អន្តរជាតិ
គ្រូម្នាក់រៀបគម្រោងចាប់ជំរិតក្លែងក្លាយដើម្បីដើរតួជាវីរបុរសសង្គ្រោះសិស្សដែលខ្លួនលួចស្រឡាញ់
× រុស្ស៊ី៖ គ្រូបង្រៀនម្នាក់នៅទីក្រុង Saint Petersburg ប្រទេសរុស្ស៊ី ត្រូវបានចាប់ខ្លួនកាលពីពេលថ្មីកន្លងមកនេះ ពីបទបង្កើតគម្រោងចាប់ជំរិតក្លែងក្លាយដើម្បីទាក់ចិត្តសិស្សស្រីដែលខ្លួនស្រឡាញ់។ នេះបើយោងតាមការផ្សាយរបស់ទីភ្នាក់ងារព័ត៌មាន AFP។
គ្រូបង្រៀនវ័យ៦០ឆ្នាំម្នាក់ បានធ្លាក់ក្នុងអន្លង់ស្នេហ៍កូនសិស្សរបស់ខ្លួនដែលមានវ័យត្រឹមតែ២៤ឆ្នាំ។ ដើម្បីទាក់ទាញសិស្សស្រីឲ្យចាប់អារម្មណ៍ខ្លួន គ្រូរូបនោះ បានសម្រេចបានគម្រោងចាប់ជម្រិតក្លែងក្លាយមួយ កាលពីអំឡុងខែវិច្ឆិកា ឆ្នាំ២០១៥ ។
គណៈកម្មការស៊ើបអង្កេតក្រុង Vyborg ដែលជាប់ព្រំប្រទល់ប្រទេសហ្វាំងឡង់ បានឲ្យដឹងថា គ្រូបង្រៀនដែលមិនត្រូវបានបញ្ចេញអត្តសញ្ញាណ បានជួលបុរស២នាក់ក្នុងតម្លៃ១១ម៉ឺនដុល្លារអាមេរិក ឲ្យក្លែងខ្លួនធ្វើជនចាប់ជម្រិតសិស្សខ្លួន ហើយគាត់ដើរតួជាវីរបុរសជួយសង្គ្រោះ។ គំនិតសំខាន់របស់គ្រូបង្រៀននោះ គឺធ្វើយ៉ាងណាទាក់សិស្សស្រីដ៏ស្រស់ស្អាតឲ្យបាក់ចិត្តស្រឡាញ់ខ្លួន។
សកម្មភាពចាប់ជំរិតក្លែងក្លាយ បានកើតឡើងកាលពីថ្ងៃទី១១ ខែវិច្ឆិកា ឆ្នាំ២០១៥ ដោយជនចាប់ជម្រិតក្លែងក្លាយ បានយកកាំភ្លើងភ្ជង់គ្រូបង្រៀន និងសិស្សរបស់ខ្លួន ហើយនាំទៅកាន់រូងមួយដ៏ជ្រៅ។ មិនដល់២៤ម៉ោង គ្រូបង្រៀនរូបនោះ រកមធ្យោបាយចេញពីរូងនោះ បានដោយជោគជ័យ។
ទោះបីជាយ៉ាងណាក៏ដោយ គម្រោងនោះ បានបែកធ្លាយ បន្ទាប់ពីប៉ូលិសចាប់បានជនសង្ស័យម្នាក់ ហើយជនសង្ស័យនោះ បានឆ្លើយដាក់គូកនរបស់ខ្លួនម្នាក់ទៀត ដោយរៀបរាប់គ្មានសល់ទាក់ទងនឹងផែនការចាប់ជំរិតក្លែងក្លាយ។
ខណៈដែលគ្រូបង្រៀន និងអ្នកស៊ីឈ្នួល ត្រូវប្រឈមចំពោះមុខច្បាប់ សិស្សស្រីដែលរងគ្រោះ កំពុងស្ថិតក្រោមការយកចិត្តទុកដាក់ពីពេទ្យចិត្តសាស្ត្រផងដែរ ដោយសារតែនាងមានការវិលវល់អារម្មណ៍យ៉ាងខ្លាំង ក្រោយព្រឹត្តិការណ៍ចាប់ជំរិត៕
© រក្សាសិទ្ធិដោយ thmeythmey.com