អន្តរជាតិ
ដៃគូរកស៊ីរបស់លោក ត្រាំ នៅឥណ្ឌូណេស៊ី ចង់ប្រជែងកៅអីប្រធានាធិបតីដូចលោកដែរ
× ដៃគូមុខជំនួញរបស់ប្រធានាធិបតីជាប់ឆ្នោត ដូណាល់ ត្រាំ នៅឥណ្ឌូណេស៊ី បានបង្ហាញបំណងដើរតាមគន្លងរបស់លោកក្នុងការឈរជាប្រធានាធិបតី។ លោក Hary Tanoesoedibjo ដែលកំពុងរ៉ាប់រងគម្រោងធំពីររបស់លោក ត្រាំ នៅឥណ្ឌូណេស៊ី ចង់ប្រជែងកៅអីប្រធានាធិបតីឥណ្ឌូណេស៊ីក្នុងការបោះឆ្នោតឆ្នាំ២០១៩ ព្រោះលោកក៏មានបក្សនយោបាយផ្ទាល់ខ្លួនដែរ។
អ្នកជំនួញផ្នែកសារព័ត៌មាន និងសំណង់នៅឥណ្ឌូណេស៊ី លោក Hary Tanoesoedibjo បានប្រាប់សារជីវកម្មផ្សព្វផ្សាយអូស្ត្រាលីថា លោក កំពុងពិចារណាធ្វើជាបេក្ខជនប្រធានាធិបតីក្នុងការបោះឆ្នោតឆ្នាំ២០១៩ ។ ប្រសិនបើលោកជាប់ឆ្នោតមែន ពិភពលោកនឹងមានមេដឹកនាំប្រទេសពីរ ជាដៃគូពាណិជ្ជកម្ម ហើយវាក៏បង្កើនការព្រួយបារម្ភជុំវិញជម្លោះផលប្រយោជន៍ក្នុងការរកស៊ីផងដែរ។
លោក Hary ដែលកំពុងកាន់កាប់គម្រោងពីររបស់ប្រធានាធិបតី ដូណាល់ ត្រាំ និយាយថា៖ «ប្រសិនគ្មានអ្នកណាដែលខ្ញុំអាចទុកចិត្តដោះស្រាយបញ្ហាក្នុងប្រទេសបាន ខ្ញុំអាចនឹងឈរឈ្មោះជាប្រធានាធិបតី។ យើងត្រូវការមេដឹកនាំដែលសុច្ចរិត ដែលអាចរកដំណោះស្រាយសម្រាប់ប្រទេសនេះ»។ នេះបើយោងតាមផ្សាយរបស់សារព័ត៌មាន Rappler ។
ក្នុងករណីដែលលោក Hary ឈរឈ្មោះ ហើយអាចឈ្នះឆ្នោតមែន ការព្រួយបារម្ភលើជម្លោះផលប្រយោជន៍ទាក់ទង នឹងជំនួញរបស់លោក ដូណាល់ ត្រាំ នឹងកើនឡើង។ ប៉ុន្តែលោក ត្រាំ ដែលនឹងត្រូវចូលកាន់តំណែងនៅថ្ងៃទី២០ ខែមករា ខាងមុខ ធ្លាប់អះអាងថា នឹងមិនមានកិច្ចព្រមព្រៀងថ្មីឡើយក្នុងអាណត្តិរបស់លោក ហើយកូនរបស់លោកនឹងចាត់ចែងការងារក្រុមហ៊ុនជំនួសលោក។
នៅឥណ្ឌូណេស៊ី លោក Hary Tanoesoedibjo កំពុងដំណើរការគម្រោងរបស់លោក ត្រាំ ពីរ ដោយមួយនៅរដ្ឋធានីហ្សាការតា និងមួយទៀតជារមណីយដ្ឋាននៅកោះបាលី ហើយគម្រោងនេះ ស្ថិតនៅដំណាក់កាលដំបូងនៅឡើយ។ គម្រោងនៅក្បែររដ្ឋធានីហ្សាការតា មានទំហំដល់ទៅ៧០០ហិចតា ដែលរួមបញ្ចូលសណ្ឋាគារទំនើប ទីលានវាយហ្គោល និងវីឡាជាច្រើនខ្នងផងដែរ។
តាមពិតទៅ នេះក៏មិនមែនជាលើកទីមួយឡើយ ដែលអ្នកជំនួញជនជាតិឥណ្ឌូណេស៊ីរូបនេះចូលខ្លួនប្រឡូកក្នុងនយោបាយនោះ។ លោក Hary មានមហិច្ឆតានយោបាយជាយូរមកហើយ។ ក្នុងការបោះឆ្នោតឆ្នាំ២០១៤ លោកបានបរាជ័យក្នុងការឈរឈ្មោះជាបេក្ខជនអនុប្រធានាធិបតីឥណ្ឌូណេស៊ី ដោយពេលនោះ លោក Yusuf Kalla ក្លាយជាអនុប្រធានាធិបតី ខណៈលោក ចូកូ វីដូដូ ក្លាយជាប្រធានាធិបតី៕
Tag:
ឥណ្ឌូណេស៊ី
ដូណាល់ ត្រាំ
Hary Tanoesoedibjo
© រក្សាសិទ្ធិដោយ thmeythmey.com