កិច្ចព្រមព្រៀងពាណិជ្ជកម្មដឹកនាំដោយចិន កំពុងត្រូវបានជជែក ខណៈកិច្ចព្រមព្រៀងដឹកដោយអាមេរិក ហៀបនឹងរលត់

អន្តរជាតិ

កិច្ចព្រមព្រៀងពាណិជ្ជកម្មដឹកនាំដោយចិន កំពុងត្រូវបានជជែក ខណៈកិច្ចព្រមព្រៀងដឹកដោយអាមេរិក ហៀបនឹងរលត់

06, Dec 2016 , 4:37 pm

រូបភាព

ដោយ:

មន្ត្រីពាណិជ្ជកម្មជាន់ខ្ពស់មកពីប្រទេសអាស៊ីប៉ាស៊ីហ្វិកចំនួន១៦ នៅថ្ងៃទី០៦ ខែធ្នូនេះ បានចាប់ផ្តើមកិច្ចពិភាក្សាតុមូលលើកទី១៦ដើម្បីជជែកពីសំណើនៃកិច្ចព្រមព្រៀងពាណិជ្ជកម្ម «ភាពជាដៃគូសេដ្ឋកិច្ចក្នុងតំបន់គ្រប់ជ្រុងជ្រោយ (RCEP)» នៅក្នុងក្រុងហ្សាតារការនៃប្រទេសឥណ្ឌូនេស៊ី។ កិច្ចពិភាក្សានេះ ធ្វើឡើងស្របពេលកិច្ចព្រមព្រៀងពាណិជ្ជកម្មក្នុងតំបន់អាស៊ីប៉ាហ្វិកមួយផ្សេងទៀតដែលដឹកនាំដោយអាមេរិកកំពុងតែស្ថិតនៅក្នុងភាពមិនប្រាកដប្រជា។

ប្រធានគណៈកម្មាធិការចរចាពាណិជ្ជកម្មនៃកិច្ចព្រមព្រៀងភាពជាដៃគូសេដ្ឋកិច្ចក្នុងតំបន់គ្រប់ជ្រុងជ្រោយ លោក Iman Pambagyo បានអះអាងថា កិច្ចការធំបំផុតដែលកំពុងស្ថិតនៅក្នុងដំណើរការចរចារវាងបណ្តាមន្ត្រីសមាជិក RCEP ដែលត្រូវផ្តើមពីថ្ងៃទី០៦ដល់ថ្ងៃទី០៩ ខែធ្នូក្នុងក្រុងហ្សាការតានេះ គឺដើម្បីស្វែងរក«តុល្យភាពមួយពិតប្រាកដ»រវាងផលប្រយោជន៍ដៃគូពាណិជ្ជកម្មអាស៊ាន។ នេះបើយោងតាមការចុះផ្សាយរបស់សារព័ត៌មានឥណ្ឌូនេស៊ី The Jakarta Post។

ប្រធានគណៈកម្មាធិការចរចារូបនោះ ក៏បានបន្ថែមទៀតថា ក្រុមការងារចរចា កំពុងតែធ្វើការរួមគ្នា ដែល កិច្ចការនេះទាមទារឲ្យមានការបត់បែនខ្លាំងពីគ្រប់ភាគីដើម្បីធានាឲ្យបានការស្រុះស្រួលគ្នាទាំងផលប្រយោជន៍ និងចំណុចចម្រូងចម្រាសនោះ។ នេះបើយោងតាមប្រភពព័ត៌មាននោះ។

សូមជម្រាបផងដែរថា RCEP (Regional Comprehensive Economic Partnership) គឺជាកិច្ចព្រមព្រៀងពាណិជ្ជកម្មមួយដែលផ្តួចផ្តើមដោយរដ្ឋាភិបាលចិន និងលើកចរចាជាផ្លូវការក្នុងឆ្នាំ២០១២ក្នុងឱកាសកម្ពុជាធ្វើជាប្រធានអាស៊ាន។ កិច្ចព្រមព្រៀងដែលមានទំហំពាណិជ្ជកម្មស្មើនឹង៣០ភាគរយនៃផលិតផលក្នុងស្រុកសរុបរបស់ពិភពលោក បង្កើតឡើងដើម្បីប្រែក្លាយតំបន់រដ្ឋអាស៊ាន និងដៃគូសន្ទនារបស់ខ្លួនក្លាយជាតំបន់ពាណិជ្ជកម្មសេរី។

ភាគីនៃកិច្ចព្រមព្រៀងនេះ រាប់បញ្ចូលសមាជិកអាស៊ានទាំងដប់ និង ដៃគូសន្ទនាផ្សេងទៀតរួមមានចិន ជប៉ុន កូរ៉េខាងត្បូង ឥណ្ឌា អូស្ត្រាលី និង ណូវែលសេឡង់។ RCEP គ្រោងនឹងបញ្ចប់ការព្រមព្រៀងគ្នាក្នុងឆ្នាំ២០១៥ និង២០១៦នេះទៅហើយ តែ ដោយសារសមាជិករបស់ RCEP មួយចំនួន មានការស្ទាក់ស្ទើរពីស្តង់ដារពីរជាន់ ដ្បិត ពួកគេ ក៏ជាភាគីហត្ថលេខីរបស់ TPP ដែលដឹកនាំដោយអាមេរិកផងដែរនោះ។

យ៉ាងណាក៏ដោយ ពេលនេះ កិច្ចព្រមព្រៀងពាណិជ្ជកម្ម ភាពជាដៃគូអន្តរប៉ាស៊ីហ្វិក ដែលហៅថា TPP ដែលដឹកនាំដោយអាមេរិកក្រោមរដ្ឋបាលប្រធានាធិបតីអាមេរិកជិតអាណត្តិ បារ៉ាក់ អូបាម៉ា ស្ទើរតែរលំរលាយទៅហើយ ដ្បិត រដ្ឋបាលថ្មីអាមេរិកដែលនឹងត្រូវដឹកនាំដោយ ប្រធានាធិបតីទើបជាប់ឆ្នោតអាមេរិក លោក ដូណាល់ ត្រាំ គ្មានឆន្ទៈដើម្បីចរចាលើកិច្ចព្រមព្រៀង TPPឡើយ។ នេះ ក៏អាចមានន័យដែរថា លទ្ធភាពនៃការអាចសម្រេចបានជោគជ័យរបស់ RCEP ក៏មានច្រើនផងដែរ៕