មីយ៉ាន់ម៉ា អន់ចិត្ត និងចោទបាតុកម្មដឹកនាំដោយនាយករដ្ឋមន្ត្រីម៉ាឡេស៊ីរឿងរ៉ូហ៊ីងយ៉ាថា«ដើម្បីបម្រើប្រយោជន៍ក្នុងស្រុកខ្លួន»ប៉ុណ្ណោះ

អន្តរជាតិ

មីយ៉ាន់ម៉ា អន់ចិត្ត និងចោទបាតុកម្មដឹកនាំដោយនាយករដ្ឋមន្ត្រីម៉ាឡេស៊ីរឿងរ៉ូហ៊ីងយ៉ាថា«ដើម្បីបម្រើប្រយោជន៍ក្នុងស្រុកខ្លួន»ប៉ុណ្ណោះ

05, Dec 2016 , 5:26 pm

រូបភាព

ទីប្រឹក្សារដ្ឋ និងជារដ្ឋមន្ត្រីការិយាល័យប្រធានាធិបតីមីយ៉ាន់ម៉ា លោកស្រី អ៊ុងសាន ស៊ូជី

ដោយ:

រដ្ឋាភិបាលណៃពិដោរ បានសម្តែងការមិនសប្បាយចិត្តជាមួយនឹងរដ្ឋាភិបាលក្រុងកូរឡាឡាំពួរដែលបានដឹកនាំការប្រមូលផ្តុំទ្រង់ទ្រាយធំមួយនៅកូរឡាឡាំពួរប្រឆាំងមីយ៉ាន់ម៉ារឿងរ៉ូហ៊ីងយ៉ា។ ក្រុងណៃពិដោរ ចោទសកម្មភាពរបស់នាយករដ្ឋមន្ត្រីម៉ាឡេស៊ីថាជាសកម្មភាពជ្រៀតជ្រែកផ្ទៃក្នុងរបស់មីយ៉ាន់ម៉ា និងធ្វើដើម្បីផលប្រយោជន៍នយោបាយក្នុងស្រុករបស់ខ្លួនប៉ុណ្ណោះ។

អ្នកនាំពាក្យការិយាល័យប្រធានាធិបតីមីយ៉ាន់ម៉ា លោក Zaw Htay នៅថ្ងៃទី០៥ ខែធ្នូនេះ បានចេញសេចក្តីថ្លែងការណ៍មួយថ្មីបន្ថែមទៀត ដោយបានអះអាង លោក ពិតជាខកចិត្តជាខ្លាំងទៅលើឥរិយាបថរបស់នាយករដ្ឋមន្ត្រីម៉ាឡេស៊ីលោក ណាជីប រ៉ាហ្សាក់ ក្នុងការដឹកនាំការប្រមូលផ្តុំប្រឆាំងនឹងការធ្វើទុក្ខបុកម្នេញទៅលើជនជាតិរ៉ូហ៊ីងយ៉ា និងការរិះគន់មកលើរដ្ឋាភិបាលមីយ៉ាន់ម៉ាខ្លាំងៗទៀតនោះ។ នេះបើយោងតាមការចុះផ្សាយរបស់សារព័ត៌មានមីយ៉ាន់ម៉ា The Irrawaddy ។

អ្នកនាំពាក្យរូបនោះ បានសង្កត់ធ្ងន់យ៉ាងដូច្នេះថា៖« យើងពិតជាខកចិត្តជាខ្លាំងចំពោះសកម្មភាពរបស់លោក។ វា ហាក់ដូចជា លោក កំពុងតែប្រើប្រាស់សាសនាដើម្បីធ្វើជាឈ្នាន់ក្នុងការគេងចំណេញការគាំទ្រនយោបាយសម្រាប់ការបោះឆ្នោតនាពេលខាងមុខរបស់លោកនោះទេ។» នេះបើយោងតាមប្រភពព័ត៌មានដដែលនោះ ដែលបានដកស្រង់សម្តីអ្នកនាំពាក្យរូបនោះដែលបន្ថែមទៀតយ៉ាងដូច្នេះថា៖« ម៉ាឡេស៊ី និងមីយ៉ាន់ម៉ា មានទំនាក់ទំនងល្អនឹងគ្នា តែ ជំនួសដោយការមិនសួរនាំបញ្ហាតាមរយៈភាសាការទូត លោកនាយករដ្ឋមន្ត្រី បែរជាទៅដឹកនាំបាតុកម្មទៅវិញ។ នេះ គឺជារឿងដែលគួរឲ្យខកចិត្តណាស់។»

ជាងនេះទៅទៀតនោះ លោកអ្នកនាំពាក្យថែមទាំង អះអាងទៀតថា ឥរិយាបថរបស់លោកនាយករដ្ឋមន្ត្រី ប៉ះពាល់មិនត្រឹមតែមីយ៉ាន់ម៉ាប៉ុណ្ណោះនោះទេ តែ ប៉ះពាល់ដល់តំបន់អាស៊ានទាំងស្រុងតែម្តង។ ការបះពាល់ដល់អាស៊ាននោះគឺ អាស៊ាន បានកំណត់រួចទៅហើយនៅក្នុងធម្មនុញ្ញរបស់ខ្លួន ដោយ មិនអនុញ្ញាតឲ្យរដ្ឋសមាជិកណាមួយជ្រៀតជ្រែកកិច្ចការផ្ទៃក្នុងនៃរដ្ឋសមាជិកផ្សេងទៀតបានឡើយ។

សូមជម្រាបផងដែរថា នៅថ្ងៃទី០៤ ខែធ្នូម្សិលមិញ លោកនាយករដ្ឋមន្ត្រី ណាជីប រ៉ាហ្សាក់ បានដឹកនាំបាតុកម្ម និងប្រមូលដែលមានការចូលរួមពីប្រជាជនម៉ាឡេស៊ីប្រមាណ ៥០០០នាក់ នៅក្នុងកូឡាឡាំពួរ។ នៅក្នុងចំណោមការប្រមូលផ្តុំដ៏ធំនោះ លោកនាយករដ្ឋមន្ត្រី បានលើកឡើងថា មីយ៉ាន់ម៉ា ត្រូវតែបញ្ឈប់ការបង្ក្រាបបង្ហូរឈាមនោះ។

លោក ថែមទាំងប្រើពាក្យវាយប្រហារខ្លាំងទៅកាន់លោកស្រី អ៊ុងសាន ស៊ូជី ដោយលោក ចោទយ៉ាងដូច្នេះថា៖«តើអ៊ុងសាន ស៊ូជី ប្រើងារពានរង្វាន់ណូប៊ែលដើម្បីធ្វើអ្វីខ្លះ? យើងត្រូវតែ និងការពារប្រជាជនម៉ូស្លីម និងសាសនាឥស្លាម»។ លោក ក៏ទទូចឲ្យអង្គការសហប្រជាជាតិចេញវិធានការដោយមិនត្រឹមតែអង្គុយមើល «អំពើប្រល័យពូជសាសន៍»កើតឡើងឡើយ៕