ឧទ្ធរណ៍ កំពុងបើកសវនាការលើសំណុំរឿងរបស់មន្ត្រីអាដហុក និងមន្ត្រីគ.ជ.ប នៅរសៀលនេះ

ជាតិ

ឧទ្ធរណ៍ កំពុងបើកសវនាការលើសំណុំរឿងរបស់មន្ត្រីអាដហុក និងមន្ត្រីគ.ជ.ប នៅរសៀលនេះ

28, Nov 2016 , 3:43 pm

រូបភាព

ដោយ: ថ្មីៗ

ភ្នំពេញ៖ ខណៈនេះ សាលាឧទ្ធរណ៍ កំពុងតែបើកសវនាការ លើសំណុំរឿងរបស់មន្ត្រីអាដហុកទាំង៤រូប និងមន្ត្រីគ.ជ.ប ១រូប ដែលកំពុងតែជាប់ពន្ធនាគារ ដោយសារតែរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ។ ការបើកសវនាការនេះ គឺធ្វើឡើងតាមសំណើរបស់ក្រុមមេធាវី ដែលសុំជំទាស់នឹងសាលាដំបូងរាជធានីភ្នំពេញ ដែលបន្តឃុំខ្លួនមន្ត្រីអាដហុក និងមន្ត្រីគ.ជ.ប ចំនួន៦ខែបន្ថែមទៀត។

ក្រោយទទួលពាក្យបណ្តឹងសុំប្រឆាំងនឹងសេចក្តីសម្រេចរបស់ចៅក្រមស៊ើបសួរនៃសាលាដំបូងរាជធានីភ្នំពេញ ដែលបន្តឃុំខ្លួនមន្ត្រីអាដហុក និងមន្ត្រីគ.ជ.ប ចំនួន៦ខែបន្ថែមទៀត

សាលាឧទ្ធរណ៍ ក៏បានបើសវនាការ នៅរសៀលថ្ងៃទី២៨ ខែវិច្ឆិកា ឆ្នាំ២០១៦នេះ។ ខណៈនេះ មន្ត្រីអាដហុក និងមន្ត្រីគ.ជ.ប កំពុងតែស្ថិតក្នុងបន្ទប់សវនាការនៃសាលាឧទ្ធរណ៍។

ការដាក់បណ្តឹងទៅកាន់សាលាឧទ្ធរណ៍នេះ គឺដោយសារតែក្រុមមេធាវី មិនសុខចិត្តចំពោះសាលាដំបូងរាជធានីភ្នំពេញ ដែលសម្រេចឃុំខ្លួនមន្ត្រីអាដហុក និងមន្ត្រីគ.ជ.ប ចំនួន៦ខែបន្ថែមទៀត។ នេះបើតាមការលើកឡើងកន្លងមក របស់លោក សំ សុគង់ មេធាវី១រូប ក្នុងចំណោមមេធាវីទាំង៥រូប ដែលរួមគ្នាការពារក្តីឲ្យមន្ត្រីអាដហុក និងមន្ត្រីគ.ជ.ប។

លោក សំ សុគង់ ធ្លាប់ប្រាប់សារព័ត៌មានថ្មីៗថា តុលាការ អាចឃុំខ្លួនបុគ្គលណាមួយបានតែ៦ខែប៉ុណ្ណោះ ក្នុងដំណាក់កាលនៃការស៊ើបអង្កេតនិងការស៊ើបសួរ។ លោកបន្ថែមថា បុគ្គលនោះ អាចនឹងត្រូវបានឃុំខ្លួនចំនួន៦ខែទៀត ប្រសិនបើតុលាការ យល់ថាការស៊ើបអង្កេតឬការស៊ើបសួរ មិនទាន់គ្រប់គ្រាន់។

ប៉ុន្តែ លោក សំ សុគង់ សង្កត់ធ្ងន់ថា តុលាការ គប្បីមានហេតុផលឲ្យបានច្បាស់លាស់និងត្រឹមត្រូវ មុននឹងបន្តនីតិវិធីរបស់ខ្លួនបែបនេះ។ យ៉ាងណាក៏ដោយ លោក សំ សុគង់ រួមទាំងមេធាវីផ្សេងទៀត ដែលការពារក្តីឲ្យមន្ត្រីអាដហុកទាំងបួនរូប មិនអាចទទួលយកបានទេចំពោះហេតុផលរបស់សាលាដំបូងរាជធានីភ្នំពេញ ក្នុងការបន្តឃុំខ្លួនកូនក្តីរបស់ពួកគេ។

លោក សំ សុគង់ បញ្ជាក់ថា វា ជាការប៉ះពាល់ដល់សិទ្ធិរបស់មន្ត្រីអាដហុក និងមន្ត្រីគ.ជ.ប ប្រសិនបើតុលាការបន្តឃុំខ្លួនពួកគេមែននោះ។ លោកមេធាវីនេះ លើកហេតុផលថា សំណុំរឿងរបស់អ្នកទាំង៥ខាងលើ មិនមែនជាបទឧក្រិដ្ឋនោះទេ ហើយក៏មិនមានភាពស្មុគស្មាញអ្វីច្រើន ដែលត្រូវបន្តឃុំខ្លួនពួកគេដែរ។

លោក សំ សុគង់ ស្នើឲ្យសាលាដំបូងរាជធានីភ្នំពេញ ដោះលែងអ្នកទាំងប្រាំ។ លោកមេធាវី យល់ថា ចៅក្រមស៊ើបសួរ គួរតែបញ្ជូនសំណុំរឿងរបស់អ្នកទាំងប្រាំទៅជំនុំជម្រះ ប្រសិនបើមិនព្រមដោះលែង។

សូមរម្លឹកថា មន្ត្រីជាន់ខ្ពស់នៃសមាគមអាដហុកបួនរូប គឺលោក នី សុខា, លោក ណៃ វង់ដា, លោក យី សុខសាន្ត និងលោកស្រី លឹម មុន្នី រួមទាំងលោក នី ចរិយា អគ្គលេខាធិការរងរបស់គ.ជ.ប ត្រូវបានសាលាដំបូងរាជធានីភ្នំពេញ បញ្ជូនទៅឃុំខ្លួនបណ្តោះអាសន្ន នៅថ្ងៃទី២ ខែឧសភា ឆ្នាំ២០១៦។ រហូតមកដល់ពេលនេះ ពួកគេទាំង៥រូប ជាប់ឃុំជិត៦ខែហើយ។

បើតាមការចោទប្រកាន់ពីសំណាក់តុលាការ អ្នកទាំងនោះ សុទ្ធតែជាប់ពាក់ព័ន្ធនឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានគណបក្សសង្គ្រោះជាតិ។ ក្រោយមក តុលាការ បានចោទមន្ត្រីអាដហុកពីបទ «សូកប៉ាន់សាក្សី» ហើយមន្ត្រីគ.ជ.ប រងបទចោទ «សមគំនិតក្នុងអំពើសូកបាន់សាក្សី»៕