អន្តរជាតិ
កាលពីឆ្នាំ២០១៦៖ អឺរ៉ុបរង្គោះរង្គើដោយសារព្រឹត្តិការណ៍ Brexit
× ក្រោយរងព្យុះភ្លៀងដោយសារវិបត្តិហិរញ្ញវត្ថុឆ្នាំ២០០៨ មកនោះ សហភាពអឺរ៉ុបក៏រងនូវបញ្ហាដ៏ធំមួយទៀត គឺការចាកចេញរបស់ចក្រភពអង់គ្លេស ដែលជាស្ថាបនិកស្នូល។ លទ្ធផលបោះឆ្នោតប្រជាមតិនៅចក្រភពអង់គ្លេសថ្ងៃទី២៣ ខែមិថុនា ធ្វើឲ្យតំបន់មួយនេះរង្គោះរង្គើយ៉ាងខ្លាំង ដ្បិតការចាកចេញរបស់អង់គ្លេស ជារឿងស្មានមិនដល់ និងគួរឲ្យភ្ញាក់ផ្អើលបំផុត។ ពេលនេះ ជំហាននៅសល់ គឺការចរចាដើម្បីចាកចេញផ្លូវការប៉ុណ្ណោះ។
ពិតណាស់ថា ការចាកចេញរបស់ចក្រភពអង់គ្លេស នឹងប៉ះពាល់ដល់សហភាពអឺរ៉ុបទាំងបញ្ហាសន្តិសុខ វិស័យសេដ្ឋកិច្ច និងនយោបាយ។ មេដឹកនាំអឺរ៉ុបដឹងយ៉ាងច្បាស់ថា ការបាត់បង់អង់គ្លេសមិនមែនជារឿងល្អសម្រាប់តំបន់នោះទេ ខណៈដែលអឺរ៉ុបទាំងមូលកំពុងតែប្រឈមមុខនឹងបញ្ហាជាច្រើនដូចជា ជនភៀសខ្លួន វិបត្តិបំណុលក្រិច និងការធ្លាក់ចុះក្នុងទំនាក់ទំនងជាមួយរុស្សីជាដើម។
ព្រឹត្តិការណ៍ថ្ងៃទី២៣ ខែមិថុនា ឆ្នាំ២០១៦ គឺជារឿងដែលមនុស្សភាគច្រើនមិនចង់ឲ្យកើតមានឡើយ។ ជារឿងចៀសមិនផុត ពលរដ្ឋចក្រភពអង់គ្លេស បានសម្រេចចាកចេញពីសហភាពអឺរ៉ុប។ ក្នុងចំណោមអ្នកដែលទៅបោះឆ្នោតសរុបមានចំនួន៧១.៩ភាគរយ នៃចំនួនអ្នកចុះឈ្មោះបោះឆ្នោតសរុប ដោយអ្នកបោះឆ្នោតចំនួន៥១.៩ភាគរយ បានបោះឆ្នោតចាកចេញពីតំបន់អឺរ៉ុប ខណៈពលរដ្ឋចំនួន៤៩.១ភាគរយ បោះឆ្នោតបន្តជាសមាជិកអឺរ៉ុប។
ជាមួយនឹងជ័យជម្នះទាំងប្រផិតប្រផើយសម្រាប់ការចាកចេញនេះ ចក្រភពអង់គ្លេស នឹងក្លាយជារដ្ឋជាសមាជិកអឺរ៉ុបទីមួយ ដែលចាកចេញពីសហភាពអឺរ៉ុប ក្នុងរយៈពេលជាង៦០ឆ្នាំមកនេះ។ សមាជិកសំខាន់ៗដូចជាបារាំង និងអាល្លឺម៉ង់ជាដើមព្រួយបារម្ភថា ការចាកចេញនេះ នឹងក្លាយជាគម្រូសម្រាប់ប្រទេសដទៃទៀត ដែលចង់ចាកចេញពីអឺរ៉ុបដែរ ប៉ុន្តែសហភាពអឺរ៉ុប ក៏មិនចេះតែចេញ ឬចូលស្រួលនោះដែរ។
ថ្វីត្បិតតែពលរដ្ឋចក្រភពអង់គ្លេសភាគច្រើន បោះឆ្នោតគាំទ្រការចាកចេញពីសហភាពអឺរ៉ុបក៏ដោយ ក៏មិនមានន័យថា ចក្រភពអង់គ្លេស លែងជាសមាជិកសហភាពអឺរ៉ុបនោះទេ។ នៅដំណាក់កាលនេះ ចក្រភពអង់គ្លេស នឹងនៅតែជាផ្នែកមួយនៃសហភាពអឺរ៉ុបដដែល។ ជំហានបន្ទាប់នោះ គឺចក្រភភពអង់គ្លេស នឹងជូនដំណឹងទៅអឺរ៉ុបពីការចាកចេញរបស់ខ្លួន ស្របតាមមាត្រា៥០ សន្ធិសញ្ញា Lisbon ។
តាមសន្ធិសញ្ញានេះ ទាំងចក្រភពអង់គ្លេស និងសហភាពអឺរ៉ុប ត្រូវចរចាគ្នា ជាមុនសិន ដើម្បីសម្រេចកិច្ចព្រមព្រៀងមួយដែលនាំដល់ការចាកចេញនេះ។ យ៉ាងណាមិញ ប្រសិនបើគ្មានកិច្ចព្រមព្រៀង ត្រូវបានសម្រេចទេនោះ គេត្រូវរង់ចាំដល់ទៅពីរឆ្នាំទៅមុខ ទើបច្បាប់ និងបទបញ្ញតិផ្សេងៗ របស់អឺរ៉ុប អស់សុពលភាពអនុវត្តក្នុងទឹកដីចក្រភពអង់គ្លេសតទៅទៀត។ មកទល់ពេលនេះ នាយករដ្ឋមន្ត្រី Theresa May មិនទាន់ចាប់ផ្ដើមការចរចានៅឡើយ ហើយគេក៏មិនដឹងថា ដំណើរការចរចាដែលកំណត់ដោយសន្ធិសញ្ញា Lisbon នឹងបញ្ចប់ដោយរបៀបម៉េចដែរ៕
© រក្សាសិទ្ធិដោយ thmeythmey.com