បើតាមសារព័ត៌មាន Fox News មន្ត្រីចារកម្មអាមេរិក បានឲ្យដឹងថា មានតម្រុយមួយចំនួនបង្ហាញថាកូរ៉េខាងជើង ត្រៀមបាញ់«មីស៊ីលអន្តរទ្វីប»នាពេលខាងមុខថ្មីៗ។
សូមបញ្ជាក់ផងដែរថា ក្នុងបច្ចេកទេសយោធា ឧបទ្វីបកូរ៉េ គឺស្ថិតនៅក្នុងស្ថានភាពសង្គ្រាមនៅឡើយនោះទេ។ កូរ៉េខាងជើង តែងតែបង្អួតសមត្ថភាពការពាររបស់ខ្លួនតាមរយៈការបាញ់សាកល្បងគ្រាប់បែក និងមីស៊ីល។ កន្លងមក រដ្ឋមន្ត្រីការពារជាតិកូរ៉េខាងត្បូង លោក ហាន មិនគូ ក៏ធា្លប់បានសារភាពថាសមត្ថភាពស្វ័យការពាររបស់កូរ៉េខាងត្បូងមិនអាចតទល់ជាមួយនឹងអាវុធរបស់កូរ៉េខាងជើងឡើយ។ ហើយ លោក បញ្ជាក់ថា មានតែប្រព័ន្ធការពារមីស៊ីលរបស់អាមេរិក THAAD នោះទេដែលអាចទប់ទល់បាន។
សូមរម្លឹកផងដែរថា នៅដើមឆ្នាំ២០១៦កន្លងទៅ ក្រុមប្រឹក្សាសន្តិសុខអង្គការសហប្រជាតិ បានអនុម័តជាឯកច្ឆ័នលើសេចក្តីសម្រេចថ្មីមួយទៀតប្រឆាំងសកម្មភាពដ៏គឃ្លើនរបស់កូរ៉េខាងជើងក្នុងការបាញ់សាកល្បងគ្រាប់បែកមីស៊ីលតាំងពីឆ្នាំ២០១៤ និង២០១៥ និងជាពិសេសនោះការបាញ់គ្រាប់បែកបរមាណូនៅដើមឆ្នាំឆ្នាំ២០១៦នេះ។ ទោះបីជាទណ្ឌកម្មនោះ មើលឃើញថា ធ្ងន់ធ្ងរយ៉ាងណាក៏ដោយកូរ៉េខាងជើង ហាក់ដូចជាមិនមានថមថយសកម្មភាពអ្វីឡើយ៕
Tag:
ចិន
អាមេរិក
កូរ៉េខាងត្បូង
THAAD
© រក្សាសិទ្ធិដោយ thmeythmey.com