ជាតិ
សេដ្ឋកិច្ច
ពង្រីកព្រលានយន្តហោះក្រុងព្រះសីហនុដើម្បីត្រៀមទទួលអ្នកដំណើរបាន៥សែននាក់
ប្រភពរូបភាព៖ Cambodia Airports
×![]()
ក្រុមហ៊ុនវិនិយោគព្រលានយន្តហោះ (Cambodia Airports) បានបើកការដ្ឋានពង្រីកស្ថានីយ៍អ្នកដំណើរនៃអាកាសយានដ្ឋានអន្តរជាតិខេត្តព្រះសីហនុកាលពីចុងសប្តាហ៍កន្លងទៅ។ ពិធីសម្ពោធបើកការដ្ឋានដែលត្រូវបានរៀបចំឡើងក្រោមវត្តមានលោក សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី គឺជាផ្នែកមួយនៃគម្រោងអភិវឌ្ឍព្រលានយន្តហោះអន្តរជាតិរបស់កម្ពុជាដែលមានតម្លៃ២ពាន់លានដុល្លារ រហូតដល់ឆ្នាំ២០៤០។
ក្រុមហ៊ុន Cambodia Airports បានចាប់ផ្តើមពង្រីកអាកាសយានដ្ឋានអន្តរជាតិខេត្តព្រះសីហនុដើម្បីឆ្លើយតបទៅនឹងកំណើននៃភ្ញៀវទេសចរដែលធ្វើដំណើរទៅរមណីយដ្ឋានមាត់សមុទ្រនៅក្នុងខេត្តនេះ។ ចំនួនអ្នកធ្វើដំណើរតាមផ្លូវការអាកាសទៅកាន់ខេត្តព្រះសីហនុដែលមានចំនួន១០ម៉ឺននាក់ហើយនៅក្នុងខែតុលា ត្រូវបានគេរំពឹងថា នឹងកើនដល់១៥ម៉ឺននាក់ នៅចុងឆ្នាំ២០១៦នេះ។
យោងតាមសេចក្តីប្រកាសព័ត៌មានរបស់ក្រុមហ៊ុន Cambodia Airports ការដ្ឋានពង្រីកអាកាសយានដ្ឋានអន្តរជាតិខេត្តព្រះសីហនុនឹងអាចបញ្ចប់នៅចុងឆ្នាំ២០១៧ ឬដើមឆ្នាំ២០១៨។ សេចក្តីប្រកាសព័ត៌មានដដែលសរសេរយ៉ាងដូច្នេះថា៖«ការពង្រីកស្ថានីយ៍អ្នកដំណើរ ត្រូវបានធ្វើឡើងដើម្បីអាចទទួលអ្នកដំណើរបាន៥០ម៉ឺននាក់ក្នុងមួយឆ្នាំ។ ការដ្ឋានទាំងនោះរួមមាន៖ ការបង្កើនហាងទំនិញ អាហារដ្ឋាន និងសេវាផ្សេង ការសាងសង់ផ្លូវរត់ថ្មីរបស់យន្តហោះ ដើម្បីអាចទទួលយន្តហោះធុនធំ និងការពង្រីកផ្លូវរត់បច្ចុប្បន្ន»។
លោកឧបនាយករដ្ឋមន្ត្រីសុខ អាន ដែលបានធ្វើជាអធិបតីនៅក្នុងការសម្ពោធបើកការដ្ឋានកាលពីព្រឹកថ្ងៃទី២៤ធ្នូនោះ បានបង្ហាញការចាប់អារម្មណ៍ខ្ពស់ចំពោះគម្រោងពង្រីកស្ថានីយ៍អ្នកដំណើរនៃអាកាសយានដ្ឋានអន្តរជាតិខេត្តព្រះសីហនុនេះ។
«វាគ្មានភាពចាំបាច់ក្នុងការសាងសង់ពង្រីកបន្ថែមស្ថានីយ៍អ្នកដំណើរនេះទេ ប្រសិនបើគ្មានកំណើនទេសចរយ៉ាងខ្លាំងក្លានោះ។ យើងពិតជាមានមោទនភាពជាមួយនឹងការកើននៃចំនួនទេសចរ»។ នេះជាការអត្ថាធិប្បាយរបស់លោក សុខ អាន រដ្ឋមន្ត្រីនៃទីស្តីការគណៈរដ្ឋមន្ត្រីនៅក្នងពិធី ដោយលោកបញ្ជាក់បន្ថែមថា ក្នុងឆ្នាំ២០១៥ អាកាសយានដ្ឋានអន្តរជាតិទាំងបីរបស់កម្ពុជា ទទួលបានអ្នកដំណើរសរុបប្រមាណ៦លាន៥សែននាក់ ដោយមានកំណើន៣០០ភាគរយ បើប្រៀបធៀបនឹងឆ្នាំ២០០៥ ដែលពេលនោះមានចំនួនតែ២លាន១សែននាក់។ គួររម្លឹកថា កម្ពុជាបានស្គាល់កំណើនទេសចរបរទេសជារៀងរាល់។ នៅឆ្នាំ២០១៥ ទេសចរបរទេសចំនួន៤លាន៧សែននាក់បានមកទស្សនាកម្ពុជា ដែលធ្វើឲ្យវិស័យឧស្សាហកម្មគ្មានផ្សែងនេះបានរួមចំណែក១៧ភាគរយនៃផលិតផលក្នុងស្រុកសរុបរបស់កម្ពុជា។ រដ្ឋាភិបាលរំពឹងថា កម្ពុជានឹងអាចទទួលទេសចរបរទេសពី៧ទៅ៨លាននាក់នៅឆ្នាំ២០២០៕
Tag:
ព្រលានយន្តហោះ
ក្រុងព្រះសីហនុ
Vinci
Cambodia airport
© រក្សាសិទ្ធិដោយ thmeythmey.com
