ជាតិ
×![]()
សៀមរាប៖ មជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គររបស់អាជ្ញាធរជាតិអប្សរា គឺជាមជ្ឈមណ្ឌលដែលផ្តោតលើការងារស្រាវជ្រាវនានាក្នុងតំបន់អង្គរ។ បច្ចុប្បន្នគម្រោងស្រាវជ្រាវ គឺមានទាំងគម្រោងកិច្ចសហប្រតិបត្តិការ និងគម្រោងស្រាវជ្រាវផ្ទាល់ ដែលប្រើធនធានខ្មែរសុទ្ធសាធ។ តើគម្រោងទាំងនោះមានអ្វីខ្លះ ហើយប្រទេសណាបានចូលរួមក្នុងការងារស្រាវជ្រាវទាំងនេះ?
ក្នុងបទសម្ភាសជាមួយលោក អ៊ឹម សុខរិទ្ធី អនុប្រធានមជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គរ ជាមួយសារព័ត៌មានថ្មីៗ លោកបានពន្យល់ជាច្រើនលើការងារស្រាវជ្រាវក្នុងឆ្នាំ២០១៦ ។ គម្រោងទាំងនោះមួយចំនួនធំជាការស្រាវជ្រាវលក្ខណៈកិច្ចសហប្រតិបត្តិការ និងខ្លះជាការងារចុះស្រាវជ្រាវផ្ទាល់ ដែលប្រើធនធានជាតិ។
គម្រោងដែលជាកិច្ចសហប្រតិបត្តិការ ក្នុងនោះរួមមាន គម្រោងរៀបចំនគរូបនីយកម្ម ការរៀបចំទឹកដី និងការប្រែប្រួលអាកាសធាតុ ដែលការងារនេះអាជ្ញាធរជាតិអប្សរាកំពុងធ្វើជាមួយខាងសាកលវិទ្យាល័យ ស៊ីដនី របស់អូស្ត្រាលី។ គម្រោងការរៀបចំដែនដីប្រាសាទនៅសម័យអង្គរ ការស្រាវជ្រាវនៅធ្វើជាបន្តបន្ទាប់ ដែលជាកិច្ចសហប្រតិបត្តិការរវាងអាជ្ញាធរជាតិអប្សរា និងភាគីបារាំង។ ការស្រាវជ្រាវនេះអាចឲ្យគេដឹងថា ប្រាសាទក្នុតំបន់អង្គរទាំងអស់ មិនមែនសុទ្ធតែបានសាងសង់ឡើងក្នុងសតវត្សរ៍ទី៩នោះទេ អាចមានមុនប្រហែល២០០ឆ្នាំ។
គម្រោងបន្ទាប់ គឺការសិក្សាលើកុលាលភាជន៍ និងគម្រោងសិក្សាពីរោងសិតសំរឹទ្ធ ដែលសហការជាមួយអូស្ត្រាលី និងសាលាបារាំងចុងបូព៌ា។ លោក សុខរិទ្ធី យល់ថា គម្រោងនេះមានសារសំខាន់ណាស់ ព្រោះអាចឲ្យគេដឹងថា ខ្មែរយើងមានរោងសិតសំរិទ្ធនៅក្បែរព្រះបរមរាជវាំង ហើយមានគុណភាព និងបច្ចេកទេសធ្វើល្អផ្តាច់គេ បើប្រៀបធៀបក្នុងតំបន់អាស៊ីបូព៌ា។ និងមួយទៀត គម្រោងសិក្សាពីវិស័យវប្បធម៌ ក្នុងតំបន់អាស៊ីដីគោក ដែលមានការចូលរួមពីភាគី ភូមា ថៃ ខ្មែរ និងឡាវ។ នេះជាគម្រោងបន្តពីគម្រោងស្រាវជ្រាវផ្លូវបុរាណរវាងថៃ ដែលក្នុងបំណងចង់ស្វែងរកវិសាលភាពនៃទំនាក់ទំនងតំបន់អាស៊ីដីគោក។
ដោយឡែក គម្រោងស្រាវជ្រាវផ្ទាល់របស់អាជ្ញាធរជាតិអប្សរា ដែលប្រើធនធានផ្ទាល់ មានពីរផ្នែកផ្សេងៗគ្នា។ ផ្នែកទីមួយ ការស្រាវជ្រាវលើបេតិកភណ្ឌអរូបី ដោយផ្តោតលើរឿង២សំខាន់ មានកិច្ចពិធីផ្សេងៗរបស់អ្នកស្រុកអង្គរ និងជីវភាពរស់នៅប្រចាំថ្ងៃ។ ផ្នែកទីពីរ ការស្រាវជ្រាវទូទៅ ដោយការងារនេះចែកជា៤ផ្នែក។ ទីមួយ ការសិក្សាពីវិស័យលោហៈកម្ម ទីពីរ គម្រោងសិក្សាពីផ្លូវដឹកថ្ម ទីបី គម្រោងស្វែងយល់ពីទំនាក់ទំនងកូនក្រុងនៅភ្នំគូលេន ជាមួយរាជធានីអង្គរ និងទីបួន ការស្រាវជ្រាវ សិក្សាពីគំនូរលើពើងថ្មនៅលើភ្នំគូលេន ដែលអាចឲ្យគេដឹងពីការតាំងទីរបស់មនុស្ស ការប្រែប្រួលបទដ្ឋាន និងសិល្បៈរបស់អ្នកស្រុកជាដើម។
ព័ត៌មានលម្អិត សូមស្តាប់បទសម្ភាសរវាងអ្នកសារព័ត៌មានថ្មីៗប្រចាំខេត្តសៀមរាប ជាមួយលោក អ៊ឹម សុខរិទ្ធី អនុប្រធានមជ្ឈមណ្ឌលអន្តរជាតិស្រាវជ្រាវនិងតម្កល់ឯកសារអង្គរ នៃអាជ្ញាធរជាតិអប្សរាដូចទៅ
Tag:
ការស្រាវជ្រាវ
រមណីយដ្ឋានអង្គរ
អ៊ឹម សុខរិទ្ធី
© រក្សាសិទ្ធិដោយ thmeythmey.com
