អន្តរជាតិ
មេដឹកនាំផ្ដាច់ការហ្កំប៊ី រិះគន់អាហ្វ្រិកខាងលិចដែលចង់ប្រើទ័ពទម្លាក់លោក
× ប្រធានាធិបតីក្រាញអំណាចហ្កំប៊ី យះយ៉ា ចាមេហ៍(Yahya Jammeh) បានរិះគន់អង្គការសហគមន៍សេដ្ឋកិច្ចអាហ្វ្រិកខាងលិច (ECOWAS) ដែលចង់ប្រើទ័ពបង្ខំឲ្យលោកចុះចេញពីតំណែង បន្ទាប់ពីលោកមិនទទួលស្គាល់បរាជ័យក្នុងការបោះឆ្នោតខែធ្នូ។ បើតាមលោក Jammeh ការលើក ទ័ពអន្តរាគមន៍ចូលទឹកដីហ្កំប៊ី ជាការប្រកាសសង្គ្រាម ហើយ ECOWAS ក៏មិនសក្តិសមជាអ្នកសម្របសម្រួលវិបត្តិនយោបាយរបស់ហ្កំប៊ីដែរ។
មេដឹកនាំផ្ដាច់ការក្រាញអំណាចរបស់ហ្កំប៊ី យះយ៉ា ចាមេហ៍(Yahya Jammeh) បានចេញមកព្រមានសហគមន៍សេដ្ឋកិច្ចអាហ្វ្រិកខាងលិច អេកូវាស (ECOWAS) ដែលបានត្រៀមទ័ពទម្លាក់លោកពីកៅអីប្រធានាធិបតី ក្រោយរងបរាជ័យក្នុងការបោះឆ្នោតថ្ងៃទី១ ខែធ្នូ។ លោក Jammeh អះអាងថា ការគំរាមប្រើទ័ពរបស់អង្គការ ECOWAS ជាការប្រកាសសង្គ្រាមប្រឆាំងហ្កំប៊ី តែកងទ័ពហ្កំប៊ី បានត្រៀមខ្លួនរូចរាល់ហើយ។
«ខ្ញុំប្រាប់ឲ្យច្បាស់! យើងត្រៀមខ្លួនដើម្បីការពារប្រទេសរបស់យើងពីការឈ្លានពានណាមួយរូចហើយ។ ប្រសិនបើ ECOWAS មិនដកថយទេ បញ្ហាអាចនឹងរាលដាលក្លាយជាប្រឈមមុខយោធាមិនខាន»។ នេះជាព្រមានក្នុងសាររបស់លោក Jammeh នៅក្នុងសារអបអរឆ្នាំថ្មីនៅថ្ងៃទី៣១ ខែធ្នូ ដែលផ្សាយដោយសារព័ត៌មាន Al Jazeera មុននឹងបន្តថា ECOWAS ក៍មិនអាចធ្វើតួអង្គកណ្ដាលបានដែរ ដ្បិតអង្គការនេះលម្អៀង។
ការលើកឡើងរបស់មេដឹកនាំកាន់អំណាច២២ឆ្នាំរូបនេះ ធ្វើឡើងបន្ទាប់ពី ប្រធានគណៈកម្មការ ECOWAS លោក ម៉ាសែល អាឡាំង ដឺ ស៊ូសា(Marcel Alain de Souza)គំរាមប្រើទ័ពប្រឆាំងរូបលោក។ លោក Souza បានអះអាងថា កងទ័ពសេណេហ្កាល់ ត្រៀមខ្លួនចូលអន្តរាគមន៍ក្នុងទឹកដី ហ្កំប៊ីដើម្បីទម្លាក់ប្រធានាធិបតីចាញ់ឆ្នោត Jammeh បើសិនជាការចរចារបស់អាហ្វ្រិកខាងលិចជាមួយប្រធានាធិបតីរូបហ្កំប៊ី ពាក់ព័ន្ធរឿងផ្ទេរអំណាចបរាជ័យនោះ។
ប្រធានាធិបតី Jammeh ដែលកាន់តំណែងតាំងពីឆ្នាំ១៩៩៤ មកនោះមានពេលវេលាដល់ត្រឹមថ្ងៃទី១៩ មករា ឆ្នាំ២០១៧ ដើម្បីរៀបចំផ្ទេរអំណាចឲ្យប្រធានាធិបតីទើបជាប់ឆ្នោតលោក អាដាម៉ា បូរ៉ូ(Adama Borrow)។ បើនៅតែមានះទៀត កងទ័ពអាហ្វ្រិកខាងលិចនឹងទៅទម្លាក់រូបលោក ដល់វិមានប្រធានាធិបតី ហើយលទ្ធផលដែលលោកអាចទទួលបានវានឹងអាក្រក់ជាងដើរចេញដោយខ្លួនឯង។
តាមពិតទៅ ក្រោយការដឹងលទ្ធផលបោះឆ្នោតថ្ងៃទី១ ខខែធ្នូ លោក Jammeh បានចេញមុខទទួលស្គាល់បរាជ័យរបស់ខ្លួននៅតាមវិទ្យុរដ្ឋទៅហើយ និងប្រកាសមិនតវ៉ាលទ្ធផលបរាជ័យនេះទៀតផង។ ប៉ុន្តែមួយសប្តាហ៍ក្រោយមក មេដឹកនាំរូបនេះបានក្រឡាស់សម្តីភ្លាមដោយលុបចោលលទ្ធផលបោះឆ្នោត និងទាមទារបោះឆ្នោតជាថ្មី ដោយអះអាងថា ការបោះឆ្នោតមានភាពមិនប្រក្រតី៕
Tag:
ហ្កំប៊ី
Yahya Jammeh
ECOWAS
© រក្សាសិទ្ធិដោយ thmeythmey.com