ប្រជាជនហ្កំប៊ីបានសម្រេចបោះឆ្នោតទម្លាក់មេដឹកនាំផ្តាច់ការ Yahya Jammeh នៅក្នុងការបោះឆ្នោតប្រធានាធិបតីថ្ងៃសុក្រទី ២ ខែធ្នូនេះ។ មេដឹកនាំរូបនេះសុខចិត្តប្រកាសទទួលស្គាល់លទ្ធផលនៅតាមវិទ្យុ ដោយអះអាងថាលោកគោរពឆន្ទៈរបស់ប្រជាជនហ្កំប៊ីទូទៅដែលចង់ឲ្យលោកចេញ។
មេដឹកនាំផ្តាច់ការរដ្ឋអាហ្វ្រិកមួយទៀតគឺលោក Yahya Jammehប្រធានាធិបតីហ្កំប៊ី ជ្រុះបាត់តំណែងហើយ ក្រោយការបោះឆ្នោតប្រធានាធិបតីនៅថ្ងៃព្រហស្បតិ៍ម្សិលមិញនេះ។ អ្នកជំនួញ និងជាអតីតសន្តិសុខ Adama Barrow ដែលមានបទពិសោធន៍នយោបាយបន្តិចបន្តួចនោះនឹងជំនួសតំណែងមេដឹកនាំផ្តាច់ការនេះ។
យោងតាមទីភ្នាក់ងារព័ត៌មាន AFP មេដឹកនាំដែលកាន់តំណែងអស់ជាង ២ទសវត្សរ៍នេះ ក៏បានចេញមុខទទួលស្គាល់បរាជ័យរបស់ខ្លួននៅតាមវិទ្យុរដ្ឋ ដោយលោកអះអាងថា លោកទទួលយកការសម្រេចចិត្តរបស់ប្រជាជនហ្កំប៊ីដែលចង់ឲ្យលោកចាកចេញពីតំណែង។ លោកបញ្ជាក់ថា លោកមិនតវ៉ារឿងលទ្ធផលទេ ហើយលោកនឹងចាកចេញទៅរស់នៅចម្ការសាងជីវភាពថ្មីវិញ ក្រោយផ្ទេរអំណាចខែមករាខាងមុខនេះ។
គេមិនដឹងច្បាស់ថាមេដឹកនាំរូបនេះនឹងរងការចោទប្រកាន់ជុំវិញការបំពារបំពានសិទ្ធិមនុស្សមនុស្សធ្ងន់ធ្ងរកន្លងមកឬអត់ ក្រោយលោកចេញពីតំណែង។ កាលពីខែមុនលោក លោកបានសម្រេចដកសមាជិកភាពហ្កំប៊ីចេញពីតុលាការព្រហ្មទណ្ឌអន្តរជាតិផងដែរ ដោយលោកចោទប្រកាន់ថា តុលាការនេះជាតុលាការចក្រពត្តិ។
តាមពិតទៅមុនលោកចេញមុខទទួលស្គាល់បរាជ័យ ប្រធានគណៈកម្មការបោះឆ្នោតហ្កំប៊ីបានប្រកាសប្រាប់អ្នកសារព័ត៌មានភ្លាមៗក្រោយបោះឆ្នោតចប់ថា ប្រធានាធិបតី Yahya Jammeh ព្រមទទួលស្គាល់លទ្ធផលបោះឆ្នោតនិងព្រមប្រកាសផ្ទេរអំណាចដែរ។
បើតាមគណៈកម្មការរៀបចំការបោះឆ្នោត លោក Jammeh ទទួលបានបានសំឡេងគាំទ្រត្រឹម ៣៦,៦៦ភាគរយប៉ុណ្ណោះ ខណៈលោក Adama Barrow ទទួលបានសំឡេងគាំទ្ររហូតដល់ ៤៥,៥៤ភាគរយ។ ចំណែកបេក្ខជនលេខរៀងទី ៣ គឺលោក Mama Kandeh ដែលលោកបានទទួលសំឡេងគាំទ្រ១៧,៨០ ភាគរយប៉ុណ្ណោះ។
តាមពិតទៅលោក Yahya Jammeh ត្រូវបានគេស្គាល់ថា ជាមេដឹកនាំម្នាក់ដែលស្ថិតក្នុងចំណោមមេដឹកនាំផ្តាច់ការដែលកាន់តំណែងយូរបំផុតនៅអាហ្វ្រិក។ លោកបានកាន់អំណាចអស់រយៈពេល ២២ ឆ្នាំ ហើយលោកបានក្តោបក្តាប់តំណែងតាមរយៈរដ្ឋប្រហារយោធាកន្លងមក។
ក្រោមការដឹកនាំរបស់លោក Jammeh ប្រជាជនហ្កំប៊ីស្ថិតក្រោមការរឹតត្បិតសិទ្ធិសេរីភាព ហើយរដ្ឋាភិបាលបន្តសង្កត់សង្កិនធ្វើទុក្ខបុកម្នេញលើក្រុមប្រឆាំង និងអ្នកស្រឡាញ់ភេទដូចគ្នាជាដើម។ ក្រៅពីល្បីល្បាញខាងរំលោភសិទ្ធិមនុស្ស មេដឹកនាំរូបនេះតាំងខ្លួនជាអ្នកព្យាបាលជំងឺអេដស៍ដោយប្រើប្រាស់ឱសថបុរាណផ្សំជាមួយផ្លែចេកជាដើម។ ហើយលោក Jammeh ធ្លាប់ប្រកាសថា លោកនឹងដឹកនាំប្រទេស ១ ពាន់លានឆ្នាំផងដែរ។
ដូច្នេះហើយ បរាជ័យរបស់លោក ជាសញ្ញាវិជ្ជមានមួយសម្រាប់ប្រទេសហ្កំប៊ី និងត្រួសត្រាយផ្លូវសម្រាប់ការលូតលាស់នៃលទ្ធិប្រជាធិបតេយ្យនៅក្នុងប្រទេសនេះដែរ។
សូមបញ្ជាក់ថា ហ្កំប៊ីជារដ្ឋតូចមួយនៅអាហ្វ្រិកខាងលិច ដោយមានប្រជាជនសរុប ១,៨លាននាក់។ ហ្កំប៊ីជាប្រទេសក្រីក្របំផុតមួយ ហើយសេដ្ឋកិច្ចប្រទេសនេះត្រដាបត្រដួស ដោយសាររដ្ឋាភិបាលគ្មានចំណាត់ការនិងគោលនយោបាយសេដ្ឋកិច្ចត្រឹមត្រូវ៕