អន្តរជាតិ
នាយករដ្ឋមន្ត្រី Manuel Valls លាលែងពីតំណែងដើម្បីឈរឈ្មោះជាប្រធានាធិបតី
× នាយករដ្ឋមន្ត្រីបារាំងលោក Manuel Valls សម្រេចចូលរួមប្រកួតប្រជែងយកតំណែងប្រធានាធិបតីសម្រាប់ការបោះឆ្នោតឆ្នាំក្រោយនេះ។ លោកនឹងលាលែងពីតំណែងជានាយករដ្ឋមន្ត្រីដើម្បីចូលរួមក្នុងការបោះឆ្នោតសាកល្បងដើម្បីជ្រើសរើសបេក្ខជនប្រធានាធិបតីតំណាងបក្សសង្គមនិយមដែលនឹងចាប់ផ្តើមឡើងនៅខែមករាខាងមុខ។
«ខ្ញុំជាបេក្ខជនប្រធានាធិបតីម្នាក់»។នេះជាការលើកឡើងរបស់នាយករដ្ឋមន្ត្រីបារាំងលោក Manuel Valls នៅថ្ងៃអង្គារទី ៦ខែធ្នូ ក្នុងពេលផ្តល់សុន្ទរកថាក្នុងយុទ្ធនាការនយោបាយមួយនៅតំបន់ជាយក្រុង Evry ។ លោកបានបញ្ជាក់ផងដែរថាលោកនឹងចូលរួមក្នុងការបោះឆ្នោតសាកល្បងក្នុងបក្សសង្គមនិយមនៅខែមករា បន្ទាប់ពីលោកលាលែងពីតំណែងជានាយករដ្ឋមន្ត្រីនោះ។
យោងតាមទីភ្នាក់ងារព័ត៌មាន AFP នាយករដ្ឋមន្ត្រីបារាំងរូបនេះប្រកាសចូលប្រកួតយកតំណែងប្រធានាធិបតី ក្រោយពេលដែលលោក ហ្វ្រង់ស្វ័រ ហូឡង់ សម្រេចចិត្តដកខ្លួនចេញពីការប្រកួតប្រជែងនយោបាយនេះ។
សូមបញ្ជាក់បន្តិចថា លោក ហ្វ្រង់ស្វ័រ ហូឡង់ បានប្រកាសហើយកាលពីសប្តាហ៍មុនថា លោកមិនឈរឈ្មោះជាថ្មីឡើយ។ លោកដឹងច្បាស់ថា ប្រជាប្រិយភាពលោកធ្លាក់ចុះខ្លាំង ហើយបើទោះជាលោកឈរឈ្មោះក៏លោកមិនមានសមត្ថភាពជាប់ជាថ្មីដែរ។
ត្រឡប់មកវិញ លោក Manuel Valls បានសង្កត់ធ្ងន់ថា ការឈរឈ្មោះនេះជាការទទួលខុសត្រូវនិងកាតព្វកិច្ចរបស់លោកក្នុងការបង្រួបបង្រួមប្រជាជនបារាំង។ លោកបានឆ្លៀតឱកាសផ្ញើសារព្រមានទៅកាន់អ្នកគាំទ្រនិងបណ្តាប្រជាជនបារាំងផងដែរជុំវិញការបោះឆ្នោតនៅពេលខាងមុខដែលបេក្ខជនបក្សស្តាំនិយមជ្រុល Marine Le Pen អាចនឹងឈ្នះឆ្នោតនោះ។ លោកលើកយកការបោះឆ្នោតឆ្នាំ ២០០២ ដែលឪពុកលោកស្រី Marine Le Pen លោក Jean-Marie Le Pen អាចចូលរួមប្រកួតការបោះឆ្នោតជុំទី ២ ដើម្បីឈានទៅកាន់តំណែងប្រធានាធិបតីនោះ។
ដោយឡែក គណបក្សសង្គមនិយមនឹងរៀបចំការបោះឆ្នោតសាកល្បងក្នុងបក្សនៅខែមករាខាងមុខនេះដើម្បីជ្រើសរើសបេក្ខជនតំណាងឲ្យបក្សដើម្បីចូលរួមប្រជែងយកតំណែងប្រធានាធិបតីដែលនឹងរៀបចំឡើងនៅចុខែមករានិងដើមខែឧសភាឆ្នាំក្រោយ។ គេរំពឹងថា លោក Manuel Valls នឹងត្រូវប្រឈមមុខជាមួយបេក្ខជនក្នុងបក្សសង្គមនិយមយ៉ាងហោចណាស់ ៧នាក់ទៀតដែរនៅក្នុងការបោះឆ្នោតពីរជុំដែលនឹងប្រព្រឹត្តទៅថ្ងៃ ២២ និងថ្ងៃ ២៩ មករានោះ។
សូមបញ្ជាក់ថា ការបោះឆ្នោតប្រធានាធិបតីបារាំងនឹងត្រូវរៀបចំឡើងនៅថ្ងៃ ២៣ ខែមេសាឆ្នាំក្រោយ ។ ហើយបើគ្មានបេក្ខជនណាមួយឈ្នះបានសំឡេងគាំទ្រភាគច្រើនដាច់ខាតទេ ការបោះឆ្នោតជុំទីពីរនឹងត្រូវរៀបចំឡើងនៅថ្ងៃ ៧ឧសភាម្តងទៀតដើម្បីប្រជែងគ្នារវាងបេក្ខជនប្រធានាធិបតីដែលឈ្នះបានសំឡេងច្រើនជាងគេពីររូបនោះ។ ក្នុងការប្រកួតប្រជែងតំណែងប្រធានាធិបតីនេះដែរ គណបក្សសាធារណរដ្ឋ ជ្រើសរើសបានអតីតនាយករដ្ឋមន្ត្រី Francois Fillon ជាបេក្ខជនតំណាងបក្ខ ក្រោយការបោះឆ្នោតក្នុងបក្សពីរជុំកន្លងមកនេះ៕
Tag:
Manuel Valls
Marine Le Pen
Francois Fillon
© រក្សាសិទ្ធិដោយ thmeythmey.com