ជាតិ
លោក ហ៊ុន ម៉ានី ជឿជាក់ថា ការភ្ជាប់ទំនាក់ទំនងយុវជនកម្ពុជា-ថៃ នឹងអាចទាញសហគ្រិនថៃវិនិយោគនៅកម្ពុជា
× ភ្នំពេញ៖ ក្រោយបញ្ចប់ដំណើរទស្សនកិច្ចនៅប្រទេសថៃ តំណាងគណប្រតិភូយុវជនកម្ពុជាលោក ហ៊ុន ម៉ានី ហាក់មានក្តីសង្ឃឹមថា កម្ពុជានឹងអាចទាញសហគ្រិនវ័យក្មេងពីប្រទេសថៃ មកសហការវិនិយោគជាមួយសហគ្រិនកម្ពុជា តាមរយៈការភ្ជាប់ទំនាក់ទំនងយុវជនកម្ពុជា-ថៃ ដើម្បីពង្រីកទុនវិនិយោគនៃប្រទេសទាំងពីរ។
ក្នុងដំណើរទស្សនកិច្ចរយៈពេល៤ថ្ងៃក្នុងប្រទេសថៃ គណប្រតិភូយុវជនកម្ពុជា ដែលដឹកនាំដោយលោក ហ៊ុន ម៉ានី បានចូលជួបពិភាក្សាជាមួយក្រុមតំណាងសហគ្រិនវ័យក្មេងប្រទេសថៃ ដើម្បីផ្លាស់ប្ដូរគំនិតយោបល់គ្នាទៅវិញទៅមក ក្នុងគោលដៅទាញយកការវិនិយោគរវាងប្រទេសទាំងពីរ។ តាមយៈការផ្លាស់ប្តូយោបល់គ្នានោះ លោក ហ៊ុន ម៉ានី យល់ឃើញថា ខាងភាគីសហគ្រិនវ័យក្មេងថៃ ហាក់មានការចាប់អារម្មណ៍លើការវិនិយោគនៅកម្ពុជាផងដែរ ដោយពួកគេសន្យានឹងមកមើលស្ថានភាពជាក់ស្ដែងនៅកម្ពុជាសិន មុននឹងសម្រេចចិត្តវិនយោគតាមក្រោយ។
ថ្លែងចំពោះមុខអ្នកកាសែត នៅព្រលានយន្តហោះកាលពីថ្ងៃទី១២ធ្នូ លោក ហ៊ុន ម៉ានី បានបញ្ជាក់ដូច្នេះថា៖«ទស្សនកិច្ចរបស់គណប្រតិភូយុវជនកម្ពុជា គឺជាមួយផ្នែកក្នុងការចូលរួមពង្រឹងនិងពង្រីងបន្ថែមនៃសហប្រតិបត្តិការរវាងរាជរដ្ឋាភិបាលទាំងពីរ។ ហើយក្នុងនោះទស្សនកិច្ចមួយនេះ គឺជាបើកច្រកពង្រីកឱកាសក្នុងការស្វែងយល់ និងពង្រីកសហប្រតិបត្តិការសម្រាប់យុវជនជំនាន់ក្រោយ។ ហើយការបើកច្រកទ្វាមុនដំបូងគេនេះ គឺទស្សនកិច្ចដែលយើងនឹងរង់ចាំទាំងអស់គ្នា របស់សហគ្រិនវ័យក្មេងដែលនឹងមកស្វែងយល់ពីបរិយាកាសវិនិយោគនៅកម្ពុជា។ ហើយក៏ជាការចងចំណងមិត្តភាពរវាងយុវជនកម្ពុជា-ថៃដើមឆ្នាំ២០១៧»។
បើតាមលោក ហ៊ុន ម៉ានី ការផ្សារភ្ជាប់ទំនាក់ទំនងសហប្រតិបត្តិការរវាងយុវជនកម្ពុជា-ថៃ នេះ គឺជាច្រកផ្លូវសំខាន់មួយសម្រាប់ការពង្រីកវិនិយោគទុនបន្ថែម ខណៈកម្ពុជាកំពុងមានការអភិវឌ្ឍលើគ្រប់វិស័យ។
ក្រៅពីជួបជាមួយក្រុមសហគ្រិនវ័យក្មេងថៃ គណប្រតិភូយុវជនកម្ពុជា ក៏បានចូលជួបជាមួយនាយករដ្ឋមន្ត្រីថៃលោក ប្រាយុទ្ធ ចាន់អ៊ូចារ ផងដែរ។ ក្នុងជំនួបគ្នានេះលោកនាយករដ្ឋមន្ត្រីថៃ ចាន់អ៊ូចារ បានរំលឹកពីការសន្យាផ្ដល់ជូននូវក្បាលរថភ្លើងមួយខ្សែដល់កម្ពុជា សម្រាប់ប្រើប្រាស់ក្នុងគោលដៅផ្លាស់ប្ដូរ និងពង្រីកទំហំពាណិជ្ជកម្ម ទេសចរណ៍ និងទំនាក់ទំនងរវាងប្រជាជនទាំងពីរ នៅពេលដែលកម្ពុជា-ថៃ បើកច្រកព្រំដែនថ្មីបន្ថែមនៅពេលខាងមុខនេះ។ នេះបើតាមតំណាងប្រតិភូយុវជនកម្ពុជាលោក ហ៊ុន ម៉ានី ដែលបានបន្ថែមថា ក្បាលរថភ្លើង និងខ្សែរថយន្ត ភាគីថៃនឹងផ្ដល់ជូនកម្ពុជា ក្នុងពេលឆាប់ៗនេះ៕
Tag:
ហ៊ុន ម៉ានី
យុវជន
© រក្សាសិទ្ធិដោយ thmeythmey.com