អន្តរជាតិ
អឺរ៉ុបធូរទ្រូង ក្រោយអ្នកនយោបាយគាំទ្រសហភាពអឺរ៉ុបជាប់ឆ្នោតនៅអូទ្រីស
× ប្រជាជនអូទ្រីសបានសម្រេចជ្រើសរើសអ្នកគាំទ្រសហភាពអឺរ៉ុបលោក Alexander Van der Bell ជាប្រធានាធិបតី ដោយបដិសេធអ្នកនយោបាយស្តាំនិយមជ្រុលលោក Norbert Hofer ក្នុងការបោះឆ្នោតចុងសប្តាហ៍។ ព័ត៌មាននេះ វាដូចជាការដកបន្លាចេញពីដើមទ្រូងមេដឹកនាំសហភាពអឺរ៉ុបដូច្នេះដែរ។
បន្ទាប់ពីការបោះឆ្នោតចាកចេញពីសហភាពអឺរ៉ុបរបស់ចក្រភពអង់គ្លេស រឿងដែលក្រពុលមុខមួយទៀតរបស់សហភាពអឺរ៉ុបគឺការបោះឆ្នោតប្រធានាធិបតីអូទ្រីសព្រោះអ្នកនយោបាយស្តាំនិយមជ្រុលដែលមាននិន្នាការប្រឆាំងសហភាពអឺរ៉ុប Norbert Hofer ឈរឈ្មោះជាប្រធានាធិបតីតំណាងឲ្យបក្សសេរីភាពដែរ។ ប៉ុន្តែគ្រប់យ៉ាងត្រឡប់មករកភាពល្អប្រសើរ ហើយសហភាពអឺរ៉ុបហាក់ធូរទ្រូងបន្តិចដែរ ព្រោះអ្នកនយោបាយខាងលើមិនជាប់ឆ្នោតឡើយ។
យោងតាមទីភ្នាក់ងារព័ត៌មាន Reuters លទ្ធផលបោះឆ្នោតថ្ងៃអាទិត្យម្សិលមិញបង្ហាញ ប្រជាជនអូទ្រីសសម្រចជ្រើសរើសអ្នកនយោបាយឯករាជ្យនិងមាននិន្នាការគាំទ្រសហភាពអឺរ៉ុបលោក Alexander Van der Bellen ឲ្យធ្វើឲ្យជាប្រធានាធិបតី។
ក្រោយគូប្រជែងនយោបាយប្រកាសទទួលស្គាល់បរាជ័យខ្លួន លោក Alexander Van der Bellen បានហៅលទ្ធផលបោះឆ្នោតនេះថាជាការបោះឆ្នោតជ្រើសរើសយកការគាំទ្រសហភាពអឺរ៉ុបដែលឈរលើសេរីភាព,សមភាព និង សាមគ្គីភាព។ លោកបន្តថា៖ «ពីដើមមកខ្ញុំតស៊ូនិងការពារនិន្នាការគាំទ្រអូទ្រីសនៅក្នុងសហភាពអឺរ៉ុប»។
ក្នុងពេលឃោសនាបោះឆ្នោតអ្នកនយោបាយរូបនេះមាននិន្នាការគាំទ្រសហភាពអឺរ៉ុបនិងការបើកចំហក្នុងការបង្កើតទំនាក់ទំនងពាណិជ្ជកម្ម។ ហើយលោកអះអាងថា ការបន្តនៅជាសមាជិកសហភាពអឺរ៉ុបរបស់ប្រទេសអូទ្រីសនឹងជួយឲ្យសេដ្ឋកិច្ចសហភាពអឺរ៉ុបរីកចម្រើន។
លោក Alexander Van der Bellen មានវ័យ ៧២ឆ្នាំ ហើយលោកជាជនអន្តោប្រវេសន៍ប៉ុណ្ណោះ ព្រោះលោកមានឪពុកជាជនជាតិរុស្ស៊ី និងម្តាយជាជនជាតិអេស្តូនី ដែលបានរត់ភៀសខ្លួនពីសហភាពសូវៀតទៅរស់នៅអាល្លឺម៉ង់ និងបន្តទៅតាំងទីលំនៅនៅអូទ្រីស។
តាមពិតទៅ ការបោះឆ្នោតលើកទីមួយ កាលពីខែឧសភាមិនយកជាការឡើយដោយសារវាមានបញ្ហាក្នុងពេលរាប់សន្លឹកឆ្នោត។ ដូច្នេះហើយទើបបានជាគេត្រូវរៀបចំការបោះឆ្នោតជាលើកទីពីរនៅថ្ងៃទី ៤ ធ្នូនេះ។
មេដឹកនាំអឺរ៉ុបសាទរការបោះឆ្នោតរើសអ្នកនយោបាយគាំទ្រសហភាពអឺរ៉ុប
ដូចបានបញ្ជាក់ខាងដើមស្រាប់ ការបោះឆ្នោតរើសលោក Alexander Van der Bellen ជាដំណឹងល្អបំផុតមួយសម្រាប់មេដឹកនាំអឺរុប ក្រោយក្រពុលមុខអស់រាប់ខែដោយសារប្រជាមិតនៅអង់គ្លេស។ ក្រោយការបោះឆ្នោត មេដឹកនាំសហភាពអឺរ៉ុបនាំគ្នាសាទរនិងស្វាគមន៍លទ្ធផល ហើយចាត់ទុកវាជាជោគជ័យមួយសម្រាប់សហភាពអឺរ៉ុបនិងការបន្តបើកចំហនិងសេរីភាវូបនីយកម្មតំបន់។
ប្រធានក្រុមប្រឹក្សាអឺរ៉ុបលោក Donald Tusk បានអបអរសាទរអស់ពីបេះដូងចំពោះលទ្ធផល ហើយអធិបការបតីរងអាល្លឺម៉ង់ Sigmar Gabriel បានហៅលទ្ធផលឆ្នោតនេះថាជាជ័យជម្នះមួយដែលប្រឆាំងនិន្នាការស្តាំនិយមជ្រុលនិងប្រជានយោបាយ (Populism)។
ចំណែកប្រធានាធិបតីបារាំងលោក ហ្វ្រង់ស្វ័រ ហូឡង់ បានថ្លែងអំណរគុណដល់ប្រជាជនអូទ្រីសដែលនាំគ្នាជ្រើសរើសការរួមរស់ជាមួយសហភាពអឺរ៉ុបផងដែរ៕
Tag:
Alexander Van der Bell
Norbert Hofer
អូទ្រីស
© រក្សាសិទ្ធិដោយ thmeythmey.com