ពីនេះ ពីនោះ
តើពាក្យថា «អាណានិគម» និង«អាណាព្យាបាល» មានអត្ថន័យខុសគ្នាដូចម្ដេច?
×
ពាក្យ «អាណានិគម» និង«អាណាព្យាបាល» អាចនៅមានសាធារណជនមួយចំនួន លោកនៅមានភាពមិនច្បាស់លាស់ពីអត្ថន័យរវាងពាក្យទាំងពីរនេះ។ សទ្ទានុក្រមវិទ្យាសាស្ត្រនយោបាយ និងការទូត ដែលអនុម័តដោយក្រុមប្រឹក្សាជាតិភាសាខ្មែរ បានពន្យល់ពីអត្ថន័យនៃពាក្យទាំងពីរនេះដូចខាងក្រោម៖
ពាក្យ«អាណានិគម» មានន័យថា ប្រទេស ឬតំបន់មួយដែលត្រូវបានគ្រប់គ្រងដោយប្រទេសផ្សេងមួយទៀតដែលមានអំណាចខ្លាំងជាង។ ឧទាហរណ៍៖ ប្រទេសកម្ពុជាធ្លាប់ជាអាណានិគមរបស់ប្រទេសបារាំង ពីឆ្នាំ១៨៨៤ ដល់ឆ្នាំ១៩៥៣។
ចំណែកពាក្យ«អាណាព្យាបាល» មានន័យថា ជារបបគតិយុត្តដោយសន្ធិសញ្ញាមួយដែលរដ្ឋឬទឹកដីមួយត្រូវបានដាក់ឲ្យនៅក្រោមការគ្រប់គ្រងនិងការពារនៃរដ្ឋមួយទៀតដែលមានអំណាចខ្លាំងជាង។ រដ្ឋដែលនៅក្រោមអាណាព្យាបាលមានសិទ្ធិរក្សារដ្ឋាភិបាលឬរដ្ឋបាលរបស់ខ្លួនបាន។ ឧទាហរណ៍៖ នៅថ្ងៃទី១១ ខែសីហា ឆ្នាំ១៨៦៣ បារាំងបានមកដាក់អាណាព្យាបាលនៅប្រទេសកម្ពុជា តាមរយៈការចុះសន្ធិសញ្ញាជាមួយនឹងព្រះបាទនរោត្ដម៕
ដកស្រង់ពី៖ សទ្ទានុក្រមវិទ្យាសាស្ត្រនយោបាយ និងការទូត, ក្រុមប្រឹក្សាជាតិភាសាខ្មែរ
© រក្សាសិទ្ធិដោយ thmeythmey.com