ជាតិ
នយោបាយជាតិ
ឯកឧត្តម សម រង្ស៊ី មិនទាន់សម្រេចចិត្តមកកម្ពុជា ខណៈសពម្តាយក្មេកនឹងបូជានៅថ្ងៃស្អែក
× ភ្នំពេញ៖ សពឧបាសិកា ញឹក ជូឡុង មាសកេត សមភ័ត្រ ដែលជាម្តាយបង្កើតរបស់លោកស្រី ជូឡុង សូមូរ៉ា និងជាម្តាយក្មេករបស់ឯកឧត្តម សម រង្ស៊ី នឹងត្រូវបូជានៅថ្ងៃទី២៧ ខែវិច្ឆិកា ឆ្នាំ២០១៦។ តែឯកឧត្តម សម រង្ស៊ី នៅមិនទាន់សម្រេចចិត្តថា វិលមកកម្ពុជា ដើម្បីចូលរួមពិធិបុណ្យសពម្តាយក្មេកនោះទេ។
បើតាមការអះអាងរបស់លោក យឹម សុវណ្ណ អ្នកនាំពាក្យគណបក្សសង្គ្រោះជាតិ សពឧបាសិកា ញឹក ជូឡុង មាសកេត សមភ័ត្រ នឹងត្រូវបូជានៅថ្ងៃអាទិត្យស្អែកនេះឯង។ ខណៈសពម្តាយក្មេកនឹងត្រូវបូជានៅថ្ងៃស្អែក ឯកឧត្តម សម រង្ស៊ី កំពុងតែស្ថិតនៅឯប្រទេសបារាំងឯណោះ ហើយប្រធានបក្សប្រឆាំងរូបនេះ ក៏មិនទាន់ប្រកាសគម្រោងក្នុងការវិលមកកម្ពុជា ដើម្បីចូលរួមពិធីបុណ្យ ដែរ។
ឯកឧត្តម សម រង្ស៊ី បានប្រាប់សារព័ត៌មានថ្មីៗពីប្រទេសបារាំង តាមទូរសព្ទ នៅថ្ងៃទី២៥ វិច្ឆិកាថា ឯកឧត្តម ពិតជាចង់វិលមកកម្ពុជាវិញ ដើម្បីចូលរួមពិធីបុណ្យសពម្តាយក្មេក។ តែឯកឧត្តម សម រង្ស៊ី សូមមិនអត្ថាធិប្បាយអ្វីទាំងអស់ ទាក់ទងនឹងការសុំអន្តរាគមន៍ពីសម្តេច ហ៊ុន សែន នាយករដ្ឋមន្ត្រីកម្ពុជា។
បើទោះបីជាគ្មានចម្លើយពីឯកឧត្តម សម រង្ស៊ី ក៏ពិតមែន តែលោក យឹម សុវណ្ណ ដែលជាអ្នកនៃពាក្យគណបក្សសង្គ្រោះជាតិ បានលើកឡើងកាលពីថ្ងៃសុក្រថា ឯកឧត្តម សម រង្ស៊ី បានផ្ញើលិខិតទៅកាន់សម្តេច ហ៊ុន សែន ដើម្បីសុំអន្តរាគមន៍ ឲ្យបានមកចូលរួមពិធីបុណ្យសពរបស់ឧបាសិកា ញឹក ជូឡុង មាសកេត សមភ័ត្រ។ លោក បញ្ជាក់ដូច្នេះថា៖«ឯកឧត្តមប្រធាន សម រង្ស៊ី បានសរសេរលិខិតទៅសម្តេច ហ៊ុន សែន ឲ្យសម្តេច ជួយអន្តរាគមន៍ឲ្យចូលប្រទេសកម្ពុជា ដើម្បីធ្វើបុណ្យសពម្តាយក្មេក។ តែយ៉ាងណា យើងនៅមិនទាន់បានចម្លើយពីខាងខុទ្ទកាល័យសម្តេចនាយករដ្ឋមន្ត្រីនៅឡើយទេ»។
ចំណែកឯ លោក សុខ ឥសាន អ្នកនាំពាក្យរបស់គណប្រជាជនកម្ពុជា យល់ឃើញថា សំណើសុំអន្តរាគមន៍របស់ឯកឧត្តម សម រង្ស៊ី និងវិធានការផ្លូវច្បាប់ គឺជារឿងពីរផ្សេងពីគ្នា។ បើតាមទស្សនៈរបស់លោក សុខ ឥសាន ឯកឧត្តម សម រង្ស៊ី មិនអាចត្រូវបានអនុញ្ញាតឲ្យរួចផុតពីទោសកំហុសរបស់ខ្លួន ដោយសារតែការយោគយល់នោះទេ។
អ្នកនាំពាក្យបក្សកាន់អំណាចខាងលើ បានបញ្ជាក់ដូច្នេះថា៖«នេះគ្រាន់តែជាការស្នើសុំរបស់គាត់ទេ។ ខ្ញុំយល់ថា យើងមិនអាចយល់ញាតិឃ្លាតច្បាប់បានទេ ព្រោះឯកឧត្តម សម រង្ស៊ី រត់ទៅក្រៅប្រទេសដោយខ្លួនឯង ដោយគាត់ជាប់បណ្ដឹង រងការប្ដឹងដែលត្រូវអនុវត្តទោសតាមច្បាប់របស់តុលាការ។ ហើយយើងកំពុងអនុវត្តច្បាប់ ដើរតាមលទ្ធិប្រជាធិបតេយ្យ ពង្រឹងនិតិរដ្ឋ ដូច្នេះខ្ញុំយល់ថា គ្មានការយល់ញាតិ ឃ្លាតច្បាប់សម្រាប់គាត់ឡើយ»។
ជុំវិញបញ្ហានេះ អ្នកតាមដានស្ថានការណ៍នយោបាយ លោក សូ ចន្ថា បានលើកឡើងថា ឯកឧត្តម សម រង្ស៊ី គួរតែទាក់ទងទៅកាន់សម្តេច ហ៊ុន សែន ដើម្បីសុំអន្តរាគមន៍ ប្រសិនបើខ្លួនពិតជាចង់មកចូលរួមពិធីបុណ្យសពម្តាយក្មេកមែន។ លោក សូ ចន្ថា មានសុទិដ្ឋិនិយមថា ប្រសិនបើសរសេរលិខិតសុំអន្តរាគមន៍មែននោះ ឯកឧត្តម សម រង្ស៊ី អាចនឹងទទួលបានចម្លើយវិជ្ជមានពីសម្តេច ហ៊ុន សែន។
ការវាយតម្លៃបែបនេះ គឺដោយសារតែលោក សូ ចន្ថា មើលឃើញកាយវិការដ៏ល្អ របស់សម្តេច ហ៊ុន សែន ដែលបានផ្ញើលិខិតចូលរួមរំលែកទុក្ខ ទៅកាន់លោកស្រី ជូឡុង សូមូរ៉ា។ អ្នកវិភាគរូបនេះ បញ្ជាក់ដូច្នេះថា៖«ខ្ញុំគិតថា សម្តេច ហ៊ុន សែន គួរតែយោគយល់ ក្នុងនាមជាអ្នកនយោបាយដូចគ្នា»។
ប្រសិនបើ ប្រមុខរដ្ឋាភិបាល ជួយអន្តរាគមន៍តាមវិធានការណាមួយ ដើម្បីសម្របសម្រួលឲ្យឯកឧត្តម សម រង្ស៊ី បានវិលមកចូលរួមពិធីបុណ្យសពម្តាយក្មេក វា គឺជាសញ្ញាណល្អមួយ ដែលបង្ហាញដល់អន្តរជាតិថា អ្នកនយោបាយខ្មែរ ចេះសាមគ្គីគ្នា ពេលមានបញ្ហា។ នេះជាការបន្ថែមរបស់លោក សូច ចន្ថា ដដែល៕
© រក្សាសិទ្ធិដោយ thmeythmey.com