ចំបាប់កម្ពុជាបន្តត្រូវការកូរ៉េក្នុងការជួយអភិវឌ្ឍន៍សមត្ថភាពកីឡាករនៅកម្ពុជា

កីឡាជាតិ

ជាតិ

ចំបាប់កម្ពុជាបន្តត្រូវការកូរ៉េក្នុងការជួយអភិវឌ្ឍន៍សមត្ថភាពកីឡាករនៅកម្ពុជា

07, Dec 2016 , 7:39 pm

រូបភាព

ដោយ:

លោក វ៉ាត់ ចំរើន ប្រធានសហព័ន្ធកីឡាចំបាប់កម្ពុជា បន្តត្រូវការការជួយជ្រោមជ្រែងពីភាគីកូរ៉េ បន្ទាប់ពីលោកសង្កេតឃើញសមត្ថភាពរបស់កីឡាករកីឡាការិនីកម្ពុជានៅមានកម្រិតទាប បើប្រៀមធៀបនៅនឹងប្រទេសនៅក្នុងតំបន់។ ដោយលោកសំណូមពរដល់ភាគីកូរ៉េបន្តផ្តល់កីឡករ និងគ្រូបង្វឹកមកធ្វើការហ្វឹកហាត់រួមគ្នានៅកម្ពុជា។

ក្រោយមើលឃើញពីកម្រិតសមត្ថភាពរបស់ក្រុមកីឡាករកីឡាការិនីកម្ពុជានៅមានកម្រិតទាបបើប្រៀបធៀបទៅនឹងប្រទេសនៅក្នុងតំបន់ លោក វ៉ាត់ ចំរើន ប្រធានសហព័ន្ធកីឡាចំបាប់កម្ពុជាបានសំណូមពរឲ្យភាគីកូរ៉េបន្តជួយផ្តល់កីឡាករ និងគ្រូបង្វឹកឲ្យមកហ្វឹកហាត់រួមគា្ននៅកម្ពុជា។ ការសំណូមពរនេះធ្វើឡើងក្នុងពិធីជួយពិភាក្សាជាមួយក្រុមកីឡាករ និងគ្រូបង្វឹកកូរ៉េ នៅទីស្នាក់ការ NOCC កាលពីថ្ងៃទី៦ ខែធ្នូ។

ការធ្វើបែបនេះក្នុងគោលបំណងដើម្បីជួយអភិវឌ្ឍន៍សមត្ថភាពរបស់កីឡាករកីឡាការិនីចំបាប់កម្ពុជាឲ្យកាន់តែរីកចម្រើនថែមទៀត។ ម្យ៉ាងទៀត ដើម្បីផ្លាស់ប្តូរបទពិសោធន៍ល្អៗ រវាងកីឡាករបរទេសក៏ដូចជាគ្រូបង្វឹកជាមួយកីឡាករ និងបង្វឹកកម្ពុជាផងដែរ។

គួរបញ្ជាក់ថា ក្រុមកីឡាករ និងគ្រូបង្វឹកចំបាប់កូរ៉េចំនួន១២នាក់បានមកហ្វឹកហាត់រួមគ្នាក្រុមកីឡាករកម្ពុជានៅក្នុងអគារដំបូលទូកតាំងពីថ្ងៃទី៣០ ខែវិច្ឆិកា មកម្ល៉េះ ហើយគ្រោងនឹងបញ្ចប់នៅថ្ងៃទី១៤ ខែធ្នូ។ ប៉ុន្តែដោយសារជាប់រវល់ជាមួយការធ្វើជាម្ចាស់ផ្ទះការប្រកួតជើងឯកអាស៊ីអាគ្នេយ៍ឆ្នាំ២០១៦ ការហ្វឹកហាត់ត្រូវបានផ្អាក ដោយនឹងបន្តក្រោយចប់ការប្រកួត។

នេះជាលើកទី១ហើយដែលភាគីកូរ៉េបានបញ្ជូនក្រុមកីឡាករ និងគ្រូបង្វឹកមកហ្វឹកហាត់រួមគ្នានៅកម្ពុជា។ ជាមួយគ្នានេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ចង់ឲ្យមានការចូលរួមបែបនេះជាលើកទី២ ឬលើកក្រោយៗទៀត៕