ពលរដ្ឋមីយ៉ាន់ម៉ា«៦នាក់» បាតុកម្មប្រឆាំងនឹងជំហរនាយករដ្ឋមន្ត្រីម៉ាឡេស៊ីរឿង«រ៉ូហ៊ីងយ៉ា»

អន្តរជាតិ

ពលរដ្ឋមីយ៉ាន់ម៉ា«៦នាក់» បាតុកម្មប្រឆាំងនឹងជំហរនាយករដ្ឋមន្ត្រីម៉ាឡេស៊ីរឿង«រ៉ូហ៊ីងយ៉ា»

08, Dec 2016 , 8:59 pm

រូបភាព

ដោយ: ថ្មីៗ

ពលរដ្ឋមីយ៉ាន់ម៉ាប្រាំមួយនាក់ បានប្រមូលផ្តុំគ្នានៅមុខស្ថានទូតម៉ាឡេស៊ី ប្រចាំក្រុងរ៉ងហ្គូននៃប្រទេសមីយ៉ាន់ម៉ាដើម្បីទាមទារឲ្យម៉ាឡេស៊ីគោរពអធិបតេយ្យរបស់ពួកគេ។ ការប្រមូលផ្តុំនេះ ក៏ត្រូវបានធ្វើឡើងដើម្បីឆ្លើយតបទៅនឹងការដឹកនាំបាតុកម្មរបស់នាយករដ្ឋមន្ត្រីម៉ាឡេស៊ី នៅមុខស្ថានទូតមីយ៉ាន់ម៉ា ប្រចាំប្រទេសម៉ាឡេស៊ីនៅសប្តាហ៍មុនផងដែរ។

ពលរដ្ឋមីយ៉ាន់ម៉ាប្រាំមួយនាក់ នៅព្រឹកថ្ងៃទី៨ ខែធ្នូនេះ បានប្រមូលផ្តុំគ្នានៅមុខស្ថានទូតម៉ាឡេស៊ីប្រចាំក្រុងរ៉ងហ្គូន ជាមួយនឹងប៉ាដារដែលនិយាយថា «មីយ៉ាន់ម៉ា គឺជារដ្ឋអធិបតេយ្យ។ គោរពផលប្រយោជន៍គ្រួសារអាស៊ាន។ ប្រជាជាតិអាស៊ានមិនត្រូវការការស្អប់ និងភេរវកម្មនៅក្នុងតំបន់ឡើយ»។ នេះបើយោងតាមការចុះផ្សាយរបស់សារព័ត៌មានមីយ៉ាន់ម៉ា ដែលផ្សាយជាភាសាអង់គ្លេស The Irrawaddy ។

តាមប្រភពព័ត៌មានដដែលនោះ ការប្រមូលផ្តុំចតួចនេះ ក៏ធ្វើឡើងដើម្បីឆ្លើយតបទៅនឹងការដឹកនាំការប្រមូលផ្តុំរបស់លោកនាយករដ្ឋមន្ត្រីម៉ាឡេស៊ី ណាជីប រ៉ាហ្សាក់ ដើម្បីប្រឆាំងនឹងរដ្ឋាភិបាលមីយ៉ាន់ម៉ាលើចំណាត់ការលើជនជាតិភាគតិចរ៉ូហ៊ីងយ៉ា កាលពីពេលថ្មីៗនេះ។ តែការប្រមូលផ្តុំនោះ ក៏ត្រូវបានរដ្ឋាភិបាលមីយ៉ាន់ម៉ា ចាត់ទុកថាជាការជ្រៀតជ្រែកកិច្ចការផ្ទៃក្នុងរបស់មីយ៉ាន់ម៉ាផងដែរនោះ។

សូមជម្រាបផងដែរថា នៅថ្ងៃទី០៤ ខែធ្នូកន្លងទៅ លោកនាយករដ្ឋមន្ត្រី ណាជីប រ៉ាហ្សាក់ បានដឹកនាំបាតុកម្ម និងការប្រមូលផ្តុំសន្តិវិធីដែលមានការចូលរួមពីប្រជាជនម៉ាឡេស៊ីប្រមាណ ៥០០០នាក់ នៅមុខក្បែរស្ថានទូតមីយ៉ាន់ម៉ា ប្រចាំកូឡាឡាំពួរ។ នេះបើយោងតាមសារព័ត៌មានបាងកកប៉ុស្តិ៍។

នៅក្នុងចំណោមការប្រមូលផ្តុំដ៏ធំនោះ លោកនាយករដ្ឋមន្ត្រី បានលើកឡើងថា មីយ៉ាន់ម៉ា ត្រូវតែបញ្ឈប់ការបង្ក្រាបបង្ហូរឈាមនោះ។ លោក ថែមទាំងប្រើពាក្យវាយប្រហារខ្លាំងទៅកាន់លោកស្រី អ៊ុងសាន ស៊ូជី ដោយលោក ចោទយ៉ាងដូច្នេះថា៖«តើអ៊ុងសាន ស៊ូជី ប្រើងារពានរង្វាន់ណូប៊ែលដើម្បីធ្វើអ្វីខ្លះ? យើងត្រូវតែ និងការពារប្រជាជនម៉ូស្លីម និងសាសនាឥស្លាម»។ ហើយលោក ក៏បានទទូចឲ្យអង្គការសហប្រជាជាតិចេញវិធានការដោយមិនត្រឹមតែអង្គុយមើល «អំពើប្រល័យពូជសាសន៍»កើតឡើងឡើយ៕