ជាតិ
សង្គមជាតិ
កម្ពុជា នឹងស្នើសុំបដិមាព្រះឥសូរ ពីសហរដ្ឋអាមេរិក រូបពី(Shiva on Nancy Wiener Gallery)
× ភ្នំពេញ៖ កម្ពុជា នឹងដាក់សំណើសុំវត្ថុបុរាណមួយ ពីសហរដ្ឋអាមេរិកវិញ ក្រោយពីប៉ូលីសអាមេរិកបាន ចាប់ខ្លួនអ្នកស្រី Nacy Wiener ដែលជាឈ្មួញជួញដូរវត្ថុបុរាណពីតំបន់អាស៊ី កាលពីថ្ងៃពុធកន្លងទៅ។
ប្រធាននាយកដ្ឋានសារមន្ទីជាតិ លោក គង់ វីរៈ បានឲ្យដឹងថា កម្ពុជាកំពុងទាក់ទងរដ្ឋាភិបាលសហរដ្ឋអាមេរិក ស្នើសុំរូបបដិមាព្រះឥសូរ ក្នុងសតវត្សទី១១ ដែលត្រូវបានឈ្មួញជួញដូរវត្ថុបុរាណឈ្មោះ Nacy Wiener ប្រមូលទិញពីតំបន់អាស៊ីសម្រាប់លក់បន្តនោះ មករក្សាក្នុងសារមន្ទីជាតិវិញ។ លោក គង់ វីរៈ បានបន្ថែមថា ក្រៅពីរូបព្រះឥសូរនេះ កម្ពុជាក៏សហការជាមួយសហរដ្ឋអាមេរិក ដើម្បីសុំពិនិត្យមើលវត្ថុបុរាណដែលរឹបអូសបាន ពីឈ្មួញម្នាក់នោះថា តើមានវត្ថុបុរាណណាខ្លះដែលមានប្រភពចេញពីប្រទេសកម្ពុជាមុននឹងត្រូវបានធ្លាក់ទៅ លើដៃជននេះ។
ថ្លែងប្រាប់សារព័ត៌មានថ្មីៗ ប្រធាននាយកដ្ឋានសារមន្ទីជាតិរូបនេះ បានបញ្ជាក់ដូច្នេះថា៖ «វាជាដំណឹងល្អណាស់ សម្រាប់យើង ដែលអាមេរិកបានចាប់ឈ្មួញជួញដូរវត្ថុបុរាណក្នុងតំបន់អាស៊ីនេះ។ ជាជំហានដំបូងនេះយើងបន្ត តាមដានរឿងនេះជាមួយអាមេរិក ហើយយើងបានដាក់ពាក្យសុំរូបព្រះឥសូរមួយ ក្នុងចំណោមរូបបដិមាផ្សេងទៀត ដែលយើងបានឃើញក្នុងការផ្សព្វផ្សាយតាមសារព័ត៌មាននោះ មករក្សាទុកវិញ ព្រោះយើងធ្លាប់ប្តឹងទៅអាមេរិកឲ្យជួយបញ្ឈប់ការលក់ដូររូបព្រះឥសូរនេះ ហើយប្រគល់មកឲ្យយើងវិញ កាលពីប៉ុន្មានខែមុន»។
បើតាមការចុះផ្សាយរបស់សារព័ត៌មានភ្នំពេញប៉ុស្ត៍ជាភាសាអង់គ្លេស អ្នកស្រី Nacy Wiener ដែលជាឈ្មួញជួញ ដូរវត្ថុបុរាណខុសច្បាប់ពីតំបន់អាស៊ីនោះ ត្រូវបានប៉ូលីសអាមេរិកចាប់ ខ្លួននៅក្នុងទីក្រុង New York កាលពីថ្ងៃ ទី២១ ធ្នូ នៅអំឡុងពេលដែលឈ្មួញរូបនេះកំពុងលក់វត្ថុបុរាណ ដែលត្រូវបានលួចចេញពីប្រទេសកម្ពុជានោះ បន្តទៅឲ្យអ្នកដែលចូលចិត្តទិញវត្ថុបុរាណ។ អ្នកស្រី Nacy Wiener គឺជា ឈ្មួញជួញដូរវត្ថុបុរាណខុសច្បាប់នៅក្នុង ជំនាន់ទីពីរនៃគ្រួសាររបស់នាង ដែលបានធ្លាប់លក់វត្ថុបុរាណទៅឲ្យលោក John D Rockefeller III and Jacqueline Kennedy ក្នុងតម្លៃជាច្រើនលានដុល្លារ។ វត្ថុបុរាណដែលឈ្មួញលក់ចេញនេះ ភាគច្រើនគឺនាំចេញពី ប្រទេសកម្ពុជា ថៃ និងឥណ្ឌា។
កាលពីខែមីនាកន្លងមក ប៉ូលីសអាមេរិក ក៏បានលួចវាយឆ្មក់ចូលបន្ទប់តាំងវត្ថុបុរាណខុសច្បាប់របស់នាង Nacy Wiener នេះ ដែលបានរកឃើញថា មានរូបបបិមាព្រះពុទ្ធធ្វើពីសំរឹទ្ធក្នុងសតវត្សទី១០ ដោយបានដាក់លក់ក្នុងតម្លៃ ៨៥ម៉ឺនដុល្លារអាមេរិក។ រូបបដិមាព្រះពុទ្ធនេះ ត្រូវបានប៉ូលីសអាមេរិក សន្និដ្ឋានថា អាចនាំចេញពីប្រទេសកម្ពុជា ឬប្រទេសថៃ។ នាង Nacy Wiener និងអ្នករួមគំនិតជាមួយនាង បានចាប់ផ្ដើមរកស៊ីជួញដូរវត្ថុបុរាណខុសច្បាប់ កាលពីដើមឆ្នាំ១៩៩៩មក។ ហើយពួកគេ បានលាក់ទុកវត្ថុបុរាណដែលទិញពីតំបន់អាស៊ីនេះ ដោយលក្ខណៈ បច្ចេកទេស និងលក់ដូរយ៉ាងប្រុងប្រយ័ត្នបំផុត។ នេះបើយោងតាមឯកសារពាក្យបណ្ដឹងរបស់តុលាការឧក្រិដ្ឋកម្ម Manhattan។ ដែលត្រូវបានដកស្រង់ដោយកាសែតភ្នំពេញប៉ុស្តិ៍។
ប្រធាននាយកដ្ឋានសារមន្ទីជាតិ លោក គង់ វីរៈ បាននិយាយថា វត្ថុបុរាណដែលកម្ពុជាបានបាត់បង់មាន ចំនួនច្រើនណាស់ ដែលមិនអាចកំណត់បានទេ «ដូច្នេះយើងត្រូវការតាមដានរកវត្ថុបុរាណនេះ ព្រោះនាង(Nacy Wiener ) ជាឈ្មួញខុសច្បាប់ដ៏ធំ»។
កម្ពុជា និងសហរដ្ឋអាមេរិក បានចុះអនុស្សារណៈយោគយល់គ្នា ស្តីពីការប្រគល់វត្ថុបុរាណ កាលពីឆ្នាំ២០០៣ ៕
Tag:
វត្ថុបុរាណ
ឥសូរ
កម្ពុជា
អាមេរិក
© រក្សាសិទ្ធិដោយ thmeythmey.com