សភាអនុម័តច្បាប់ថវិកាជាតិសម្រាប់ចំណាយក្នុងឆ្នាំ២០១៧

ជាតិ

សេដ្ឋកិច្ច

សភាអនុម័តច្បាប់ថវិកាជាតិសម្រាប់ចំណាយក្នុងឆ្នាំ២០១៧

22, Nov 2016 , 6:57 pm

រូបភាព

ដោយ: ម៉ៅ សុផា

ភ្នំពេញ៖ រដ្ឋសភា បានសម្រេចអនុម័តថវិកាជាតិចំនួន២០,១៨៤,៤៥៧លានរៀល ស្មើជាង ៥ពាន់លានដុល្លារ សម្រាប់ចំណាយលើវិស័យនានា ក្នុងឆ្នាំ២០១៧។ ការអនុម័តច្បាប់នេះ ធ្វើឡើង ក្នុងកិច្ចប្រជុំពេញអង្គនៃរដ្ឋសភា ពេញមួយថ្ងៃទី ២២ ខែវិច្ឆិកានេះ។

ថវិកាជាតិសរុបជាង៥ពាន់លានដុល្លារ ដែលស្នើឡើងដោយរដ្ឋាភិបាល ត្រូវបានរដ្ឋសភា អនុម័ត សម្រាប់ការចាយវាយក្នុងឆ្នាំ២០១៧ ។ រដ្ឋាភិបាល ក៏គ្រោងនឹងប្រមូលចំណូលឲ្យស្មើនឹងចំណាយផងដែរ ពោលគឺប្រមូលឲ្យបានទឹកប្រាក់ប្រមាណ ៥ ពាន់លានដុលា្លរ។

ការអនុម័តនេះ ធ្វើឡើងដោយតំណាងរាស្ត្រពីគណបក្សប្រជាជនកម្ពុជាចំនួន៦៦រូបប៉ុណ្ណោះ ខណៈ តំណាងរាស្ត្រពីគណបក្សសង្គ្រោះជាតិ ទាំង៣៩រូប ដែលចូលរួមប្រជុំផងនោះ មិនបានលើកដៃអនុម័តឡើយ។ នៅព្រឹកថ្ងៃអង្គារនេះ រដ្ឋសភា បានបើកកិច្ចប្រជុំពេញអង្គលើកទី៧ នីតិកាលទី៥ ដោយមានការចូលរួមពិភាក្សាពីគណបក្សដែលមានអាសនៈក្នុងរដ្ឋសភា។ របៀបវារៈមួយចំនួន មានដូចជា សេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៧ និងសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងទីក្រុងប៉ារីស ស្តីពីការប្រែប្រួលអាកាសធាតុ ជាដើម ត្រូវបាលើកទៅពិភាក្សាគ្នា ក្នុងរដ្ឋសភា។

យោងតាមសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៧ ទឹកប្រាក់ខាងលើ នឹងត្រូវបែងចែកទៅលើចំណាយចរន្ត និងចំណាយមូលធន។ រីឯប្រភពចំណូល គឺពឹងផ្អែកលើ ចំណូលចរន្ត និងចំណូលមូលធន។

ចំណាយចរន្ត គឺជាមូលនិធិទាំងឡាយណា ដែលប្រើដើម្បីរក្សាសេវាកម្មសាធារណៈ ឲ្យដំណើរការជារៀងរាល់ថ្ងៃ។ ចំណាយនេះ រួមមានប្រាក់បៀវត្សរ៍របស់មន្ត្រីរាជការ ទំនិញដែលចាំបាច់សម្រាប់ផ្តត់ផ្គង់សេវាកម្មសាធារណៈ ដូចជាថ្នាំពេទ្យ និងសៀវភៅសិក្សាជាដើម។ លើសពីនេះ ការចំណាយ លើផ្នែកដទៃទៀត ដូចជាសង្គមកិច្ច សេដ្ឋកិច្ច ការទូទាត់បង់ការប្រាក់ និងការចំណាយដោយមិនមានការគ្រោងទុកជាដើម ក៏ត្រូវបានចាត់ទុកថា ជាចំណាយចរន្តផងដែរ។ នេះបើផ្អែកលើ សៀវភៅណែនាំអំពីថវិកាជាតិ ដែលផលិតដោយវេទិកានៃអង្គការមិនមែនរដ្ឋាភិបាល ស្តីពីកម្ពុជា ក្នុងឆ្នាំ២០០៧ ។

បើតាមខ្លឹមសារក្នុងសៀវភៅខាងលើដដែល ចំណាយមូលធន រួមមាន វិនិយោគសម្រាប់អត្ថប្រយោជន៍អនាគត ការធ្វើហិរញ្ញប្បទានលើគម្រោងវិនិយោគ មូលនិធិភាពជាដៃគូ និងការសងរំលស់បំណុល។ ការចំណាយលើការសាងសង់ហេដ្ឋារចនាសម្ព័ន្ធសាធារណៈ ដូចជាផ្លូវថ្នល់ ស្ពាន បណ្តាញខ្សែអគ្គិសនី និងទូរគមនាគមន៍ សុទ្ធតែត្រូវបានចាត់ទុកថា ជាចំណាយមូលធន។

សៀវភៅនេះ ពន្យល់ទៀតថា ចំណូលចរន្ត គឺសំដៅលើចំណូលពន្ធ និងចំណូលមិនមែនពន្ធ។ ចំណូលពន្ធនានា ដែលទទួលបានពីការយកពន្ធលើទំនិញ សេវាកម្ម និងពាណិជ្ជកម្ម មានដូចជាពន្ធលើប្រាប់ចំណូលផ្ទាល់ខ្លួន ពន្ធលើប្រាក់ចំណេញ ពន្ធអាករលើកាស៊ីណូ ពន្ធលើអចលនទ្រព្យ និងពន្ធគយជាដើម។ ចំណូលមិនមែនពន្ធ មានដូចជា ចំណូលពីការជួល និងការលក់អចលនទ្រព្យសាធារណៈ សហគ្រាសសាធារណៈ សម្បទានរ៉ែ ថ្លៃលិខិតឆ្លងដែន ថ្លៃទិដ្ឋាការ និងសេវារដ្ឋបាលជាដើម។ ចំពោះចំណូលមូលធន រួមមាន ចំណូលមូលធនក្នុងប្រទេស ដែលភាគច្រើនបានមកពី វិនិយោគហិរញ្ញវត្ថុ និងចំណូលមូលធនក្រៅប្រទេស ដែលរួមមានមូលនិធិទ្រទ្រង់ថវិកា ប្រាក់កម្ចី និងជំនួយឥតសំណង។

សូមរម្លឹកថា រដ្ឋសភា បានអនុម័តទំហំទឹកប្រាក់ ជាង៤ពាន់លានដុល្លារ សម្រាប់ចំណាយក្នុងឆ្នាំ២០១៦ ៕