អន្តរជាតិ
វៀតណាម៖ ដើម្បីអភិវឌ្ឍប្រទេស មិនត្រូវពឹងផ្អែកតែលើធនធានធម្មជាតិ និងពលកម្មមូលដ្ឋាននោះទេ តែ... លោកនាយករដ្ឋមន្ត្រីវៀតណាម Nguyen Xuan Phuc (ប្រភពរូបភាព៖ Xinhua)
× លោកនាយករដ្ឋមន្ត្រីវៀតណាម Nguyen Xuan Phuc បានព្រមានចំពោះការវិលត្រលប់ទៅរកការអនុវត្តគោលនយោបាយសេដ្ឋកិច្ច«គាំពារនិយម»នៅក្នុងតំបន់ ខណៈពេលដែលកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិក (TPP) ដែលដឹកនាំដោយអាមេរិក គ្មានសង្ឃឹមថាអាចសម្រេចបាននោះ។
-
«ពិភពលោក និងតំបន់អាស៊ាន កំពុងតែប្រឈមនឹងបញ្ហាធំៗជាច្រើនវិស័យរួមមានទាំងបញ្ហាសន្តិសុខ ហិរញ្ញវត្ថុ ការប្រែប្រួលអាកាសធាតុ និងហានិភ័យនៃការវិលត្រលប់ទៅគាំពារនិយម»។ នេះគឺជាការលើកឡើងរបស់លោកនាយករដ្ឋមន្ត្រីវៀតណាម Nguyen Xuan Phuc ក្នុងកិច្ចប្រជុំធុរកិច្ចអាស៊ាន របស់ Bloomberg ក្នុងក្រុងហាណូយនៅថ្ងៃទី៨ ធ្នូនេះ ដែលស្រង់សម្តីដោយសារព័ត៌មាន Bloomberg។
នាឱកាសដដែលនោះ លោកនាយករដ្ឋមន្ត្រី ក៏បានទទូចសមាជិកអាស៊ានទាំងដប់ ដែលរួមមានទាំងសិង្ហបុរី និងឥណ្ឌូណេស៊ី ដែលមានការនាំចេញធំផងដែរនោះ ឲ្យធ្វើឲ្យកាន់តែស៊ីជម្រៅលើចំណងសេដ្ឋកិច្ច និងកសាងហេដ្ឋារចនាសម្ព័ន្ធដើម្បីពង្រីកពាណិជ្ជកម្ម វិនិយោគ និងសេវាកម្ម។ លោកនាយករដ្ឋមន្ត្រី អះអាងថា រដ្ឋាភិបាលវៀតណាម នឹងបង្កើនកិច្ចប្រឹងប្រែងដើម្បីធ្វើឲ្យមានភាពល្អប្រសើរលើបរិយាកាសវិនិយោគ និងបង្កើនចំនួនក្រុមហ៊ុនរបស់ខ្លួនឯងតែម្តង។
លោក បានសង្កត់ធ្ងន់យ៉ាងដូច្នេះថា៖«ប្រទេសអាស៊ាននីមួយៗ មិនអាចអភិវឌ្ឍទៅមុខរហូតបានឡើយ ប្រសិនបើប្រទេសនោះ ពឹងផ្អែកតែទៅលើការបំពានលើធនធានធម្មជាតិ និងការប្រើប្រាស់កម្លាំងពលកម្មមូលដ្ឋាននោះ។ លោក បន្ថែមថា ដើម្បីអភិវឌ្ឍ ត្រូវទាមទារឲ្យមានការពង្រឹងការប្រកួតប្រជែង និងការចូលរួមនៅក្នុងចង្វាក់នៃការផ្គត់ផ្គង់សកលដើម្បីទទួលបានតម្លៃបន្ថែមកាន់តែខ្ពស់នោះ។
ការលើកឡើងរបស់លោកនាយករដ្ឋមន្ត្រីវៀតណាមរូបនេះ ទំនងជាចង់ដាស់តឿនបណ្តាសមាជិកអាស៊ានឲ្យពិនិត្យឡើងវិញចំពោះសមត្ថភាពសេដ្ឋកិច្ច និងពាណិជ្ជកម្មនៅក្នុងតំបន់ ខណៈពេលដែលអាស៊ាន កំពុងតែដំណើរការសមាហរណកម្មសេដ្ឋកិច្ចដែលត្រូវបានគេមើលថាមិនសូវមានការវិវត្តច្រើននោះ។ ហើយនេះ ក៏ពាក់ព័ន្ធទៅនឹងក្តីបំណងរបស់វៀតណាម ក្នុងការចង់ចាប់ដៃគូពាណិជ្ជកម្មក្នុងកម្រិតកំពូលមួយតាមរយៈកិច្ចព្រមព្រៀងពាណិជ្ជកម្ម TPP ដែលបានជាប់គាំងហើយនោះ។ ពោលគឺការដាស់ឲ្យពង្រឹងសមត្ថភាពក្នុងតំបន់របស់វៀតណាម ធ្វើឡើង ក្រោយក្តីរំពឹងវៀតណាម ក្នុងការពង្រីកទំហំពាណិជ្ជកម្មតាមTPP គ្មានពន្លឺអ្វីសោះនោះ។
សូមជម្រាបផងដែរថា កិច្ចព្រមព្រៀងភាពជាដៃគូអន្តរប៉ាស៊ីហ្វិក ឬ ហៅថាTPP គឺជាកិច្ចព្រមព្រៀងពាណិជ្ជកម្មមួយដែលបង្កើតឡើងដោយរដ្ឋភាគីទាំង១២ដែលដឹកនាំដោយសហរដ្ឋអាមេរិក។ ភាគីទាំង១២រួមមាន អាមេរិក អូស្ត្រាលី ព្រុយណេ កាណាដា ស៊ីលី ជប៉ុន ម៉ាឡេស៊ី ម៉ិកស៊ិក នូវែលសេឡង់ ប៉េរូ សិង្ហបុរី និង វៀតណាមផងដែរ។ កិច្ចព្រមព្រៀងនេះ មិនទាន់ទទួលបានសច្ចាប័នពីសភាអាមេរិកឡើយ បើទោះបីជារដ្ឋបាល លោក អូបាម៉ា ព្យាយាមបញ្ចុះបញ្ចូលយ៉ាងណាក៏ដោយ។ កិច្ចព្រមព្រៀងនេះ អាចចូលជាធរមានបាន លុះត្រា តែទទួលបានសច្ចាប័នពីអាមេរិក។ កិច្ចព្រមព្រៀងនេះដែរ ស្ទើរតែត្រូវបានចាត់ទុកជាអសារបង់ទៅហើយ ដ្បិតប្រធានាធិបតីអាមេរិកថ្មី លោក Donald Trump គ្រោងនឹងប្រកាសដកសមាកជិកភាពអាមេរិកចេញពី TPP ពេលលោក កាន់តំណែងនោះ។
កន្លងមក រដ្ឋមន្ត្រីពាណិជ្ជកម្ម និងឧស្សាហកម្មវៀតណាម លោក Tran Tuan Anh ធ្លាប់បានអះអាងថាប្រសិនបើ TPP នៅតែបន្តអនុវត្ត និងដំណើរការទៅមុខ នោះ វៀតណាម នឹងអាចទទួលបានផលប្រយោជន៍ជាច្រើនពីពហុវិស័យ។ ក្នុងនោះវៀតណាម រំពឹងថា ផលិតផលនាំចេញចម្បងរបស់វៀតណាមដូចជា វាយនភណ្ឌ កាត់ដេរ ស្បែកជើង និងអាហារសមុទ្រ នឹងកាន់តែកើនឡើងទៅកាន់អាមេរិក ជប៉ុន និងកាណាដា ដែលជាសមាជិករបស់ TPP។ តែវា មិនអាចទៅរួចឡើយ៕
© រក្សាសិទ្ធិដោយ thmeythmey.com