ពលរដ្ឋហ្វីលីពីននៅកម្ពុជា៖ «សង្គ្រាមគ្រឿងញៀន» មិនអាក្រក់ តែប្រព័ន្ធផ្សព្វផ្សាយធ្វើឲ្យចម្រូងចម្រាស

ជាតិ

ពលរដ្ឋហ្វីលីពីននៅកម្ពុជា៖ «សង្គ្រាមគ្រឿងញៀន» មិនអាក្រក់ តែប្រព័ន្ធផ្សព្វផ្សាយធ្វើឲ្យចម្រូងចម្រាស

14, Dec 2016 , 2:08 pm

រូបភាព

ដោយ: សៅ ផលនិស្ស័យ (Sao Phal Niseiy)

ប្រជាជនហ្វីលីពីនដែលរស់នៅកម្ពុជាបានបង្ហាញការយល់ឃើញថា «សង្គ្រាមគ្រឿងញៀន»របស់ប្រធានាធិបតី Rodrigo Duterte ជាគោលនយោបាយសំខាន់ដើម្បីកម្ចាត់គ្រឿងញៀនក្នុងសង្គមហ្វីលីពីន។ ថ្វីបើមានការរិះគន់ពីសហគមន៍សិទ្ធិមនុស្សក៏ដោយ ពួកគេនៅតែយល់ថា វាជារឿងចាំបាច់ ដែលត្រូវបន្តគោលនយោបាយនេះ ហើយប្រព័ន្ធផ្សព្វផ្សាយធ្វើឲ្យលោក Duterte មានរូបភាពអាក្រក់។

ប្រជាជនហ្វីលីពីនប្រហែលរាប់រយនាក់បានចូលរួមក្នុងជំនួបជាមួយប្រធានាធិបតីហ្វីលីពីន Rodrigo Duterte ល្ងាចថ្ងៃអង្គារទី ១៣ធ្នូ ម្សិលមិញ។ ថ្លែងជាភាសាហ្វីលីពីនលាយឡំជាមួយភាសាអង់គ្លេសបន្តិចៗផងនោះ ប្រធានាធិបតី Duterte ផ្តោតសំខាន់លើគោលនយោបាយក្នុងស្រុក ជាពិសេសសង្គ្រាមប្រឆាំងគ្រឿងញៀនរបស់លោកដែលជារឿងចម្រូងចម្រាសនោះ។ លោកថែមទាំងបញ្ជាក់ជាថ្មីថា លោកមិនបញ្ឈប់សង្គ្រាមនេះឡើយ ហើយអ្វីដែលសំខាន់លោកត្រៀមខ្លួនប្រឈមមុខជាមួយតុលាការព្រហ្មទណ្ឌអន្តរជាតិផងដែរ។

បើតាមការសាកសួររបស់សារព័ត៌មានទៅ ប្រជាជនហ្វីលីពីនដែលរស់នៅកម្ពុជា ពួកគេភាគច្រើនបានបង្ហាញការគាំទ្រចំពោះចំណាត់ការរបស់ប្រមុខរដ្ឋហ្វីលីពីនលោក Rodrigo Duterte ក្នុងការកម្ចាត់គ្រឿងញៀននេះ។ ពួកគេចាត់ទុកថា ប្រព័ន្ធផ្សព្វផ្សាយ និងប្រតិកម្មកន្លងមករបស់ក្រុមសិទ្ធិមនុស្សជាអ្វីដែលធ្វើឡើងដើម្បីឲ្យលោក Duterte មានរូបភាពអាក្រក់ប៉ុណ្ណោះ។

លោក Jay Lan Capungan ជាគ្រូបង្រៀនភាសាអង់គ្លេសដែលរស់នៅកម្ពុជា ៥ឆ្នាំហើយមកនោះ បានទៅចូលរួមក្នុងជំនួបជាមួយប្រធានាធិបតីដែរនោះបានបញ្ជាក់ថា លោកមានអារម្មណ៍រីករាយខ្លាំងដែលបានជួបជាមួយលោក Duterte ជាលើកដំបូងបំផុត។ ជាប្រជាជនមកពីកោះ Mindanao ដូចលោក Duterte ដែរនោះ លោក Jay Lan Capungan បានបញ្ជាក់ប្រាប់អ្នកសារព័ត៌មានថ្មីៗថា លោកគិតថាគោលនយោបាយប្រឆាំងគ្រឿងញៀនរបស់លោក Deterte ជារឿងសំខាន់ព្រោះ បញ្ហាគ្រឿងញៀននៅហ្វីលីពីនវាជារឿងស្មុគស្មាញ។

«បើតាមខ្ញុំយល់ គ្រឿងញៀននេះជារឿងស្មុគស្មាញ។ តាំងពីខ្ញុំមិនទាន់កើតផង គ្រឿងញៀនវាមានវត្តមានគ្រឿងញៀនរួចទៅហើយ។ ដូច្នេះហើយវាចាំបាច់ត្រូវមានដំណោះស្រាយដូចអ្វីដែលលោក Duterte បានធ្វើ »។

ចំណែក កញ្ញា AJ ដែលបំពេញការងារជាគ្រូបង្រៀនសង្គមវិជ្ជានៅកម្ពុជាជាច្រើនឆ្នាំមកនោះបានបង្ហាញការយល់ឃើញស្រដៀងគ្នាដែរ។

«ខ្ញុំគាំទ្រគោលនយោបាយរបស់លោក Duterte តែខ្ញុំមិនគាំទ្រការសម្លាប់ក្រៅប្រព័ន្ធតុលាការឡើយ។ ប៉ុន្តែដូចខ្ញុំបញ្ជាក់ដូច្នេះថា វាជាគោលនយោបាយដែលសម្លាប់ជនដែលជួញដូរគ្រឿងញៀនប៉ុណ្ណោះ ហើយដរាបណាវាស្ថិតក្រោមកំណត់នៃច្បាប់»។

សួរថាតើយល់ឃើញបែបណាចំពោះប្រតិកម្មនិងការរិះគន់របស់សហគមន៍អន្តរជាតិលើសង្គ្រាមគ្រឿងញៀន កញ្ញា AJ បានលើកឡើងថា វាជាចេតនាដែលធ្វើឲ្យលោក Duterte បាត់បង់ប្រជាប្រិយភាពនិងមានរូបភាពអាក្រក់ប៉ុណ្ណោះ។

ប្រជាជនហ្វីលីពីនដែលរស់នៅកម្ពុជាម្នាក់ លោក Velmor Velila ដែលជាគ្រូបង្រៀនភាសាអង់គ្លេសដែរនោះ បានអះអាងថា ប្រជាជនហ្វីលីពីនគាំទ្រសង្គ្រាមនេះព្រោះវាជាការរក្សាសុវត្ថិភាព និង សន្តិសុខរបស់ប្រទេសជាតិទាំងមូល។ ហើយលោកជឿជាក់ថា ប្រព័ន្ធផ្សព្វផ្សាយធ្វើឲ្យគោលនយោបាយប្រឆាំងគ្រឿងញៀននេះចម្រូងចម្រាស។

«ខ្ញុំស្គាល់គាត់ច្បាស់, យើងស្គាល់គាត់ច្បាស់។ ខ្ញុំរស់នៅក្រុងជាមួយលោក Duterte គឺទីក្រុង Davao ដែលជាក្រុងដែលល្អ និងគ្មានគ្រឿងញៀននោះ។ បញ្ហាធំនៅហ្វីលីពីនបច្ចុប្បន្នគឺគ្រឿងញៀន ហើយរឿងស្មុគស្មាញគឺដោយសារប្រព័ន្ធផ្សព្វផ្សាយបរទេស»។

លោកបន្តថា៖ «គ្មានអ្នកណាម្នាក់អាចបញ្ឈប់គាត់បានឡើយ ហើយវាជាអ្វីដែលគាត់ធ្វើដើម្បីសុវត្ថិភាពប្រជាជនហ្វីលីពីន ហើយយើងគាំទ្រគាត់»។

ថ្វីបើមានការគាំទ្រពីសំណាក់ប្រជាជនហ្វីលីពីនភាគច្រើនបែបនេះក្តី រយៈពេលមួយថ្ងៃមុនការអញ្ជើញមកដល់របស់ប្រធានាធិបតីហ្វីលីពីនខាងលើ ក្រុមប្រជាជនហ្វីលីពីនមានគ្នាប្រហែល ៥នាក់ បាននាំគ្នាបាតុកម្មតវ៉ា និងដាក់ញត្តិនៅមុខព្រះបរមរាជវាំង។

ពួកគេទាមទារឲ្យលោក Duterte បញ្ឈប់សង្គ្រាមប្រឆាំងគ្រឿងញៀន និងគោរពនីតិរដ្ឋ និងសិទ្ធិមនុស្សថែមទៀត។

សូមបញ្ជាក់បន្តិចថា បើយោងតាមរបាយការណ៍ផ្លូវការរបស់ស្ថានទូតហ្វីលីពីនប្រចាំប្រទេសកម្ពុជាគិតត្រឹមឆ្នាំ២០១៦ ប្រជាជនហ្វីលីពីនដែលរស់នៅកម្ពុជានិងបានចុះឈ្មោះជាផ្លូវការនៅស្ថានទូតមានប្រហែល ៦ពាន់នាក់៕