អន្តរជាតិ
២០១៦៖ ប្រទេសបំពុលពិភពលោកចិននិងអាមេរិកព្រមផ្តល់សច្ចាប័នកិច្ចព្រមព្រៀងអាកាសធាតុ
×
ការព្រមផ្តល់សច្ចាប័នលើកិច្ចព្រមព្រៀងស្តីពីអាកាសធាតុរបស់មហាអំណាចដែលបំពុលបរិស្ថានខ្លាំងជាគេមានអាមេរិកនិងចិនជាព្រឹត្តិការណ៍ប្រវត្តិសាស្ត្រមួយចាប់
កិច្ចព្រមព្រៀងនេះត្រូវបានគេបង្កើតឡើងនៅចុងឆ្នាំ ២០១៥ នៅក្នុងកិច្ចប្រជុំអាកាសធាតុនាទីក្រុងប៉ារីសប្រទេសបារាំង។
នៅដើមខែកញ្ញាកន្លងទៅ មហាអំណាចអាមេរិកនិងចិនបានសម្រេចផ្តល់សច្ចាប័នលើកិច្ចព្រមព្រៀងស្តីពីអាកាសធាតុដើម្បីឈានទៅដោះស្រាយបញ្ហាសកលនេះ។ ការសម្រេចផ្តល់សច្ចាប័នលើកិច្ចព្រមព្រៀងអាកាសធាតុក្រុងប៉ារីសដែលបង្កើតឡើងកាលពីចុងឆ្នាំ ២០១៥ ជារឿងមួយគួរឲ្យកត់សម្គាល់បំផុត។ នេះក៏ដោយសារមហាអំណាចទាំងពីរនេះសុទ្ធតែជាអ្នកបំពុលពិភពលោកខ្លាំងជាងគេដែរ។
មេដឹកនាំអាមេរិក លោកបារ៉ាក់ អូបាម៉ា និងមេដឹកនាំចិនលោក ស៊ី ជិនពីង បានប្រគល់ឯកសារផ្លូវច្បាប់ពាក់ព័ន្ធការផ្តល់សច្ចាប័នជូន ប្រមុខអង្គការសហប្រជាជាតិលោក បាន គីមូន នៅថ្ងៃ ៣ ខែកញ្ញា ក្នុងពេលដែលចិនកំពុងធ្វើជាម្ចាស់ផ្ទះនៃកិច្ចប្រជុំក្រុមប្រទេស ២០។
អគ្គលេខាធិការអង្គការសហប្រជាជាតិរូបនេះ បានសរសើរការដឹកនាំដ៏ប៉ិនប្រសព្វនិងល្អប្រសើររបស់លោក ស៊ី ជិនពីង ក៏ដូចជាលោក បារ៉ាក់ អូបាម៉ា ដែលបានប្រឹងប្រែងដើម្បីសម្រេចបានការចូលរួមដោះស្រាយបញ្ហាប្រែប្រួលអាកាសធាតុពិភពលោករួមគ្នា។ ។
លោក បាន គីមូន បានអះអាងថា វាជាជំហានប្រវត្តិសាស្ត្រ ហើយលោកបានអំពាវនាវឲ្យបណ្តាប្រទេសដទៃទៀតដែលមិនទាន់បានផ្តល់សច្ចាប័នឬចូលរួមក្នុងកិច្ចព្រមព្រៀងឲ្យយកគំរូតាមចិន និងអាមេរិកផង។
ទាក់ទិនកិច្ចព្រមព្រៀងប៉ារីសស្តីពីអាកាសធាតុដែលត្រូវបានចុះហត្ថលេខាដោយប្រទេសជាសមាជិកតាំងពីខែធ្នូឆ្នាំមុនមកនោះមិនចូលជាធរមានភ្លាមៗឡើយ។ ដើម្បីចូលជាធរមាន វាត្រូវការប្រទេសជាសមាជិកយ៉ាងហោចណាស់ ៥៥ ដែលបញ្ចេញឧស្ម័នផ្ទះកញ្ចក់ស្មើនឹង ៥៥ភាគរយព្រមផ្តល់ច្ចាប័ន។ ដូច្នេះហើយ កិច្ចព្រមព្រៀងទើបចូលជាធរមានកាលពីដើមខែវិច្ឆិកាកន្លងទៅនេះប៉ុណ្ណោះ៕
© រក្សាសិទ្ធិដោយ thmeythmey.com