អន្តរជាតិ
អាមេរិកអនុញ្ញាតឲ្យប្រធានាធិបតីតៃវ៉ាន់ចូលអាមេរិក ដោយទាត់ចោលសំណើរចិន
× អាជ្ញាធរអាមេរិកបានបដិសេដសំណើររបស់ចិនក្នុងការបិទកុំឲ្យប្រធានាធិបតីតៃវ៉ាន់ចុះចតនៅអាមេរិក ស្របពេលដែលមានដំណឹងថាប្រធានាធិបតី តៃវ៉ាន់ នឹងអញ្ជើញទៅបំពេញទស្សនកិច្ចនៅអាមេរិកកណ្តាលនៅខែក្រោយ។ អ្វីដែលធ្ងន់ធ្ងរជាងនេះ លោក ដូណាល់ ត្រាំ ដែលទើបធ្វើឲ្យចិនក្តៅក្រហាយរឿងនិយាយទូរសព្ទជាមួយប្រធានាធិបតីតៃវ៉ាន់នោះ ប្រកាសថាលោកនឹងជួបប្រមុខរដ្ឋតៃវ៉ាន់ដោយផ្ទាល់ថែមទៀតផង។
ក្រោយពេលដែលចិនស្នើសុំឲ្យឲ្យអាជ្ញាធរអាមេរិកបិទទ្វារកុំឲ្យប្រធានាធិបតីតៃវ៉ាន់ Tsai Ing-wen ចូលសំចតនៅទីក្រុង New York អាជា្ញធរអាមេរិកបានឆ្លើយតបវិញថា ខ្លួនមិនអាចធ្វើតាមការស្នើសុំរបស់ចិនបានឡើយ។
ចិនបានស្នើសុំទៅអាជ្ញាធរអាមេរិកក្រោយពេលដែលគេទទួលបានព័ត៌មានមួយលោកស្រីប្រធានាធិបតីតៃវ៉ាន់ Tsai Ing-wen នឹងអញ្ជើញទៅទស្សនកិច្ចនៅប្រទេសបីមានដូចជានីការ៉ាហ្គា,ក្វាតេម៉ាឡា និងអែលសាល់វ៉ាឌ័រ ហើយលោកស្រីត្រូវចុះសំចតនៅទីក្រុងញូវយ៉ក។
យោងតាមទីភ្នាក់ងារព័ត៌មាន Reuters ក្រសួងការបរទេសចិនបានអះអាងថា ខ្លួនសង្ឃឹមយ៉ាងមុតមាំថា អាមេរិកនឹងមិនអនុញ្ញាតឲ្យមេដឹកនាំតៃវ៉ាន់ចូលសំចតនៅអាមេរិក និងមិនផ្តល់សញ្ញាខុសដល់ចលនាទាមទារឯករាជ្យនៅតៃវ៉ាន់ដែរ។
ឆ្លើយតបការលើកឡើងនេះ អ្នកនាំពាក្យក្រសួងការបរទេសអាមេរិកបានបញ្ជាក់ថា ការចូលសំចតនៃយន្តហោះរបស់លោកស្រីប្រធានាធិបតីតៃវ៉ាន់នឹងនៅតែបន្តស្របតាមការអនុវត្តក្នុងទំនាក់ទំនងយូរអង្វែងរបស់អាមេរិកដែលវាស្របតាមទំនាក់ទំនងដែលមិនផ្លូវការរបស់អាមេរិកនិងតៃវ៉ាន់នោះ។
អ្វីដែលរឹតតែធ្ងន់ធ្ងរជាងនេះទៀតគឺ លោកដូណាល់ ត្រាំ បានប្រកាសថា លោកនឹងជួបជាមួយប្រធានាធិបតីតៃវ៉ាន់ទល់មុខគ្នាពេលលោកស្រីចុះចតនៅក្រុងញូវយ៉កទៀតផង។ វាជាសកម្មភាពមួយដែលនឹងអាចបង្កផលប៉ះពាល់ខ្លាំងដល់ទំនាក់ទំនងរវាងចិននិងតៃវ៉ាន់ជាក់ជាមិនខាន។
ជាធម្មតា ការឆ្លើយតបរបស់អាមេរិកបែបនេះកាន់តែធ្វើឲ្យចិនក្រពុលមុខ និងក្តៅស្លឹកត្រចៀកខ្លាំង។ ចិនក្តៅក្រហាយមិនទាន់បាត់ទេ ព្រោះការបដិសេធនេះកើតឡើងបន្ទាប់ពីប្រធានាធិបតីទើបជាប់ឆ្នោតលោក ដូណាល់ ត្រាំ ហ៊ានបំពានច្បាប់ទម្លាប់ការទូតដោយនិយាយទូរសព្ទជាមួយប្រធានាធិបតីតៃវ៉ាន់កាលពីសប្តាហ៍មុន។ យោងតាមការិយាល័យប្រធានាធីបតីតៃវ៉ាន់ លោកស្រី Tsai និងលោកដូណាល់ ត្រាំ ផ្លាស់ប្តូរយោបល់គ្នាពាក់ព័ន្ធការលើកស្ទួយទំនាក់ទំនងសេដ្ឋកិច្ច និងសន្តិសុខ និងកិច្ចការការពារជាតិផងដែរ។
ភ្លាមៗ ក្រោយការទូរសព្ទនេះ ប្រមុខការទូតចិនសង្ឃឹមថាសកម្មភាពរបស់អាមេរិកនឹងមិនធ្វើឲ្យខូចខាតដល់ទំនាក់ទំនងទ្វេភាគីរវាងប្រទេសទាំងពីរ។ ហើយលោកក៏ស្នើឲ្យអាមេរិក«គោលនយោបាយចិនតែមួយ» ផងដែរ។
ហើយខាងសេតវិមានអាមេរិកឯណោះវិញក៏ព្យាយាមកាត់បន្ថយកម្តៅនិងការអាក់អន់ចិត្តរបស់ក្រុងប៉េកាំងដែរ។ អាមេរិកបញ្ជាក់ប្រាប់ចិនថា អាមេរិកមិនផ្លាស់ប្តូរគោលជំហររបស់ខ្លួនឡើយ ហើយខ្លួននៅតែគោរពគោលនយោបាយចិនតែមួយដដែល។
Tag:
Tsai Ing-wen
ដូណាល់ ត្រាំ
© រក្សាសិទ្ធិដោយ thmeythmey.com