ម្ចាស់មេដាយមាសពិភពលោក សុខ ចាន់មាន មកដល់កម្ពុជានៅថ្ងៃនេះ

កីឡាជាតិ

ជាតិ

ម្ចាស់មេដាយមាសពិភពលោក សុខ ចាន់មាន មកដល់កម្ពុជានៅថ្ងៃនេះ

07, Dec 2016 , 11:57 am

រូបភាព

ដោយ:

ម្ចាស់មេដាយមាសពិភពលោក សុខ ចាន់មាន ព្រមទាំងគណប្រតិភូកីឡាប៉េតង់កម្ពុជាដែលដឹកនាំដោយលោក សូម៉ៃ សុខគា នឹងនាំយកមេដាយមាសពិភពលោកពីប្រទសម៉ាដាហ្កាស្កា មកដល់កម្ពុជានៅថ្ងៃទី៧ ខែធ្នូ នេះ។ ការមកដល់របស់ម្ចាស់មេដាយមាសរូបនេះ មានការស្វាគមន៍យ៉ាងកក់ក្តៅពីថ្នាក់ដឹកនាំក្រសួងអប់រំ និងNOCC ជាពិសេសមានក្បួនម៉ូតូ១២គ្រឿងដង្ហែអមថែមទៀតផង។

កីឡាករ សុខ ចាន់មាន ម្ចាស់មេដាយមាសពិភពលោកក្នុងព្រឹត្តិការណ៍ប្រកួតកីឡាប៉េតង់ជ្រើសរើសជើងឯកពិភពលោកនៅទីក្រុង Antananarivo ប្រទេសម៉ាដាហ្កាស្កា នឹងមកដល់អាកាសយានដ្ឋានអន្តរជាតិភ្នំពេញនាវេលាម៉ោង៦:៣០លា្ងចថ្ងៃទី៧ ខែធ្នូ នេះ។

ការពាំនាំមេដាយមាសពិភពលោកមកមាតុប្រទេសរបស់ ចាន់មាន ដោយទទួលបានការស្វាគមន៍ពីថ្នាក់ដឹកនាំក្រសួងអប់រំ យុវជន និងកីឡា និងប្រធានគណៈកម្មាធិការជាតិអូឡាំពិកកម្ពុជា ព្រមទាំងថ្នាក់ដឹកនាំសហព័ន្ធកីឡាប៊ូល និងប៉េតង់កម្ពុជាផងដែរ។ លើសពីនេះ ចាន់មាន ទទួលបានការដង្ហែក្បួនដែលរៀបចំដោយរាជរដ្ឋាភិបាលកម្ពុជា ក្នុងនោះនឹងមានក្បួនម៉ូតូចំនួន១២គ្រឿងជិះអមម្ចាស់មេដាយមាសរូបនេះទៀតផង។

បើយោងតាម លោក អ៊ិន គឹមស្រ៊ុន អគ្គលេខាធិការសហព័ន្ធកីឡាប៊ូល និងប៉េតង់កម្ពុជា ក្បួនដង្ហែម្ចាស់មេដាយមសពីម៉ាដាហ្កាស្ការូបនេះ ដោយចាប់ផ្តើមពីអាកាសយានដ្ឋានអន្តរជាតិភ្នំពេញតាមបណ្តោយមហាវិថីសហព័ន្ធរុស្ស៊ីដើម្បីឆ្ពោះទៅកាន់រង្វង់មូលវិមានឯករាជ្យ។ ក្រោយធ្វើការដង្ហែមួយជុំវិមានឯករាជក្បួនដង្ហែនេះនឹងបន្តដំណើរទៅកាន់ទីស្នាក់ការ NOCC ដើម្បីជួបលោក ថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC។

នៅថ្ងៃទី៩ ខែធ្នូ ឆ្នាំ២០១៦ កីឡាករ សុខ ចាន់មាន នឹងទទួលបានការស្វាគមន៍យ៉ាងកក់ក្តៅពីសំណាក់ សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅវិមានសន្តិភាព។ លើសពីនេះ ទទួលបានការហែរក្បូនទ្រង់ទ្រាយធំដូចម្ចាស់មេដាយមាសពិភពលោកឆ្នាំ២០១៥ កីឡាការិនី កែ ឡេង៕