ឃាតកម្មលោក កែម ឡី៖ លោក ខៀវ សុភ័គ មិនជឿលើចម្លើយសារភាពរបស់ជនសង្ស័យ ជួប សម្លាប់

ជាតិ

សង្គមជាតិ

ឃាតកម្មលោក កែម ឡី៖ លោក ខៀវ សុភ័គ មិនជឿលើចម្លើយសារភាពរបស់ជនសង្ស័យ ជួប សម្លាប់

21, Dec 2016 , 9:09 pm

រូបភាព

ដោយ: ថ្មីៗ

ភ្នំពេញ៖ ក្រោយពីបើកការស៊ើបអង្កេតតាមចម្លើយជនសង្ស័យដែលអះអាងបាញ់សម្លាប់លោក កែម ឡី អស់រយៈពេលច្រើនខែមកនោះ អ្នកនាំពាក្យក្រសួងមហាផ្ទៃ លោក ខៀវ សុភ័គ បានឲ្យដឹងថា ជនសង្ស័យ ជួប សម្លាប់ ដែលបាញ់សម្លាប់លោកបណ្ឌិត កែម ឡី នេះ មានចេតនាឆ្លើយបំភ្លៃសមត្ថកិច្ច។

តាមរយៈកិច្ចសម្ភាសន៍ដែលលោក ខៀវ សុភ័គ បានផ្ដល់ជូនវិទ្យុអាស៊ីសេរី នៅថ្ងៃទី២១ ធ្នូ បានឲ្យដឹងថា ក្រោយពីការសួរចម្លើយ និងការសារភាពរបស់ជនសង្ស័យ ជួប សម្លាប់ លោកមិនជឿថាចម្លើយសារភាពជាការពិតទេ។ អ្នកនាំពាក្យក្រសួងមហាផ្ទៃរូបនេះ បញ្ជាក់ដូច្នេះថា៖ «យើងបានសន្និដ្ឋានថា ជនល្មើសនេះមានចេតនាឆ្លើយបំភ័ន្តសមត្ថកិច្ច មិននិយាយការពិត។ យើងមិនជឿថា ជនល្មើសនេះឈ្មោះ ជួប សម្លាប់ មិនជឿថាជនល្មើសនេះឲ្យលុយ កែម ឡី ខ្ចី ៣ពាន់។ យើងមើលទី១ ជួប សម្លាប់ វាមិនដែលខ្មែរយើងអ្នកណាឈ្មោះ ជួប សម្លាប់ ទេ អាសម្លាប់ អាងាប់ទេ។ ទី២ កែម ឡី ជំពាក់លុយគេ ៣ពាន់ គឺអត់មានសោះ។ ទី៣ ឈ្មោះ អាលីស លក់កាំភ្លើងឲ្យវា ថាតម្លៃ ៣ពាន់ដុល្លារដែរ ហើយថាឈ្មោះប៉ូលិសនៅថៃ ទៅរកឯណាឃើញ? មិនប្រាប់ទីកន្លែង»។

ការមិនជឿលើចម្លើយសារភាពរបស់ជនសង្ស័យ ជួប សម្លាប់ ដែលលោក ខៀវ សុភ័គ បានលើកឡើងនេះ គឺស្របពេលដែលប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេតនិងទំនាក់ទំនងរដ្ឋសភា ព្រឹទ្ធសភា លោក អេង ឆៃអ៊ាង គ្រោងកោះហៅរដ្ឋមន្ត្រីក្រសួងមហាផ្ទៃសម្ដេច ស ខេង មកសាកសួរព័ត៌មានបន្ថែមជុំវិញករណីលោក កែម ឡី នៅថ្ងៃទី១២ មករា ខាងមុខនេះ។

អ្នកស្រាវជ្រាវ និងជាអ្នកវិភាគ លោក កែម ឡី ត្រូវបានឃាតករបាញ់សម្លាប់កាលពីថ្ងៃទី១០ កក្កដា ឆ្នាំ២០១៦ នៅក្នុងស្តាម៉ាតមួយ នាស្ថានីយ៍សាំងកាល់តិច Caltex ក្បែរស្តុបបូកគោ ក្នុងរាជធានីភ្នំពេញ ។ ភ្លាមៗក្រោយឃាតកម្មទៅលើលោក កែម ឡី សមត្ថកិច្ចបានចាប់ខ្លួនឃាតករ ដែលបានអះអាងថាឈ្មោះ ជួប សម្លាប់។ ប៉ុន្តែ ជាង៥ខែហើយ ដែលគ្រួសារសពលោក កែម ឡី នៅតែទាមទាឲ្យសមត្ថកិច្ចជួយរកយុត្តិធម៌ជូន លោក កែម ឡី ព្រមទាំងបញ្ចេញវីដេអូពីកាមេរ៉ាសន្តិសុខរបស់ហាងសាំងកាល់តិចនោះផង ៕