អន្តរជាតិ
លោក ត្រាំ ទារលុបកិច្ចសន្យាផលិតយន្តហោះប្រធានាធិបតីថ្មី ដោយសារតម្លៃថៃ្លពេក
× លោក ដូណាល់ ត្រាំ បានស្នើឲ្យរដ្ឋបាលអាមេរិកលុបចោលកិច្ចសន្យាសង់យន្តហោះប្រធានាធិបតី Air Force One ថ្មីដែលកងទ័ពអាកាសអាមេរិកចុះជាមួយក្រុមហ៊ុនប៊ូអ៊ីងនោះ។ លោកបញ្ជាក់ថា ការចំណាយលើយន្តហោះថ្មីនេះអស់ច្រើនពេកពោលគឺច្រើនជាង៤ពាន់លានដុល្លារ។ ហើយលោកក៏ចង់កាត់បន្ថយការចំណាយរបស់រដ្ឋដែរ។ យ៉ាងណាមិញគេមិនទាន់ដឹងច្បាស់ថា លោកនឹងលុបចោលកិច្ចព្រមព្រៀងនេះឬអត់ឡើយក្រោយលោកស្បថចូលកាន់តំណែងជាផ្លូវការនៅដើមឆ្នាំក្រោយនេះ។ យ៉ាងណាមិញវាជារឿងចាំបាច់ដែលត្រូវផ្លាស់ប្តូរយន្តហោះ ព្រោះយន្តហោះបច្ចុប្បន្នវាចាស់ណាស់ទៅហើយ ហើយគេក៏ចំណាយលើការថែទាំច្រើនទៀត។
សូមស្តាប់ការបកស្រាយការរបស់លោក សៅ ផលនិស្ស័យ៖
ប្រធានាធិបតីទើបជាប់ឆ្នោត លោក ដូណាល់ ត្រាំ បានស្នើឲ្យរដ្ឋបាលអាមេរិកបញ្ចប់កិច្ចសន្យាសង់យន្តហោះសម្រាប់ប្រធានាធិបតីថ្មី “Air Force One” ដែលកងទ័ពអាកាសអាមេរិកចុះជាមួយក្រុមហ៊ុនប៊ូអ៊ីងកន្លងមកដែរ។ លោកបញ្ជាក់ថា លោកមិនចង់ឲ្យមានការចំណាយលុយរដ្ឋច្រើនបែបនេះសម្រាប់សង់យន្តហោះប្រធានាធិបតីឡើយ។
ប៉ុន្តែលោក ដូណាល់ ត្រាំ ទំនងជាមិនពេញចិត្តក្រុមហ៊ុនប៊ូអ៊ីងច្រើនជាង។ លោក ដូណាល់ ត្រាំ ថ្លែងវាយប្រហារក្រុមហ៊ុនប៊ូអ៊ីង ក្រោយពេលដែលសារព័ត៌មាន Chicago Tribune បានចុះផ្សាយអត្ថបទមួយដែលបង្ហាញថា នាយកប្រតិបត្តិការក្រុមហ៊ុនប៊ូអ៊ីងបានស្នើឲ្យលោក ដូណាល់ ត្រាំ បញ្ចប់គោលជំហរប្រឆាំងចរន្តពាណិជ្ជកម្មសាកលផងដែរ។
លោក ដូណាល់ ត្រាំ បានសរសេរបង្ហោះតាមប្រព័ន្ធទំនាក់ទំនងសង្គម Twitter ថា៖«ក្រុមហ៊ុនប៊ូអ៊ីងកំពុងសង់យន្តហោះប៊ូអ៊ីងម៉ូដែល 747 ថ្មីសម្រាប់ប្រធានាធិបតីអាមេរិក ប៉ុន្តែការចំណាយវាលើសពី ៤ពាន់លានដុល្លារ។ លុបចោលការបញ្ជាសង់យន្តហោះនេះ!»។ លោកបន្តថា លោកចង់ឲ្យក្រុមហ៊ុនចំណេញ ប៉ុន្តែលោក មិនចង់ឲ្យក្រុមហ៊ុនចំណេញខ្លាំងពេកទេ។
បើតាមរបាយការណ៍វាយតម្លៃរបស់ការិយាល័យគណនេយ្យភាពរដ្ឋាភិបាលអាមេរិក គម្រោងសាងសង់យន្តហោះនេះអាចនឹងមានតម្លៃប្រហាក់ប្រហែល ៣,២ពាន់លានដុល្លារអាមេរិកប៉ុណ្ណោះ។ ចំណែក លោក ដូណាល់ ត្រាំ គ្រាន់តែអះអាងបែបនេះថាការចំណាយលើស ៤ពាន់លានដុល្លារ ប៉ុន្តែមិនបានបង្ហាញរបាយការណ៍ត្រឹមត្រូវឡើយជុំវិញការចំណាយលើការសាង់យន្តហោះសម្រាប់ប្រធានាធិបតីអាមេរិកនេះ។ គេមិនបានដឹងច្បាស់ឡើយថា លោក ដូណាល់ ត្រាំ បានទទួលទិន្នន័យនេះពីណាឲ្យប្រាកដឡើយ។
យ៉ាងណាមិញ គេរង់ចាំមើលថា ក្រោយពេលដែលលោកស្បថចូលកាន់តំណែងហើយនោះ លោក ដូណាល់ ត្រាំ នឹងលុបចោលកិច្ចព្រមព្រៀងនេះឬអត់។
ឆ្លើយតបបញ្ហានេះ ខាងទ័ពអាកាសអាមេរិកបានសន្យាថា ខ្លួននឹងបន្តសហការជាមួយខាងក្រុមហ៊ុនប៊ូអ៊ីងដើម្បីធ្វើយ៉ាងណាកាត់បន្ថយការចំណាយឲ្យទាបតាមដែលអាចធ្វើបាន។ អ្នកជំនាញមួយចំនួនបានផ្តល់យោបល់ថា ជាធម្មតា បើចង់បានតម្លៃទាប មានតែកាត់បន្ថយការចំណាយលើសម្ភារៈនិងបច្ចេកវិទ្យានានាដែលប្រើប្រាស់លើយន្តហោះ។ ប៉ុន្តែវាជាបញ្ហាមួយបើយន្តហោះនេះមិនផលិតនិងរចនាឡើងស្របតាមស្តង់ដារនិងបំពាក់សម្ភារៈពិសេសតាមតម្រូវការទេនោះ។
ដោយឡែក ក្រោយមានការទាមទារបញ្ចប់កុងត្រាសង់យន្តហោះប្រធានាធិបតី ខាងក្រុមហ៊ុន ប៊ូអ៊ីងក៏បានចេញសេចក្តីថ្លែងការណ៍មួយពាក់ព័ន្ធបញ្ហានេះដែរ។ ប៊ូអ៊ីងបានបញ្ជាក់ថា៖« យើងត្រៀមខ្លួនសហការជាមួយកងទ័ពអាកាសមេរិកដើម្បីអនុវត្តគម្រោងផលិតយន្តហោះដែលល្អបំផុតសម្រាប់ប្រធានាធិបតី ដែលមានតម្លៃបំផុតសម្រាប់ប្រជាជនអាមេរកដែលជាអ្នកបង់ពន្ធ»។
១. ដូណាល់ ត្រាំ មិនទាន់អាចជិះយន្តហោះថ្មីនេះ ដោយសារគម្រោងសាងសង់ចប់ឆ្នាំ ២០២៤
សូមទាញការចាប់អារម្មណ៍បន្តិចថា កងទ័ពអាកាសអាមេរិកបានចុះហត្ថលេខាជាមួយក្រុមហ៊ុនប៊ូអ៊ីងកាលពីដើមឆ្នាំ ២០១៥ ដើម្បីអនុញ្ញាតក្រុមហ៊ុននេះអភិវឌ្ឍនិងសាងសង់យន្តហោះ Air Force One ថ្មីចំនួន២គ្រឿង សម្រាប់ប្រធានាធិបតីអាមេរិក។
ក្រុមហ៊ុនបានទទួលថវិកាជំហានដំបូង ១៧០ លានដុល្លាររួចហើយ ខណៈថវិកាបន្ថែមនឹងត្រូវផ្តល់ឲ្យបន្តបន្ទាប់ដើម្បីបន្តគម្រោងសាងសង់យន្តហោះនេះ។ ប៉ុន្តែគម្រោងនេះនឹងបញ្ចប់នៅឆ្នាំ ២០២៤ ហើយន្តហោះនឹងចូលបម្រើប្រធានាធិបតីពេលនោះដែរ។
ដូច្នេះមានន័យថា លោកដូណាល់ ត្រាំ នឹងមិនអាចជិះយន្តហោះថ្មីនេះឡើយ លើកលែងតែលោកជាប់ឆ្នោតជាប្រធានាធិបតីម្តងទៀតនៅឆ្នាំ ២០២០។
២.យន្តហោះប្រធានាធិបតី បច្ចុប្បន្នចាស់ណាស់ដែលចាំបាច់ត្រូវផ្លាស់ប្តូរ
បើតាមកងទ័ពអាកាសអាមេរិក យន្តហោះប្រធានាធិបតីបច្ចុប្បន្នចាំបាច់ត្រូវផ្លាស់ប្តូរ។ យន្តហោះប្រធានាធិបតី Air Force One ដែលកំពុងដឹកប្រធានាធិបតីបច្ចុប្បន្នត្រូវបានកុម្ម៉ង់ទិញដោយរដ្ឋបាលលោក រ៉ូណាល់ រីហ្កែន ហើយវាចូលបម្រើការងារជាផ្លូវការឆ្នាំ ១៩៩០។ និយាយទៅយន្តហោះនេះចាស់ ហើយសម្ភារៈដែលបំពាក់យន្តហោះហួសសម័យទៅហើយ។ ដូច្នេះហើយ វាត្រូវការលុយច្រើនដើម្បីថែទាំ និងមិនសូវមានសុវត្ថិភាពសម្រាប់ប្រធានាធិបតីអាមេរិកនោះឡើយ។
យន្តហោះ Air Force One ជាយន្តហោះដែលត្រូវគេសាងសង់និងរចនាឡើងដោយមានបំពាក់ដោយគ្រឿងបរិក្ខាពិសេស គ្រឿងការពារសុវត្ថិភាព និងបច្ចេកវិទ្យាទំនើបបំផុតផងដែរ ដែលអាចការពារប្រធានាធិបតីបានល្អបំផុត។ វាត្រូវបានគេបំពាក់ប្រព័ន្ធបច្ចេកវិទ្យាសម្រាប់ទំនាក់ទំនង និងប្រព័ន្ធការពារដែលអាចការពារប្រធានាធិបតីពីការវាយប្រហារក្នុងសង្គ្រាមនុយក្លេអ៊ែរ និងការវាយប្រហារភេរវកម្មជាដើម។ Air Force One កន្លងមកអាចត្រូវគេប្រើប្រាស់ជាទីបញ្ជាការសម្រាប់ប្រធានាធិបតីនៅពេលដែលមានគ្រោះមហន្តរាយ ឬបញ្ហាអាសន្នកើតឡើងផងដែរ។ ឧទាហរណ៍ យន្តហោះAir Force One នេះហើយបានក្លាយជាទីបញ្ជាការសម្រាប់មេបញ្ជាការកំពូលកងទ័ពអាមេរិកប្រធានាធិបតីលោក George W. Bush ក្នុងពេលដែលអាមេរិករងការវាយប្រហារដោយក្រុមភេរវជននៅថ្ងៃ ១១ ខែកញ្ញាឆ្នាំ ២០០១៕
Tag:
ដូណាល់ ត្រាំ
Air Force One
© រក្សាសិទ្ធិដោយ thmeythmey.com