ជាតិ
នយោបាយជាតិ
គណបក្សកាន់អំណាចកំពុងរៀបចំសន្និបាតចុងសប្តាហ៍នេះនៅកោះពេជ្រ រូបភាពពីហ្វេកប៊ុកសម្តេច ហេង សំរិន
× គណបក្សប្រជាជនកម្ពុជាកំពុងរៀបចំធ្វើសន្និបាតលើកទី៤០ក្នុងរយៈពេល២ថ្ងៃនៃថ្ងៃចុងសប្តាហ៍នេះនៅមជ្ឈមណ្ឌលកោះពេជ្រ។ ប្រធានកិត្តិយសរបស់គណបក្ស គឺសម្តេច ហេង សំរិន និងប្រធានគណបក្ស គឺសម្តេច ហ៊ុន សែន បានដឹកនាំសន្និបាតនេះ។
របៀបវារៈចំនួន ២ សំខាន់ ដែលគណបក្សប្រជាជនកម្ពុជា គ្រោងនឹងពិភាក្សានៅក្នុងសន្និបាតនេះ។ នេះបើតាមការបញ្ជាក់របស់អ្នកនាំពាក្យនៃគណបក្សកាន់អំណាច គឺលោក សុខ ឥសាន ដែលបានថ្លែងប្រាប់សារព័ត៌មានថ្មីៗកន្លងមក។
របៀបវារៈទី ១ គណៈកម្មាធិការកណ្តាលគណបក្ស នឹងពិនិត្យមើល, វាយតម្លៃ សភាពការណ៍នយោបាយ សេដ្ឋកិច្ច និងផែនការ ដែលបានកើតឡើង និងបានអនុវត្ត បន្ទាប់ពីសន្និបាតលើកទី ៣៩ កាលពីឆ្នាំមុន។
របៀបវារៈមួយទៀត ដែលលោក ឥសាន បញ្ជាក់ថា គឺជារបៀបវារៈសំខាន់បំផុតនោះ គឺការកំណត់នូវយុទ្ធសាស្ត្រនយោបាយ សកម្មភាពនយោបាយ ដើម្បីត្រៀមបោះឆ្នោតយកជ័យជម្នះទាំងបោះឆ្នោតថ្នាក់ឃុំសង្កាត់ និងថ្នាក់ជាតិ នៅ២០១៧ និង ២០១៨ ។ អ្នកនាំពាក្យសង្កត់ធ្ងន់យ៉ាងដូច្នេះ៖«បោះឆ្នោតសំខាន់ណាស់ ដែលយើងត្រូវតែឈ្នះ ព្រោះយើងធ្វើគណបក្សនយោបាយគឺចង់ឈ្នះឆ្នោត»។
សូមបញ្ជាក់ថា នៅក្នុងមហាសន្និបាតវិសាមញ្ញគណបក្សប្រជាជនកម្ពុជា កាលពីឆ្នាំ ២០១៥ គណបក្សនេះ បានសម្រេចបោះឆ្នោតបញ្ចូលសមាសភាពសមាជិកគណៈកម្មាធិការកណ្តាលថ្មីចំនួន ៣០៦ រូប បន្ថែមលើសមាជិកដែលមានស្រាប់ចំនួន ២៦៨ រូប ។ សមាជិកថ្មីនេះ ភាគច្រើនជាយុវជនជំនាន់ក្រោយ និងស្ត្រី ផងដែរ៕
© រក្សាសិទ្ធិដោយ thmeythmey.com