ក្រោយវៀតណាមឈ្នះមេដាយមាសទាំងអស់ក្នុងថ្ងៃដំបូងកម្ពុជារំពឹងទទួលមេដាយមាសនៅថ្ងៃនេះ

កីឡាជាតិ

ជាតិ

ក្រោយវៀតណាមឈ្នះមេដាយមាសទាំងអស់ក្នុងថ្ងៃដំបូងកម្ពុជារំពឹងទទួលមេដាយមាសនៅថ្ងៃនេះ

07, Dec 2016 , 11:25 am

រូបភាព

ដោយ:

ក្រោយអត្តពលិកចំបាប់វៀតណាមដែលជាជើងខ្លាំងផ្នែកចំបាប់នៅអាស៊ានបានឈ្នះមេដាយមាសគ្រប់ប្រភេទវិញ្ញាសាទាំងអស់នាការប្រកួតកាលពីថ្ងៃទី៦ ខែធ្នូ ម្សិលមិញ។ ថ្នាក់ដឹកនាំសហព័ន្ធកីឡាចំបាប់កម្ពុជារំពឹងថា ក្រុមអត្តពលិកកម្ពុជានឹងដណ្តើមបានមេដាយមាសជូនជាតិពីការធ្វើម្ចាស់ផ្ទះការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍នាការប្រកួតនៅថ្ងៃទី៧ ខែធ្នូ ឆ្នាំ២០១៦ ដែលជាថ្ងៃចុងក្រោយនេះ។

ទោះបីកម្ពុជាមិនអាចដណ្តើមបានមេដាយក្នុងថ្ងៃប្រកួតបើកឆាកទាំង៨ប្រភេទវិញ្ញាសាក៏ដោយ ប៉ុន្តែលោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជាមានក្តីរំពឹងយ៉ាងមុតមាំថា កម្ពុជានឹងអាចដណ្តើមបានមេដាយមាសពីព្រឹត្តិការណ៍ Southeast Asian Wrestling Championship 2016 ជូនជាតិកម្ពុជាក្នុងថ្ងៃប្រកួតចុងក្រោយនេះ។

«បើទោះបីជាកម្ពុជាយើងមិនទាន់រកបានមេដាយមាស ក្នុងការប្រកួតនៅថ្ងៃដំបូងក៏ដោយ ប៉ុន្តែការប្រកួតនៅនេះខ្ញុំរំពឹងថា អត្តពលិករបស់យើងអាចនឹងឈ្នះបានមេដាយមាស១ ឬ២ ជាមិនខានឡើយ»។ នេះជាការបញ្ជាក់របស់លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា។

សម្រាប់ការប្រកួតដែលធើ្វឡើងនៅមជ្ឈមណ្ឌលកីឡាតេក្វាន់ដូប៊ូយុងខ្មែរក្នុងពហុកីឡដ្ឋានជាតិកាលពីថ្ងៃទី៦ ខែធ្នូ ម្សិលមិញអត្តពលិកមកពីវៀតណាមបានឈ្នះមេដាយមាសទាំងអស់លើ៨ប្រភេទវិញ្ញាសាក្នុងក្រិចកូរ៉ូម៉ាំងផ្នែកបុរស៥ប្រភេទទម្ងន់(៧៥គ.ក្រ, ៧១, ៦៦, ៥៩ និង៨០គ.ក្រ) និងចំបាប់សេរីផ្នែកនារី៣ប្រភេទទម្ងន់(៥៥គ.ក្រ, ៤៤ និង៤៨គ.ក្រ)។

ក្នុងថ្ងៃប្រកួតបើកឆាកនេះដែរម្ចាស់ផ្ទះកម្ពុជាទទួលបានមេដាយប្រាក់ចំនួន៦ និងមេដាយសំរឹទ្ធចំនួន៨។ រីឯប្រទេសថៃ ទទួលបានប្រាក់១ និងសំរឹទ្ធ២ ខណៈម៉ាឡេស៊ី ប្រាក់១ និងសំរឹទ្ធ១ និងប្រទេសឡាវទទួលមេដាយសំរឹទ្ធ១។ ចំណែកសិង្ហបុរី មិនទាន់ទទួលបានមេដាយនោះឡើយ ព្រោះអត្តពលិកមិនបានចូលរួមកាលពីម្សិលមិញ។

ចំពោះប្រភេទវិញ្ញាសាទាំង១០ផ្នែកចំបាប់សេរី ដែលត្រូវដាក់ឲ្យប្រកួតនៅថ្ងៃទី៧ ខែធ្នូ នេះរួមមានផ្នែកបុរសមាន៨ប្រភេទទម្ងន់(៦៥គ.ក្រ, ៧៤, ៧០, ៦១, ៩៧, ៨៦, ៥៧ និង ៥៣គ.ក្រ) និងផ្នែកនារី២ប្រភេទទម្ងន់(៦៣គីឡូក្រាម និង៥៨គីឡូក្រាម)។ ក្នុងចំណោម១០ប្រភេទម្ងន់នេះកម្ពុជាហាក់ដូចជារំពឹងឈ្នះមេដាយមាសលើប្រភេទម្ងន់៩៧គីឡូក្រាម និងទម្ងន់៥៧គីឡូក្រាមផ្នែកបុរស៕