ជាតិ
លោក Duterte ផ្តល់អាហារូបករណ៍៦០កន្លែងដល់និស្សិតកម្ពុជា ប្រធានាធិបតី ហ្វីលីពីន ចាកចេញពីកន្លែងគោរពវិញ្ញាណក្ខន្ធព្រះបរមរតនកោដ្ឋព្រឹកថ្ងៃ១៤ ធ្នូ ឆ្នាំ ២០១៦
× ប្រធានាធិបតីហ្វីលីពីន Rodrigo Duterte បានសម្រេចជូនអាហារូបករណ៍ចំនួន ៦០ ដល់និស្សិតកម្ពុជាក្នុងពេលដែលលោកជួបពិភាក្សាជាមួយសម្តេចនាយករដ្ឋមន្ត្រី ហ៊ុន សែន។ នេះបើតាមគណនីហ្វេសប៊ុករបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជារដ្ឋមន្ត្រីទទួលបន្ទុកអមដំណើរប្រតិភូប្រធានាធិបតីហ្វីលីពីន។
ក្នុងជំនួបជាមួយសម្តេចនាយករដ្ឋមន្ត្រីហ៊ុន សែន ប្រធានាធិបតីហ្វីលីពីន Rodrigo Dutere បានជូនអាហារូបករណ៍ដល់និស្សិតកម្ពុជាចំនួន ៦០ កន្លែង។ ការផ្តល់អាហារូបករណ៍នេះក៏ធ្វើឡើងដើម្បីអបអរសាទរខួបលើកទី ៦០ នៃការបង្កើតទំនាក់ទំនងការទូតកម្ពុជា និងហ្វីលីពីនផងដែរ។
បើតាមលោក លោក ខៀវ កាញារីទ្ធ សម្តេច ហ៊ុន សែន បានចាត់តាំងឲ្យក្រសួងអប់រំយុវជន និងកីឡា អនុវត្តការងារពាក់ព័ន្ធអាហារូបករណ៍ទៅសិក្សានៅហ្វីលីពីននេះ។
សូមបញ្ជាក់ថា លោកប្រធានាធិបតីហ្វីលីពីន Rodrigo Duterte ស្ថិតក្នុងដំណើរទស្សនកិច្ចផ្លូវរដ្ឋជាលើកដំបូងរយៈពេលពីរថ្ងៃនៅកម្ពុជាចាប់ពីថ្ងៃទី១៣-១៤ ធ្នូ ដោយលោកក្លាយជាប្រធានាធិបតីហ្វីលីពីនទី ៥ដែលមកបំពេញទស្សនកិច្ចនៅកម្ពុជា។ ដំណើរទស្សនកិច្ចនេះ ធ្វើឡើងតបតាមការអញ្ជើញរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា៕
© រក្សាសិទ្ធិដោយ thmeythmey.com