អន្តរជាតិ
ត្រាំ ប្រកាសបញ្ចប់នយោបាយប្តូររបបដឹកនាំបរទេសនិងផ្តោតតែលើការប្រឆាំងភេរវកម្ម
× ប្រធានាធិបតីទើបជាប់ឆ្នោតលោកដូណាល់ ត្រាំ បង្ហាញគោលនយោបាយសន្តិសុខរបស់លោកជាលើកដំបូងនៅក្នុងពេលលោកជួបអ្នកគាំទ្រនៅរដ្ឋ North Carolina។ លោកបានសន្យាបញ្ឈប់នយោបាយប្តូររបបដឹកនាំបរទេស និងត្រឡប់មកផ្តោតសំខាន់លើការកម្ចាត់ក្រុមភេរវជនរដ្ឋឥស្លាមវិញម្តង។
ក្នុងពេលជួបជាមួយអ្នកគាំទ្រនៅរដ្ឋ North Carolina លោក ដូណាល់ ត្រាំ បានថ្លែងអំណរគុណរដ្ឋនេះដែលបានបោះឆ្នោតជូនលោកកាលពីថ្ងៃ ៨ខែវិច្ឆិកាកន្លងមកនេះ។ ប៉ុន្តែអ្វីដែលសំខាន់លោក បានបង្ហាញគោលនយោបាយសន្តិសុខមួយដែលឈានទៅយកជ័យជម្នះលើក្រុមភេរវជនរដ្ឋឥស្លាម។
លោក ដូណាល់ ត្រាំ បានបញ្ជាក់ច្បាស់ថា លោកនឹងបញ្ចប់រាល់ការអន្តរាគមន៍ក្នុងជម្លោះបរទេស តាមផ្លាស់ប្តូររបបដឹកនាំនៅបរទេស និងត្រឡប់មកផ្តោតសំខាន់លើការពង្រឹងយុទ្ធសាស្ត្រប្រឆាំងក្រុមភេរវជនរដ្ឋឥស្លាមវិញម្តង។
«យើងនឹងឈប់នយោបាយប្តូររបបដឹកនាំបរទេសដែលយើងមិនដឹងសូម្បីតែបន្តិចពីវានោះ ហើយវាមិនគួរពាក់ព័ន្ធនឹងវាទៀតដែរ។ ផ្ទុយមកវិញយើងត្រូវផ្តោតសំខាន់លើការយកជ័យជម្នះលើក្រុមភេរវជននិងកម្ចាត់ក្រុមដែស្ហឲ្យបាន។ យើងនឹងធ្វើវា»។
កសាងកម្លាំងទ័ព និងបង្កើនថវិកាសម្រាប់ប្រើប្រាស់ក្នុងវិស័យយោធាជាគោលដៅរបស់លោកដូណាល់ ត្រាំ នៅពេលដែលលោកឡើងកាន់តំណែងជាប្រធានាធិបតីនៅពេលខាងមុខ។ លោកបញ្ជាក់ថា កម្លាំងយោធាអាមេរិកមិនអាចទន់ខ្សោយ ហើយក៏មិនត្រូវបន្តប្រយុទ្ធនៅសមរភូមិណាមួយដែលកងទ័ពអាមេរិកមិនគួរទៅដែរ។
ក្រៅពីលើកឡើងពី គោលនយោបាយថ្មី លោក ដូណាល់ ត្រាំ ក៏បានបង្ហាញមុខអនាគតរដ្ឋមន្ត្រីការពារជាតិ James Mattin ដែលលោកជ្រើសរើសឲ្យបំពេញការងារក្នុងរដ្ឋបាលលោកផងដែរនៅពេលនោះ។ លោក ដូណាល់ ត្រាំ ព្យាយាមកោតសរសើរលោកឧត្តមសេនីយ៍ James Mattis ដោយលោកចាត់ទុកមន្ត្រីយោធារូបនេះជាមនុស្សដែលមានបទពិសោធន៍ខ្ពស់ និងមានសមត្ថភាពបំផុតក្នុងការកាន់កាប់ការងាររដ្ឋមន្ត្រីការពារជាតិនេះ។
យ៉ាងណាមិញ យោងតាមច្បាប់អាមេរិក ដើម្បីកាន់កាប់តំណែងរដ្ឋមន្ត្រីការពារជាតិនេះ ជននោះត្រូវជាមន្ត្រីយោធាចូលនិវត្តន៍អស់ពេលយ៉ាងហោចណាស់ ៧ឆ្នាំ ប៉ុន្តែលោក James Mattin មិនទាន់ចូលនិវត្តន៍គ្រប់ ៧ ឆ្នាំឡើយ។ ដូច្នេះហើយ វាចាំបាច់ត្រួវមានការសម្រេចពីសភា និងព្រឹទ្ធសភាលើកលែងអ្វីដែលបានកំណត់ និងទទួលយកលោក James Mattis ជារដ្ឋមន្ត្រីការពារជាតិថ្មីជាមុនសិន។
សូមបញ្ជាក់ថា ក្នុងពេលឃោសនាបោះឆ្នោតកាលពីខែសីហា លោក ដូណាល់ ត្រាំ ក៏បានសន្យាបញ្ចប់គោលនយោបាយជ្រៀតជ្រែក និង ប្តូររបបជាដើម។ ក្នុងពេលថ្លែងសុន្ទរកថាស្តីពីនយោបាយការបរទេសនារដ្ឋ Ohio លោក ដូណាល់ ត្រាំ បានប្រកាសត្រង់ៗថា ពេលលោកជាប់ឆ្នោត លោកនឹងបញ្ចប់ឲ្យបាននូវគោលនយោបាយ«ស្ថាបនារដ្ឋ(State-Building)» និងផ្លាស់ប្តូររបបដឹកនាំ(Regime Change) នៅបរទេសទៀត។ លោកចាត់ទុកថា វាក៏ជាផ្នែកមួយនៃដំណោះស្រាយដើម្បីបញ្ចប់ចលនាភេរវកម្មសកល៕
Tag:
ដូណាល់ ត្រាំ
James Mattis
© រក្សាសិទ្ធិដោយ thmeythmey.com