ប្រធានាធិបតីកូរ៉េខាងត្បូង ព្រមចុះចេញពីតំណែង តែត្រូវរង់ចាំដល់ឆ្នាំក្រោយសិន

អន្តរជាតិ

ប្រធានាធិបតីកូរ៉េខាងត្បូង ព្រមចុះចេញពីតំណែង តែត្រូវរង់ចាំដល់ឆ្នាំក្រោយសិន

06, Dec 2016 , 9:39 pm

រូបភាព

លោកស្រីប្រធានាធិបតីកូរ៉េខាងត្បូង

ដោយ: ថ្មីៗ

ប្រធានាធិបតីកូរ៉េខាងត្បូង លោកស្រី Park Geun-hye បានអះអាងនៅថ្ងៃទី០៦ ខែធ្នូនេះថា លោកស្រី ព្រមទទួលយកសំណើរបស់បក្សលោកស្រីក្នុងការចុះចេញពីតំណែងនៅខែមេសាឆ្នាំក្រោយ។ នេះបើយោងតាមការអះអាងរបស់មន្ត្រីបក្សកាន់អំណាចកូរ៉េខាងត្បូង Saenuri ដែលបានដកស្រង់សម្តីដោយភ្នាក់ងារព័ត៌មាន Reuters។

តាមប្រភពព័ត៌មានដដែលនោះ លោកស្រីប្រធានាធិបតី ក៏បានបញ្ជាក់ដែរថា លោកស្រី ក៏នឹងទទួលយកលទ្ធផលនៃការបោះឆ្នោតដកហូតតំណែងរបស់លោកស្រីដោយសភា ដែលនឹងត្រូវធ្វើឡើងនៅសប្តាហ៍នេះផងដែរ។ តែ លោកស្រី ក៏បានជំទាស់ទៅនឹងការទាមទាររបស់បក្សប្រឆាំងដែលចង់ឲ្យលោកស្រីចុះចេញពីតំណែងឥលូវនោះ។

ការព្រមទទួលយកសំណើចុះចេញពីតំណែង របស់បក្សកាន់អំណាចរបស់លោកស្រីប្រធានាធិបតីរូបនេះ ធ្វើឡើងក្រោយពីបក្សកាន់អំណាច Saenuri នៅសប្តាហ៍មុន បានប្រកាសដកការទុកចិត្តលើលោកស្រី ដោយ បានទុកពេល៥ខែសម្រាប់ប្រធានាធិបតីរូបនេះលាលែងពីតំណែងប្រធានាធិបតីដែលកំពុងរង្គោះរង្គើដោយសាររឿងអាស្រូវពុករលួយនោះ។

បើមិនមានការប្រែប្រួលនៃសំណើរបស់បក្សកាន់អំណាចនោះទេ ក្រៅពីការចុះចេញពីតំណែងដោយស្ម័គ្រចិត្តនៅខែមេសា ឆ្នាំ២០១៧ ក៏នឹងមានការរៀបចំការបោះឆ្នោតប្រធានាធិបតីនៅខែមិថុនាផងដែរ ដែលការបោះឆ្នោតនេះ លឿនជាងកាលបរិច្ឆេទដើមរយៈពេល៦ខែដែលគ្រោងធ្វើនៅខែកុម្ភៈឆ្នាំ២០១៨នោះ៕