អន្តរជាតិ
UN ដង្ហោយរកជំនួយមនុស្សធម៌ ២២,២ពាន់លានដុល្លារដើម្បីជួយប្រជាជនពិភពលោក
× អង្គការសហប្រជាជាតិបានអំពាវនាវរកជំនួយ២២,២ពាន់លានដុល្លារ ពីបណ្តាប្រទេសទាំងអស់ទូទាំងពិភពលោកដើម្បីជួយបណ្តាប្រទេសដែលរងគ្រោះដោយសារជម្លោះប្រដាប់អាវុធនិងគ្រោះមហន្តរាយនៅឆ្នាំក្រោយនេះ។
ឆ្នាំ ២០១៧ អង្គការសហប្រជាជាតិត្រូវការលុយជំនួយ ២២,២ ពាន់លានដុល្លារឯណោះដើម្បជួយដល់បណ្តាប្រជាជនដែលរងគ្រោះដោយសារជម្លោះប្រដាប់អាវុធនិងគ្រោះមហន្តរាយនៅទូទាំងពិភពលោក។ នេះជាការបញ្ជាក់របស់ប្រធានទទួលបន្ទុកកិច្ចការមនុស្សធម៌របស់អង្គការសហប្រជាជាតិ Stephen O'Brien ដែលស្រង់សម្តីដោយទីភ្នាក់ងារព័ត៌មាន AFP។
លោក Stephen O'Brien បានបញ្ជាក់ថា៖« ជំនួយមនុស្សធម៌កាន់តែសំខាន់ខ្លាំង។ មនុស្សកាន់តែច្រើនត្រូវការជំនួយមនុស្សធម៌នេះ។ វាមិនតិចជាងមុនទេព្រោះតែគ្រោះមហន្តរាយកាន់អូសបន្លាយពេលវេលាកាន់តែយូរ»។
លោក Stephen O'Brien បានរម្លឹកផងដែរថា កាលពីចុងឆ្នាំ២០១៥ អង្គការ មនុស្សធម៌អន្តរជាតិត្រូវការជំនួយដែលមានទំហំសរុប២០,១ពាន់លានដុល្លារ ហើយជំនួយនោះបានជួយសង្គ្រោះនិងការពារ និងគាំទ្រប្រជាជនច្រើនជាងពេលណាទាំងអស់ក្នុងប្រវត្តិសាស្ត្ររាប់ចាប់ពីពេលអង្គការសហប្រជាជាតិត្រូវបានបង្កើតឡើងមក។ សម្រាប់ឆ្នាំ ២០១៧ នេះ ទំហំជំនួយដែលគេត្រូវការកើនឡើងដល់ ២២, ២ពាន់លានដុល្លារ ប៉ុន្តែគេទើបទទួលបានកញ្ចប់ជំនួយត្រឹម ១១,៤ពាន់លានដុល្លារប៉ុណ្ណោះសម្រាប់ឆ្នាំក្រោយ។
ក្រៅពីនេះ មន្ត្រីជាន់ខ្ពស់អង្គការសហប្រជាជាតិរូបនេះ បានបន្តថា ភ្នាក់ងារអង្គការសហប្រជាជាតិ និងបណ្តាអង្គការមនុស្សធម៌អន្តរជាតិមានគោលដៅរកជំនួយឲ្យបានគ្រប់គ្រាន់ដើម្បីជួយដល់ប្រជាជនដែលរងគ្រោះខ្លាំងក្នុងចំណោមប្រជាជនទាំងអស់ជិត ១២៩ លាននាក់ដែលត្រូវការជំនួយនៅប្រទេសទាំងអស់ ៣៣ នៅឆ្នាំក្រោយ។
នៅលើពិភពលោកបច្ចុប្បន្ន ចំនួនជម្លោះប្រដាប់អាវុធកើនឡើងកាន់តែច្រើន ហើយវាកាន់តែធ្ងន់ធ្ងរថែមទៀត។ ជម្លោះធ្ងន់ធ្ងរជាងគេនៅលើពិភពលោកមានដូចជាស៊ីរី,យេម៉ែ និងអាហ្វហ្កានីស្ថាន ដែលវាតម្រូវឲ្យមានការផ្តល់ជំនួយច្រើនជាងគេបំផុត។ ក្រៅពីជម្លោះប្រដាប់អាវុធ បញ្ហាប្រែប្រួលអាកាសធាតុ និងបញ្ហាគ្រោះមហន្តរាយធម្មជាតិផ្សេងទៀត ក្លាយជាគ្រោះថ្នាក់ធំសម្រាប់ប្រជាជនលើពិភពលោកផងដែរ៕
Tag:
Stephen O\'Brien
UN
ជំនួយមនុស្សធម៌
© រក្សាសិទ្ធិដោយ thmeythmey.com