ជាតិ
ឯកអគ្គរាជទូតខ្មែរនៅកូរ៉េខាងត្បូង ផ្ញើសារអបអរឪពុកដែលក្លាយជាឯកអគ្គរាជទូតខ្មែរនៅថៃ
លោក ឡុង ឌីម៉ង់ នៅខាងឆ្វេង រីឯលោក ឡុង វីសាលោ នៅខាងស្ដាំ
×![]()
ដោយ: ថ្មីៗ
ភ្នំពេញ៖ ឯកអគ្គរាជទូតខ្មែប្រចាំប្រទេសកូរ៉េខាងត្បូងលោក ឡុង ឌីម៉ង់ ផ្ញើសារសាទរឪពុកខ្លួនលោក ឡុង វិសាលោ ដែលត្រូវបានតែងតាំងជាឯកអគ្គរាជទូតខ្មែរប្រចាំប្រទេសថៃ។
«ឥឡូវយើងជាសហការីគ្នាហើយ ប៉ុន្តែជាសហការីដ៏អស្ចារ្យដែលខ្ញុំសូមគោរពក្រោមជើងរបស់ពុក»។ នេះជាសំណេរអមជាមួយរូបថតពីរនាក់ឪពុកកូន ដែលលោក ឡុង ឌីម៉ង់ កំពុងបំពេញតួនាទីនៅកូរ៉េខាងត្បូង បានសរសេរលើហ្វេសប៊ុកដូច្នេះថា៖«សូមជូនពរលោកឪពុកជាទីគោរពនិងស្រលាញ់ស្មើជីវិត ដែលស្ទើរមួយជីវិតរបស់គាត់បានលះបង់សេចក្តីសុខដើម្បីជាតិ ប្រជាជន និងពូនជ្រុំលើកកិត្តិយសគ្រួសារមួយឲ្យថ្លៃថ្នូរក្នុងសង្គម…។ សង្ឃឹមថាពុកនឹងរីករាយបំពេញកិច្ចការចុងក្រោយនៃជីវិតការងារដើម្បីឧត្តមប្រយោជន៏ជាតិនិងប្រជាជនយើង»។
ទន្ទឹមគ្នានេះដែរឯកអគ្គរាជទូតខ្មែរប្រចាំប្រទេសកូរ៉េខាងត្បូងរូបនេះ បានលើកឡើងពីដំបូន្មានលោក ឡុង វិសាលោ ដែលតែងតែបណ្ដុះបណ្ដាល និងណែនាំឲ្យខ្លួនចេះតស៊ូ និងអត់ធ្មត់ក្នុងការងារដើម្បីបម្រើជាតិនិងពលរដ្ឋខ្មែរ។ «ខ្ញុំតែងតែយកដំបូន្មានពុកជាមេរៀនគូសវៀសលើមាគ៌ាជីវិតជាប់ជានិច្ច។ ខ្ញុំគ្មានថ្ងៃនេះទេបើមិនមានឈាមនិងញើសរបស់គាត់...កូនស្រលាញ់ពុកណាស់»។ នេះជាសំណេររបស់លោក ឡុង ឌីម៉ង់។
ព្រះមហាក្សត្រតែងតាំងមុខតំណែងលោក ឡុង វិសាលោ បច្ចុប្បន្នរដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ ជាឯកអគ្គរាជទូត វិសាមញ្ញ និងពេញសមត្ថភាពនៃព្រះរាជាណាចក្រកម្ពុជា ប្រចាំព្រះរាជាណាចក្រថៃ។ លោក ឡុង វិសាលោ ត្រូវឡើងកាន់តំណែងជំនួសអ្នកស្រី អ៊ាត សោភា ដែលជាឯកអគ្គរាជទូតប្រចាំថៃបច្ចុប្បន្ន៕
Tag:
ឡុង ឌីម៉ង់
ឡុង វិសាលោ
© រក្សាសិទ្ធិដោយ thmeythmey.com
