អន្តរជាតិ
យុវតីនីហ្សេរីយ៉ាដែលរស់ក្នុងធុងជ័រ បានទទួលមរណភាពក្នុងអាយុ១៩ឆ្នាំ
×
Rahma Haruna យុវតីនីហ្សេរីយ៉ាដែលរស់នៅក្នុងធុងជ័រ បានទទួលមរណភាពហើយក្នុងអាយុ១៩ឆ្នាំកាលពីថ្ងៃដែលគ្រឹស្តសាសនិកប្រារព្ធពិធីបុណ្យណូអែល។ នេះបើតាមអ្នកកាសែតឈ្មោះ Sani Maikatanga ដែលជាមនុស្សទីមួយផ្សព្វផ្សាយពីជីវិតរបស់ Ragma ទៅកាន់ពិភពលោក។
Rahma Haruna ចំណាយពេលពេញមួយជីវិតរបស់នាងនៅលើធុងជ័រមួយ បន្ទាប់ពីនាងកើតជំងឺដ៏ចម្លែក ដោយអវៈយវៈលែងមានការលូតលាស់ក្រោយនាងកើតបាន៦ខែ។ បើទោះបីជាលក្ខខណ្ឌរូបរាងនាងមិនអំណោយផលយ៉ាងណាក៏ដោយ ក៏យុវតីនីហ្សេរីយ៉ា Rahma តែងតែរីករាយក្នុងជីវិតដោយសារតែមានការយកចិត្តទុកដាក់ពីគ្រួសារ និងអ្នកជិតខាង។ នាងមានក្តីសុបិនបើកហាងលក់ដូរផ្ទាល់ខ្លួនមួយដើម្បីភ្ជាប់រូបនាងទៅនឹងមនុស្សផ្សេងទៀត។
Rahma Haruna ចាប់កំណើតនៅតំបន់ Kano ប្រទេសនីហ្សេរីយ៉ា ដូចមនុស្សទូទៅ ប៉ុន្តែឈានដល់អាយុ៦ខែ រាងកាយរបស់ជួបបញ្ហានៅពេលដែលនាងរៀនអង្គុយ។ អ្នកស្រី Fadi បានរៀបរាប់ក្នុងបទសម្ភាសមួយជាមួយ Daily Mail ថា៖ «ពេលដែល Rahma ចាប់ផ្តើមរៀនអង្គុយ បញ្ហាបានកើតឡើង ដោយនាងមិនអាចធ្វើចលនាបាននោះឡើយ។ នាងបានគ្រុនក្តៅ និងចុកចាប់ក្រពះ បន្ទាប់មក ដៃជើងរបស់នាង មិនអាចកំរើកបានទាំងអស់»។
ករណីជំងឺរបស់ Rahma មិនមានគ្រូពេទ្យណាព្យាបាលបាននោះឡើយ។ លោក Hussaini បានអះអាងប្រាប់ Daily Mail ដដែលថា លោកបានព្យាយាមអស់រយៈពេល១៥ឆ្នាំ និងចំណាយលុយជាច្រើនដើម្បីព្យាបាល Rahma ប៉ុន្តែមិនមានអ្វីវិវត្តទៅមុខនោះឡើយ។
Rahma ត្រូវចំណាយពេលនៅលើចានជ័រពេញមួយជីវិតរបស់នាង ហើយគ្រួសាររបស់នាងតែងតែរុញនាងទៅគ្រប់ទីកន្លែងដែលនាងចង់ទៅ។ នាងតែងតែមានស្នាមញញឹមជានិច្ច ដោយសារតែទទួលបាននូវក្តីស្រឡាញ់ពីអ្នកនៅជុំវិញខ្លួន ជាពិសេសប្អូនប្រុសអាយុ១០ឆ្នាំឈ្មោះ Fahad ដែលតែងតែស្ម័គ្រចិត្តរុញនាងទៅគ្រប់ទីកន្លែង។
កាលពីពេលនៅរស់រានមានជីវិត Rahma មិនគិតឆាជីវិតនាងចោលនោះឡើយ នាងតែងតែរស់នៅជាមួយក្តីសង្ឃឹមជានិច្ច។ នាងបានបញ្ជាក់ប្រាប់អ្នកសារព័ត៌មានថា៖ «អរគុណព្រះជាម្ចាស់ចំពោះអ្វីៗទាំងអស់។ ខ្ញុំចង់បានអាជីវកម្មមួយ ដែលអាចជាហាងទំនិញ ឬអ្វីដែលដែលមនុស្សទិញ នោះជាការបំណងប្រាថ្នារបស់ខ្ញុំ»៕
Tag:
នីហ្សេរីយ៉ា
Rahma Haruna
© រក្សាសិទ្ធិដោយ thmeythmey.com