ជាតិ
បទយកការណ៍ / បទសម្ភាសន៍
អ្នកតាមខេត្តត្រៀមមកលេងបុណ្យអុំទូក ក្រោយខកខានជាច្រើនឆ្នាំ
× ភ្នំពេញ៖ ព្រះរាជពិធីបុណ្យអុំទូក បណ្ដែតប្រទីប អកអំបុក សំពះព្រះខែ នឹងប្រព្រឹត្តទៅនៅថ្ងៃទី១៣-១៤-១៥ ខែ វិច្ឆិកា ឆ្នាំ២០១៦ខាងមុខនេះ។ ខណៈចំណុះទូកគ្រប់បណ្ដារាជធានី-ខេត្ត បានរៀបចំទូកសម្រាប់ចួលរួមការប្រណាំងទូកនៅភ្នំពេញ ប្រជាពលរដ្ឋនៅតាមបណ្ដាខេត្តផ្សេងៗ ក៏បានរៀបចំខ្លួនមកទស្សនាការប្រណាំងទូក ការតាំងពិព័រណ៌ និងការប្រគំតន្ត្រីផងដែរ។ ថាតើប្រជាពលរដ្ឋទាំងនោះត្រៀមអ្វីខ្លះសម្រាប់ពិធីបុណ្យអុំទូក?
ពិធីបុណ្យអុំទូក បណ្ដែតប្រទីប អកអំបុក សំពះព្រះខែ ដែលប្រទេសកម្ពុជាខកខានការប្រណាំងទូក រយៈពេល ៤ឆ្នាំមកហើយ ដោយសារតែមានបញ្ហាផ្សេងៗកើតឡើងនៅរយៈពេលចុងក្រោយនេះ។ សម្រាប់ឆ្នាំនេះ ប្រមុខរាជរដ្ឋាភិបាលកម្ពុជា បានប្រកាសអំពីការប្រារព្វពិធីបុណ្យអុំទូកឡើងវិញ។ ចំណែកចំណុះទូក ក៏បានត្រៀមទូក តាមការប្រកាស និងត្រៀមចំណុះទូកសម្រាប់ការប្រណាំងផងដែរ។ ម្យ៉ាងវិញទៀត ប្រជាពលរដ្ឋតាមបណ្ដាខេត្តក៏បានត្រៀមខ្លួន ដើម្បីចូលរួមទស្សនាការប្រណាំងទូកនៅរាជធានីភ្នំពេញផងដែរ។
អ្នកស្រី ភឹម សំណាង ជាអ្នករស់នៅស្រុកចិត្របុរី ខេត្តក្រចេះ បានប្រាប់ឲ្យដឹងថា អ្នកស្រីនឹងនាំគ្រួសារមកលេងបុណ្យអុំទូកនេះ។ អាជីវករ លក់តុ ទូ រូបនេះ ថែមទាំងបានត្រៀមថវិការួចហើយ សម្រាប់មកកម្សាន្ត រយៈពេល៣ថ្ងៃនេះ។ អ្នកស្រី សំណាង បានថ្លែងយ៉ាងដូច្នេះថា៖«គេផ្សាយថា ឆ្នាំហ្នឹងអុំទូក។ រាល់ដងមានគេប្រគំតន្ត្រីច្រើនកន្លែងណា៎ ហើយគេតាំងពិព័រណ៌អ៊ីចឹង ចង់ទៅលេង ខានដើរលេង ៣ ៤ឆ្នាំហើយ»។ អ្នកស្រី សំណាង អះអាងថា លោកស្រី នឹងទៅមើលការប្រណាំងទូកង នៅមុខព្រះបរមរាជវាំងដោយផ្ទាល់ផងដែរ។
ដូចគ្នាដែរ អ្នកស្រី អៀម បាន រស់នៅខេត្តបាត់ដំបង ក៏មកលេងបុណ្យអុំទូកនៅឆ្នាំនេះដែរ។ ទោះជានៅបាត់ដំបង ក៏មានការប្រណាំងទូកដែរក៏ដោយ ប៉ុន្តែអ្នកស្រី អៀម បាន បញ្ជាក់ថា គាត់ចង់ទៅមើលការប្រណាំងទូកនៅភ្នំពេញជាង ព្រោះមានទូកនិងមនុស្សម្នាច្រើន។ អ្នកខេត្តបាត់ដំបងរូបនេះ ដែលអះអាងថា ខ្លួនមិនដែលខកខាន មកលេងបុណ្យអុំទូកនោះឡើយ លើកលែងតែប៉ុន្មានឆ្នាំចុងក្រោយនេះដែលរដ្ឋាភិបាលផ្អាកបុណ្យអុំទូក។ «មកភ្នំពេញពេលបុណ្យអុំទូកម្ដងៗ អ៊ំបានដើរលេងច្រើន។ ពេលរសៀលទៅមើលអុំទូក ពេលល្ងាចមើលតាំងពិព័រណ៍ និងពេលយប់កាំជ្រួច និងការប្រគំតន្ត្រី»។ នេះជាការរៀបរាប់ពីគម្រោងរបស់អ្នកស្រី អៀម បាន នៅក្នុងឱកាសបុណ្យអុំទូកនេះ។
«បុណ្យអុំទូកនេះ ប្រហែលជាសប្បាយ ព្រោះខានប៉ុន្មានឆ្នាំហើយ»។ នេះជាការលើកឡើងរបស់ អ្នកស្រី ណារី ជាកម្មការិនីរោងចក្រកាត់ដេរមួយរូប។ ជាអ្នកខេត្តតាកែវ អ្នកស្រី ណារី បានប្រាប់ពីគម្រោងរបស់ខ្លួននៅក្នុងថ្ងៃបុណ្យអុំទូកថា នឹងឆ្លៀតដើរផ្សារទំនើបអ៊ីអនផងដែរ ក្រៅពីមើលការប្រណាំងទូក ការប្រគំតន្ត្រី និងការតាំង ពិព័រណ៍ផ្សេងៗនោះ។ បើតាម អ្នកស្រី ណារី អ្នកភូមិរបស់គាត់ជាច្រើនទៀត ក៏អះអាងថា នឹងមកលេងបុណ្យអុំទូក នៅឆ្នាំនេះដែរ។
នៅក្នុងពិធីបុណ្យអុំទូក បណ្តែតប្រទីប សំពះព្រះខែ និងអកអំបុក មានទូកដែលចូលរួមប្រណាំងចំនួន ២៥៦ និងមានចំណុះទូកចំនួនជាង ១ម៉ឺន៦ពាន់នាក់។ សម្រាប់ការប្រគំតន្ត្រីមាននៅទីតាំងដូចជា កោះពេជ្រ សួនច្បារវត្តបុទុមវត្តី រមណីយដ្ឋានវត្តភ្នំ ទីលានប្រជាធិបតេយ្យ និងលាននៃមណ្ឌលជាកន្លែងស្នាក់នៅរបស់ចំណុះទូកជាដើម៕
© រក្សាសិទ្ធិដោយ thmeythmey.com