ឆ្កែមួយក្បាលនៅអាល្លឺម៉ង់ក្លាយជាមេចិញ្ចឹមរបស់កូនខ្លា

អន្តរជាតិ

ឆ្កែមួយក្បាលនៅអាល្លឺម៉ង់ក្លាយជាមេចិញ្ចឹមរបស់កូនខ្លា

07, Dec 2016 , 9:19 am

រូបភាព

ដោយ: ធីតា

សត្វឆ្កែមួយក្បាល និងម្ចាស់របស់វា បានរ៉ាប់រងលើការចិញ្ចឹមបីកូនខ្លាភ្លោះមួយគូ បន្ទាប់ពីមេរបស់ពួកវា បានបោះបង់ចោល។ នេះជាករណីដ៏កម្រមួយដែលកើតឡើងនៅសួនសត្វមួយក្នុងប្រទេសអាល្លឺម៉ង់។

អ្នកស្រី Jeannette Waurns មន្ត្រីសួនសត្វ Stukenbrock Safari Park ក្នុងប្រទេសអាល្លឺម៉ង់ និងជាម្ចាស់របស់ឆ្កែឈ្មោះ Leon បានបញ្ជាក់ថា កូនខ្លាឈ្មោះ Peach និង Pearl ត្រូវបានមេបង្កើតរបស់ពួកវា បានបដិសេធមិនឲ្យនៅជាមួយ។ គាត់បានអះអាងថា៖ «Leon បង្ហាញពីប្រតិកម្មល្អភ្លាមក្នុងការចិញ្ចឹមបីបាច់កូនខ្លាភ្លោះមួយគូនេះ ដែលទើបតែមានអាយុ១ខែ។

ក្នុងបទសម្ភាសជាមួយ AOL Travel News អ្នកស្រី Jeannette បានគូសបញ្ជាក់ថា Leon គឺជាឆ្កែឈ្មោល ប៉ុន្តែវាចាត់ទុកខ្លួនដូចជាឆ្កែញី។ វាដើរតួនាទីយ៉ាងសំខាន់ក្នុងការនាំកូនខ្លា Peach និង Pearl ប្រឡែងលេង និងរត់លេងជាដើម។ Leon ក៏ធ្លាប់មានបទពិសោធន៍ជួយដល់ការធំធាត់របស់តោសមួយក្បាលកាលពីឆ្នាំ២០១២ កន្លងមកផងដែរ។

ទោះបីជាយ៉ាងណាក៏ដោយ មន្ត្រីសួនសត្វរូបនេះ មិនមានគម្រោងទុកឲ្យខ្លាភ្លោះនៅជាមួយ Leon រហូតដល់ធំនោះឡើយ។ គាត់បានលើកឡើងថា ខ្លាមិនមែនជាសត្វចិញ្ចឹមនោះឡើយ វាស្ថិតនៅក្នុងក្រុមសត្វសាហាវ ដូច្នេះ វាអាចបង្កអំពើហិង្សានៅថ្ងៃណាមួយ៕