អន្តរជាតិ
តុលាការបារាំង កាត់ទោសអនុប្រធានាធិបតីហ្គីណេអេក្វាទ័ររឿងប្រើលុយរដ្ឋដើម្បីភាពហ៊ឺហារផ្ទាល់ខ្លួន
× តុលាការបារាំង នឹងបើកសវនាកាត់ក្ដីសំណុំរឿងរបស់កូនប្រុសប្រធានាធិបតីហ្គីណេអេក្វាទ័រ លើសំណុំរឿងប្រើប្រាស់លុយរដ្ឋដើម្បីជីវិតហ៊ឺហារបស់ខ្លួនលើទឹកដីបារាំង។ នេះជាលើកដំបូងដែលតុលាការបារាំង កាត់ក្ដីមេដឹកនាំប្រទេសអាហ្វ្រិកដែលចូលចិត្តប្រើប្រាស់ថវិការដ្ឋ ក្នុងគោលដៅផ្ទាល់ខ្លួន តាមរយៈការទិញផ្ទះធំៗ និងការទិញរថយន្តស៊េរីទំនើបៗជាដើម។
លោក Teodorin Obiang កូនប្រុសប្រធានាធិបតីផ្ដាច់ការហ្គីណេអេក្វាទ័រ Teodoro Obiang Nguema នឹងត្រូវឡើងតុលាការបារាំងនៅថ្ងៃទី២ ខែមករា ឆ្នាំ២០១៧ ជុំវិញសំណុំរឿងពុករលួយ ដោយប្រើប្រាស់លុយរដ្ឋដើម្បីជីវិតស៊ីវីល័យឯកជនរបស់លោក។ លោក Teodorin ល្បីខាងទិញយករថយន្តទំនើបៗ និងទិញផ្ទះធំៗតម្លៃរាប់រយលានដុល្លារនៅឯរដ្ឋធានីប៉ារីស ខណៈដែលប្រជាជនរបស់ខ្លួន កំពុងក្រីក្ររកអង្ករច្រកឆ្នាំងមិនបាន។
បើតាមទីភ្នាក់ងារព័ត៌មាន AFP លោក Teodorin Obiang ដែលមានតួនាទីជាអនុប្រធានាធិបតីដែរនោះ ត្រូវបានតុលាការបារាំងចោទប្រកាន់ពីបទយកលុយរដ្ឋ ដើម្បីទិញភូមិគ្រិះដ៍ធំមួយក្នុងរដ្ឋធានីប៉ារីស និងនាវាកំសាន្តដែលមានប្រវែង៧៦ម៉ែត្រ។ ភូមិគ្រិះស្កឹមស្កៃនេះតម្លៃរហូតដល់១១២លានដុល្លារឯណោះ។ យ៉ាងណាមិញ មេធាវីលោក Teodorin នឹងស្នើលើកពេលសវនការនេះ ដើម្បីមានពេលប្រមូលភស្តុតាងបន្ថែម។
បើតាមប្រភពព័ត៌មានដដែល រដ្ឋអាជ្ញាបារាំង បានចោទថាលោក Teodorin Obiang ដែលនិយមចូលចិត្តទិញរថយន្តទំនើបៗ បានយកលុយរដ្ឋចំនួន១១០លានអឺរ៉ុបនៅចន្លោះឆ្នាំ២០០៤ ដល់ឆ្នាំ២០១១ ដែលពេលនោះលោកនៅធ្វើជារដ្ឋមន្ត្រីកសិកម្មនៅឡើយ។ តួនាទីជារដ្ឋមន្ត្រីកសិកម្មនេះហើយ ដែលធ្វើឲ្យលោក Teodorin អាចគ្រប់គ្រងពាណិជ្ជកម្មឈើរបស់ប្រទេស តាមរយៈការយកប្រាក់ដាក់ក្នុងហោប៉ៅខ្លួនឯង។
មិនត្រឹមតែនៅបារាំងឡើយ លោក Teodorin ដែលត្រូវឪពុកតែងតាំងជាអនុប្រធានាធិបតីក្នុងឆ្នាំ២០១៦ ក៏មានរឿងរ៉ាវស្រដៀងគ្នាជាមួយតុលាការរបស់អាមេរិក និងស្វ៊ីសផងដែរ។ នៅក្នុងឆ្នាំ២០១៤ Teodorin បានប្រគល់ឲ្យអាមេរិកនូវទ្រព្យសម្បត្តិតម្លៃច្រើនជាង៣០លានដុល្លារ រួមមានភូមិគ្រិះមួយខ្នង ឡានFerrari មួយគ្រឿង និងវត្ថុជាច្រើនទៀត។
ហ្គីណេអេក្វាទ័រ ជារដ្ឋអាហ្វ្រិកតូចមួយ និងជាប្រទេសនាំចេញប្រេងធំជាងគេទី៣ របស់ទ្វីបមួយនេះ។ ប្រទសនេះត្រូវបានដឹកនាំដោយមេដឹកនាំកាន់អំណាចផ្ដាច់ការ Teodoro Obiang Nguema តាំងពីឆ្នាំ១៩៦៩ មកម្ល៉េះ គឺចាប់តាំងពីលោកធ្វើរដ្ឋប្រហារទម្លាក់ Francisco Macias Nguema ដែលឪពុកមារបស់ខ្លួន។ ក្រោមការគ្រប់គ្រងប្រទេសជាង៤៧ឆ្នាំមក ប្រជាជនភាគច្រើនកំពុងជួបប្រទះបញ្ហារស់នៅ ប៉ុន្តែក្រុមគ្រួសាររបស់លោកមានជីវភាពហ៊ឺហារស៊ីវិល័យមានភូមិគ្រិះនៅអឺរ៉ុប និងរថយន្តទំនើបៗជាច្រើនគ្រឿងទៀតផង៕
Tag:
បារាំង
ហ្គីណេអេក្វាទ័រ
Teodorin Obiang
© រក្សាសិទ្ធិដោយ thmeythmey.com