អន្តរជាតិ
នាយករដ្ឋមន្ត្រីអ៊ីតាលីអស់តំណែង ដោយចាញ់ការបោះឆ្នោតប្រជាមតិកែរដ្ឋធម្មនុញ្ញ
× នាយករដ្ឋមន្ត្រីអ៊ីតាលីចុះចេញពីតំណែងក្រោយលោកទទួលបរាជ័យក្នុងការបើឆ្នោតប្រជាមតិ ដែលជំរុញឲ្យមានការ កែប្រែរដ្ឋធម្មនុញ្ញដើម្បីបន្ថយអំណាចព្រឹទ្ធសភា។ ការចាកចេញរបស់នាយករដ្ឋមន្ត្រីរូបនេះនឹងធ្វើឲ្យអ៊ីតាលីហាក់ធ្លាក់ខ្លួនចូលក្នុងស្ថានភាពមិនច្បាស់លាស់ផ្នែកនយោបាយ និងសេដ្ឋកិច្ច។
សូមស្ដាប់ព័ត៌មានលម្អិត៖
លោក Matteo Renzi បានប្រកាសថា លោកនឹងចុះចេញពីតំណែងក្នុងពេលឆាប់ៗនេះ ក្រោយពេលដែលចលនាគាំទ្រការកែប្រែរដ្ឋធម្មនុញ្ញរបស់លោកបរាជ័យក្នុងការបោះឆ្នោតប្រជាមតិចុងសប្តាហ៍នេះ។
ថ្លែងសុន្ទរកថានៅពីមុខទង់ជាតិអ៊ីតាលី និងទង់ជាតិសហភាពអឺរ៉ុប នាយករដ្ឋមន្ត្រី Matteo Renzi បានបញ្ជាក់ថា៖« បទពិសោធន៍ខ្ញុំក្នុងរដ្ឋាភិបាលបញ្ចប់ត្រឹមថ្ងៃនេះ។ ខ្ញុំទទួលយករាល់ការទទួលខុសត្រូវទាំងអស់ចំពោះការបរាជ័យនេះ»។ លោកទទួលស្គាល់ថា ចលនាមិនគាំទ្រការកែរដ្ឋធម្មនុញ្ញ ទទួលជ័យជម្នះហើយ។
លោក Matteo Renzi ក៏បានប្រាប់ផងដែរថា លោកនឹងទៅជួបប្រធានាធិបតីអ៊ីតាលី Sergio Mattarella ដើម្បីប្រគល់លិខិតលាលែងពីតំណែងផងដែរ។
យ៉ាងណាក៏ដោយ ការដកខ្លួនរបស់លោក Matteo Renzi នឹងជះឥទ្ធិពលអាក្រក់លើនយោបាយនិងសេដ្ឋកិច្ចអ៊ីតាលីដែរ។ ហើយក្រោយលោកចាកចេញ រដ្ឋាភិបាលចាំផ្ទះមួយដែលដឹកនាំដោយគណបក្សប្រជាធិបតេយ្យនឹងគ្រប់គ្រងប្រទេសជំនួស ទម្រាំដល់ការបោះឆ្នោតមកដល់ឆ្នាំ ២០១៨ នោះ។ គេមើលឃើញថា រដ្ឋមន្ត្រីក្រសួងហិរញ្ញវត្ថុ Pier Carlo Padoan ជាអ្នកនយោបាយមួយរូបដែលអាចនឹងជំនួសតំណែងលោក Matteo Renzi ដើម្បីធ្វើជាប្រធានគណៈរដ្ឋមន្ត្រី។
-វិសោធនកម្មរដ្ឋធម្មនុញ្ញផ្តោតលើអ្វីឲ្យប្រាកដ?
ប្រជាមតិផ្តោតលើការកែប្រែរដ្ឋធម្មនុញ្ញនេះគឺមានគោលដៅសំខាន់បន្ថយអំណាចព្រឹទ្ធសភា ដោយរាល់ច្បាប់ដែលស្នើឡើងមិនចាំបាច់ការអនុញ្ញាតពីព្រឹទ្ធសភាឡើយ។ វាប្រឆាំងនឹងបទបញ្ញត្តិបច្ចុប្បន្នដែលតម្រូវឲ្យសភាទាំងពីរយល់ព្រមជាមុនសិននោះ។ ហើយវាក៏មានគោលបំណងបន្ថយចំនួនសមាជិកព្រឹទ្ធសភាដែលឡើងតាមការបោះឆ្នោតដោយផ្ទាល់ ៣១៥ នាក់និង សមាជិកព្រឹទ្ធសភាមួយជីវិត៥នាក់ផ្សេងទៀត មកត្រឹម ១០០នាក់ប៉ុណ្ណោះ។
នាយករដ្ឋមន្ត្រីអ៊ីតាលីលោក Matteo Renzi រៀបចំយុទ្ធនាការដឹកនាំចលនាគាំទ្រការកែប្រែរដ្ឋធម្មនុញ្ញនេះ ខណៈដែល អ្នកកំប្លែង Beppe Grillo ដឹកនាំចលនា«ផ្កាយប្រាំ»ដែលមាននិន្នាប្រឆាំងចេតនាធ្វើវិសោធនកម្មរដ្ឋធម្មនុញ្ញនេះ។ លោក Renzi ហ៊ានយកតំណែងលោកមកភ្នាល់ថែមទៀតផង បើសិនជាយុទ្ធនាការរបស់លោកចាញ់ក្នុងការបោះឆ្នោតប្រជាមតិនោះ។
បើយោងតាមលទ្ធផលបោះឆ្នោតប្រជាមតិនៅថ្ងៃអាទិត្យម្សិលមិញនេះ ចលនាផ្កាយប្រាំ បានទទួលសំឡេងគាំទ្រ៥៩,៥ភាគរយឯណោះ ដែលវាច្រើនជាងចលនាគាំទ្រការកែប្រែ។ ដូច្នេះហើយបានជាលោក Matteo Renzi ត្រូវចាកចេញពីតំណែងដូច្នេះ៕
Tag:
Matteo Renzi
Sergio Mattarella
Beppe Grillo
© រក្សាសិទ្ធិដោយ thmeythmey.com