រដ្ឋមន្ត្រីដែនដី លោក ជា សុផារ៉ា សន្យាបន្តដោះស្រាយវិវាទដីធ្លីឲ្យចប់នៅឆ្នាំ២០១៧

ជាតិ

សង្គមជាតិ

រដ្ឋមន្ត្រីដែនដី លោក ជា សុផារ៉ា សន្យាបន្តដោះស្រាយវិវាទដីធ្លីឲ្យចប់នៅឆ្នាំ២០១៧

01, Jan 2017 , 8:00 am

រូបភាព

លោក ជា សុផារ៉ា រដ្ឋមន្ត្រីក្រសួងដែនដី នគរោបនីយកម្ម និងសំណង់

ដោយ:

ភ្នំពេញ៖ ថ្វីបើវិវាទដីធ្លីត្រូវបានដោះស្រាយបានច្រើនករណីរួចមកហើយក្នុងឆ្នាំ២០១៦ក្តី វានឹងនៅតែបន្តជាអាទិភាពមួយក្នុងចំណោមអាទិភាពធំៗមួយចំនួនដែល លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និយាយថាបានកំណត់ក្នុងផែនការ សម្រាប់ការរៀបចំដែនដី ឲ្យកាន់តែប្រសើរនៅក្នុងឆ្នាំ២០១៧ ។

លោក ជា សុផារ៉ា និយាយថា ចាប់តាំងពីពេលដែលលោក ត្រូវបានផ្លាស់មកកាន់ដំណែងបច្ចុប្បន្ននេះក្រសួងរបស់លោកបានរកដំណោះស្រាយបានច្រើនលើសលុបដល់វិវាទដីធ្លី ៧០០០ករណី គឺនៅសល់តែ ៧០០ករណីទៀតប៉ុណ្ណោះដែលនៅសេសសល់សម្រាប់លៃលកជាមួយនៅឆ្នាំខាងមុខ។

លោករដ្ឋមន្ត្រីរូបនេះនិយាយថា ចំណុចអាទិភាពបួនទៀតដែលក្រសួងនឹងបន្តយកចិត្តទុកដាក់ធ្វើនោះមាន ការចុះបញ្ជីដីធ្លី ការគ្រប់គ្រងនិងសុវត្ថិភាពសំណង់ ការពង្រឹងសមត្ថភាពមន្ត្រីក្នុងក្រសួង រៀបចំផែនការនគរូបនីយកម្ម និងការរៀបចំឆ្នេរសមុទ្រ។

លោករដ្ឋមន្ត្រីនិយាយបញ្ជាក់ថា ករណីការចុះបញ្ជីដីធ្លីនិងដោះស្រាយទំនាស់ដីធ្លីជាច្រើនសម្រេចរួចហើយ មុនដែលលោកត្រូវបានផ្ទេរចូលកាន់ដំណែងនៅក្រសួងដែនដីនៅដើមឆ្នាំ ខែមេសា ឆ្នាំ ២០១៦។

លោកប្រាប់សារព័ត៌មានថ្មីៗថា ក្នុងនោះក្រសួងបានផ្តល់ដីសម្បទានសង្គមកិច្ចដល់យោធិនចំនួន ១៦០០ផ្ទះ និងបណ្ណកម្មសិទ្ធិចំនួន ៤ ពាន់បណ្ណ ហើយក្រសួងត្រៀមដីពី ២ម៉ឺន៧ពាន់ហិកតា ក្នុងខេត្ត ១៣ សម្រាប់ ពួកគេទៀត។ លើសពីនេះទៀត លោក ជា សុផារ៉ា និយាយថា ក្រុមការងារចំនួន ២៧ ក្រុម ត្រូវបានបង្កើតឡើងដើម្បីចុះដោះស្រាយរាល់ទំនាស់ដីធ្លី ដែលកើតឡើងទូទាំងប្រទេសផងដែរ។

បន្ថែមលើនេះ ក្រសួងរៀបចំដែនដី នគរូបនីយកម្ម និងសំណង់ បានចេញបញ្ជាឲ្យអភិបាលរាជធានី ខេត្ត ទប់ស្កាត់ និងរុះរើសំណង់ខុសច្បាប់ ដែលសាងសង់រំលោភលើដីសាធារណៈ នៅទូទាំងប្រទេស។

លោកទេសរដ្ឋមន្ត្រីរូបនេះ ធ្លាប់បានបញ្ចេញសារយ៉ាងម៉ឺងម៉ាត់នេះ ពីស្រុកក្រូចឆ្មារ ខេត្តត្បូងឃ្មុំ ដែលជាស្រុកកំណើតរបស់លោក ក្នុងឱកាសដែលលោកចូលរួមសម្ពោធសមិទ្ធិផលនានានៅក្នុងវត្តចម្ការម្លូដែរថា៖«ឱកាស សម្រាប់អ្នកដែលរំលោភដីគេ គឺចប់ហើយ។ កុំសង្ឃឹមថា មកសូកខ្ញុំ ហើយធ្វើប្លង់ យកដីពីប្រជាជន»។

ក្រោយការព្រមានក្រុមអ្នកដែលតែងឃុបឃិត បន្លំយកដីធ្លីប្រជាជនយ៉ាងដាច់ណាត់នោះ លោក ជា សុផារ៉ា បានសង្កេតឃើញថា ករណីមន្ត្រីដែលឃុបឃិតក្នុងការកេងប្រវ័ញ្ចយកដីពលរដ្ឋថយចុះយ៉ាងច្រើន។

លោករដ្ឋមន្ត្រី ក៏បានសន្យាដែរថានឹងធ្វើការសើរើសំណុំ រឿងដីធ្លីរបស់ជនរងគ្រោះនៅសេសសល់ ដើម្បីបញ្ចប់ដោះស្រាយផ្តល់យុត្តិធម៌ដល់ពួកគេ។ លោកនិយាយដូច្នេះថា៖ «ខ្ញុំមកធ្វើការនៅទីនេះ មន្ត្រី និងពលរដ្ឋគាំទ្រការងាររបស់ខ្ញុំ ដូចនេះខ្ញុំត្រូវដោះស្រាយបញ្ហាជូនពួកគេវិញ»៕