ពីនេះ ពីនោះ
បើពលរដ្ឋនៅតែជាបុគ្គលគ្មានវិន័យ ជាតិខ្មែរនៅតែទន់ខ្សោយ
× ភ្នំពេញ៖ ចង់ឲ្យជាតិមួយខ្លាំង គឺត្រូវធ្វើរឿងច្រើនណាស់ទើបអាចជួយជាតិឲ្យងើបឡើងបាន។ និយាយម្យ៉ាងទៀតគឺ គ្រប់វិស័យទាំងអស់ត្រូវតែធ្វើឲ្យសកម្ម ដើម្បីជំរុញដំណើរវិវឌ្ឍទៅមុខរបស់ជាតិ។ ប៉ុន្តែដើម្បីឲ្យកិច្ចការទាំងនោះអាចដំណើរការទៅបានគឺ ត្រូវការជាចាំបាច់ពលរដ្ឋមានវិន័យ មានសណ្ដាប់ធ្នាប់ ស្គាល់ច្បាប់ស្គាល់ទម្លាប់។
រហូតមកពេលបច្ចុប្បន្ននេះ ប្រសិនបើខ្មែរនៅតែបន្តមានអត្តចរិកមិនទាន់ចេះគោរពគ្នា ផ្ដល់សិទ្ធិឲ្យគ្នា អនុគ្រោះគ្នា យោគយល់គ្នា អធ្យាស្រ័យគ្នានោះទេ ទោះខ្មែរស្រែកយំយ៉ាងណាក៏មិនអាចធ្វើឲ្យជាតិមួយនេះរឹងមាំបានឡើយ មូលហេតុគឺគិតអត្តទត្ថនិយម។
ជាក់ស្ដែងមិនចាំបាច់មើលអ្វីឆ្ងាយនោះទេគ្រាន់តែបញ្ហាសំរាម ក៏ខ្មែរមួយភាគធំមិនទាន់ចេះបោះសំរាមចោលផង គឺមិនសំខាន់កន្លែងអ្នកផ្សេងស្អាត ឬមិនស្អាតឡើយ ប៉ុន្តែសំខាន់កន្លែងខ្លួនឯងស្អាត។ បើនិយាយពីបញ្ហាចរាចរណ៍វិញ គឺពិបាករកពាក្យថ្លែងជាទីបំផុត។
ដោយឡែក បើនិយាយពីច្បាប់វិញ មនុស្សស្ទើរគ្រប់គ្នា តែងតែស្រែកសុំឲ្យរដ្ឋពង្រឹងនីតិរដ្ឋ អនុវត្តនច្បាប់ឲ្យបានត្រឹមត្រូវ ប៉ុន្តែពេលមានបញ្ហា ម្នាក់ៗរៀបចំកញ្ចប់ថវិកាសម្រាប់សូកប៉ាន់រួចជាស្រេច។ តើនីតិរដ្ឋមានដោយរបៀបណា?
មន្ត្រីរាជការចង់បានប្រាក់ខែច្រើន គឺជារឿងល្អ ហើយក៏មិនអាក្រក់នោះទេ ប្រសិនបើមន្ត្រីទាំងនោះព្យាយាមបំពេញកិច្ចការបានល្អ។ ប៉ុន្តែមន្ត្រីរាជការមួយចំនួនចង់បានប្រាក់ខែច្រើនតែមិនព្រមខំប្រឹងធ្វើការ។ តើរដ្ឋដាច់ចិត្តចំណាយថវិកាដែរឬទេ?
បើនិយាយក៏រាប់មិនអស់ថាខ្មែរនៅខ្សោយអ្វី។ ប៉ុន្តែអត្តចរិកទន់ខ្សោយនៃជាតិសាសន៍មួយនេះត្រូវតែកែប្រែ។ ប្រសិនបើត្រូវតែកែប្រែ និស្សិតបញ្ញវន្ត អ្នកនយោបាយ និងអ្នកសារព័ត៌មាន អ្នកមានចំណេះដឹងច្បាស់លាស់ ត្រូវជួយគ្នាអប់រំខ្មែរ បង្រួបបង្រួមទឹកចិត្តខ្មែរ និងស្មារតីជាតិខ្មែរ ទើបជាតិយើងដើរទៅមុខប្រកប់ដោយតម្លៃពិត។ ក្រៅពីនេះ ប្រជាជនខ្មែរ មួយចំនួនត្រូវហ៊ានទទួលស្គាល់ថាខ្លួនឯងនៅមានចំណុចខ្វះខាត និងត្រូវតែកែប្រែ កុំតាំងខ្លួនឯងជាមនុស្សល្អគ្រប់ដប់ ព្រោះវាគ្មានតម្លៃទេ នៅពេលដែលខ្លួនឯងមិនកើត តែមិនព្រមទទួលស្គាល់ការពិត។
បន្ថែមពីនេះ ក្រុមបញ្ញវន្ត បណ្ឌិត អ្នកនយោបាយ អ្នកសារព័ត៌មាន ដែលមានគំនិត សូមកុំគិតតែក្នុងខួរក្បាល ប៉ុន្តែត្រូវធ្វើសកម្មភាពជួយសង្គមក្នុងផ្លូវត្រូវ។ សូមកុំធ្វើជាអ្នកមានគំនិតនិយាយតែអត់មាត់។ ចំណែកអ្នកមានមាត់និយាយ ប្រឹងថ្លាថ្លែងគ្រប់បែបយ៉ាង តែជាគំនិតមិនរីកចម្រើន ត្រូវបញ្ឈប់ទៅព្រោះរូបភាពបែបនេះគ្មានលទ្ធផលល្អជូនជាតិឡើយ។
ប្រសិនបើត្រូវនិយាយ គឺសូមកុំនិយាយតែពាក្យបំបែកបំបាក់ជាតិ ហែកជាតិ ជេរជាតិ ប្រមាថជាតិ កុំលាបពណ៌គ្នា ដែលទង្វើទាំងនេះមិនអាចរកភាពថ្លៃថ្នូរឲ្យសង្គមបាន ឡើយ។
© រក្សាសិទ្ធិដោយ thmeythmey.com