អន្តរជាតិ
អាជ្ញាធរតួកគី កំពុងរកមុខខ្មាន់កាំភ្លើងបាញ់សម្លាប់មនុស្ស៣៩នាក់ក្នុងក្លិបរាត្រីនាថ្ងៃឆ្លងឆ្នាំ
× អាជ្ញាធរតួកគី កំពុងញាប់ដៃជើងក្នុងការស្វែងរកជនដៃដៃល់ ដែលបានបាញ់សម្លាប់មនុស្ស៣៩នាក់នៅក្លឹបកំសាន្តក្នុងទីក្រុងអ៊ីស្តង់ប៊ុលនារាត្រីឆ្លងចូលឆ្នាំ២០១៧។ នេះការវាយប្រហារលើកដំបួងក្នុងឆ្នាំនេះ ប៉ុន្តែមិនទាន់មានក្រុមណាចេញមកទទួលខុសត្រូវនៅឡើយទេ ឯអាជ្ញាធរបានដាក់សង្ស័យលើក្រុមជ្រុលនិយមរដ្ឋឥស្លាម ខណៈក្រុមឃើដប្រកាសមិនពាក់ព័ន្ធសកម្មភាពនេះឡើយ។
មិនទាន់ទាំងឆ្លងឆ្នាំថ្មីស្រួលបួលផងនោះ តួកគីក៏រងការវាយប្រហាររន្ធត់មួយ ដោយខ្មាន់កាំភ្លើងបានបើកការបាញ់ប្រហារលើមនុស្សម្នាក្នុងក្លិបកំសាន្តរាត្រីដ៏កុះករក្នុងទីក្រុងអ៊ីស្តាន់ប៊ុល។ នៅពេលនេះ អាជ្ញាធរតួកគី កំពុងតាមប្រមាញ់ជនដៃដល់ ដែលបានគេចខ្លួនពីកន្លែងកើតហេតុ ក្រោយសម្លាប់មនុស្សអស់៣៩នាក់ និងជាង៧០នាក់ទៀតរបួស ក្នុងនោះបីនាក់របួសធ្ងន់ធ្ងរ។
សារព័ត៌មាន Al Jazeera ផ្សាយថា រដ្ឋមន្ត្រីមហាផ្ទៃតួកគី Suleyman Soylu បានហៅការបាញ់ប្រហារនេះជា ការសម្លាប់រង្គាល និងសាហាវឃោរឃៅអមនុស្សធម៌។ លោកនិយាយថា ក្រុមមន្ត្រីសន្តិសុខ កំពុងបើកប្រតិបត្តិការស្វែងរកជនដៃដល់ ដែលមានអាយុប្រហែល២០ឆ្នាំ និងនិយាយភាសាតួកគី។ លោកសង្ឃឹមថា ប៉ូលិស នឹងអាចចាប់ខ្លួនរូបគេក្នុងពេលដ៏ខ្លីខាងមុខ តាមបំណងព្រះជាម្ចាស់។
ចំណែកអាជ្ញាធរក្រុងអ៊ីស្តង់ប៊ុល បានអះអាងថា ខ្មាន់កាំភ្លើងខាងលើបានសម្លាប់ប៉ូលិសម្នាក់ និងជនស៊ីវិលម្នាក់នៅខាងក្រៅក្លឹបកំសាន្ត Reina ដ៏មានប្រជាប្រិយ មុននឹងសម្រុកចូលទៅបន្តសកម្មភាពបាញ់រះរបស់ខ្លួនលើមនុស្សម្នា ដែលកំពុងអបអរឆ្នាំថ្មីនៅក្នុងក្លឹបនេះ។ មនុស្សជាច្រើនបានលោតចូលទឹកទន្លេ ដើម្បីគេចខ្លួនពីការបាញ់ប្រហារដែលចំណាយពេលរហូត៧នាទី។
បើទោះជាគ្មានក្រុមជ្រុលនិយមចេញមកទទួលខុសត្រូវ អាជ្ញាធរតួកគី បានដាក់មុខសញ្ញាសង្ស័យលើក្រុមជ្រុលនិយមរដ្ឋឥស្លាម និងក្រុមឧទ្ទាមឃើដ ដ្បិតក្រុមទាំងពីរតែងស្ថិតនៅក្រោយការវាយប្រហារលលើកមុនៗ។ យ៉ាងណាមិញ ក្រុមចលនាឃើដ បានប្រកាសថា ខ្លួនមិនមែននៅពីក្រោយសកម្មភាពនេះទេ ដោយបញ្ជាក់ថា ខ្លួនវាយប្រហារគោលដៅមន្ត្រីសន្តិសុខតួកគី មិនមែនជនស៊ីវិលឡើយ។
ក្រោយការវាយប្រហារនេះ ការិយាល័យនាយករដ្ឋមន្ត្រីតួកគី ក៏បានចេញការណែនាំមួយទៅកាន់ក្រុមសារព័ត៌មាន ចៀសវាងការផ្សាយព័ត៌មានដែលបង្កការភ័យខ្លាច ចលាចល និងអសន្តិសុខនៅក្នុងប្រទេស។ ជាមួយគ្នានេះដែរ អាជ្ញាធរតួកគី ក៏បានបង្កើនការរឹតបន្តឹងសន្តិសុខក្នុងទីក្រុងធំៗរបស់ប្រទេស។ មន្ត្រីប៉ូលិសជាច្រើនពាន់នាក់ ក៏ត្រូវពង្រាយនៅតាមទីតាំងសំខាន់ក្នុងទីក្រុងអ៊ីស្តង់ប៊ុល និងរដ្ឋធានីអង់ការ៉ាផងដែរ៕
Tag:
តួកគី
Suleyman Soylu
© រក្សាសិទ្ធិដោយ thmeythmey.com