អន្តរជាតិ
រឿងចាស់មិនទាន់ឲ្យចិនស្ងប់ចិត្តផង លោក ត្រាំ ព្រលះចិនជាថ្មី ដោយភ្ជាប់ជាមួយនឹងកូរ៉េខាងជើង
× ខណៈរឿងចាស់ពាក់ព័ន្ធនឹង«គោលនយោបាយចិនតែមួយ»មិនទាន់ឲ្យចិន បានស្ងប់ចិត្តស្រួលបួលផងនោះ ប្រធានាធិបតីជាប់ឆ្នោតអាមេរិក លោក ដូណាល់ ត្រាំ បានព្រលះចិនជាថ្មី ដោយ បានទាញចិន ទៅនឹងរឿងនៅកូរ៉េខាងជើង ដែលសហគមន៍អន្តរជាតិ បាននិងកំពុងតែព្រួយបារម្ភខ្លាំងពីការគំរាមកំហែងអាវុធនុយក្លេអ៊ែនៅឧបទ្វីបកូរ៉េនោះ។
ក្នុងកិច្ចសម្ភាសន៍ជាមួយនឹងសារព័ត៌មាន Fox News នៅចុងឆ្នាំ២០១៦កន្លងទៅ លោកដូណាល់ ត្រាំ បាននិយាយយ៉ាងដូច្នេះថា៖«ខ្ញុំ បានយល់យ៉ាងច្បាស់ពីគោលនយោបាយចិនតែមួយ តែខ្ញុំ ឆ្ងល់ថា ហេតុអ្វីយើងត្រូវចងភ្ជាប់ខ្លួនដោយគោលនយោបាយនោះ លើកលែងតែយើងមានកិច្ចព្រមព្រៀងក្នុងការធ្វើកិច្ចការអ្វីផ្សេងៗទៀត ដែលរាប់បញ្ចូលទាំងពាណិជ្ជកិច្ចផងដែរនោះ»។
អត្ថាធិប្បាយរបស់លោកប្រធានាធិបតីជាប់ឆ្នោតក្រុងវ៉ាស៊ីនតោនរូបនេះ បានធ្វើឲ្យរដ្ឋាភិបាលក្រុងប៉េកាំង ក្តៅក្រហាយមិនតិចឡើយ។ ក្នុងនោះ ក្រុងប៉េកាំង បានព្រមានពីការប្រះឆា នៃទំនាក់ទំនងរវាងមហាអំណាចពិភពលោកទាំងពីរ ដោយសារការមិនគោរពគោលនយោបាយចិនតែមួយ ដែលជាគោលនយោបាយការបរទេសមូលដ្ឋានរបស់ចិននោះ។ ជាងនេះទៅទៀតនោះ រដ្ឋមន្ត្រីការបរទេសចិន វ៉ាង យី ក៏ធ្លាប់បានផ្ញើសារព្រមានប្រធានាធិបតីអាមេរិកយ៉ាងដូច្នេះថា៖ «ប្រសិនបើលោក ត្រាំ មានចេតនាបំផ្លាញនយោបាយចិនតែមួយ ឬក៏ព្យាយាមបំផ្លាញផលប្រយោជន៍របស់ចិន វាមានន័យថាលោក ត្រាំ កំពុងទម្លាក់ដុំថ្មលើជើងរបស់ខ្លួនឯងអ៊ីចឹងដែរ»។
រឿងនៅឆ្នាំចាស់បានផុតទៅបន្តិចហើយនោះ ប្រធានាធិបតីត្រៀមចូលកាន់តំណែងអាមេរិក លោក ដូណាល់ ត្រាំ នៅដើមឆ្នាំ២០១៧នេះ បានវាយប្រហារចិនក្នុងបរិបទថ្មីមួយទៀតដោយភ្ជាប់ចិនជាមួយនឹងកូរ៉េខាងជើងវិញម្តង។ តាមរយៈសេចក្តីថ្លែងការណ៍ក្នុងគណនី Twitter លោក ដូណាល់ ត្រាំ បានសរសេរនៅថ្ងៃទី០២ មករា យ៉ាងដូច្នេះថា៖«ចិន បានគេងចំណេញទឹកប្រាក់ជាច្រើនសន្ធឹកសន្ធាប់ពីអាមេរិកតាមរយៈពាណិជ្ជកម្ម ប៉ុន្តែ នៅតែមិនអាចជួយកូរ៉េខាងជើងបាន»។ លោក លើកឡើងបែបនេះ បន្ទាប់ពីលោក បានប្រតិកម្មទៅនឹងផែនការរបស់លោកប្រធានាធីបតីគីម ជុងអ៊ុន ដែលបានលើកឡើងថា កូរ៉េខាងជើង ត្រៀមបាញ់សាកល្បងមីស៊ីលអន្តរទ្វីបដែលអាចដាលដល់អាមេរិកនោះ។
ជុំវិញបញ្ហានេះ រដ្ឋាភិបាលក្រុងប៉េកាំង បានអះអាងថា ចិន បានព្យាយាមយ៉ាងលំបាកក្នុងការធានាមិនឲ្យមានអាវុធនុយក្លេអ៊ែរនៅក្នុងឧបទ្វីបកូរ៉េនោះ។ នាសន្និសីទសារព័ត៌មានប្រចាំថ្ងៃនៅថ្ងៃទី០៣ មករានេះ អ្នកពាក្យក្រសួងការបរទេចិន លោក Geng Shuang បានបញ្ជាក់យ៉ាងខ្លីដូច្នេះថា៖«ការប្រឹងប្រែងរបស់ចិនក្នុងការធានាពីការមិនរីកសាយភាយនុយក្លេអ៊ែរនៅឧបទ្វីបកូរ៉េ ត្រូវបានដឹងលឺដោយអ្នកគ្រប់គ្នារួចទៅហើយ»៕
Tag:
កូរ៉េខាងជើង
អាមេរិក
ចិន
© រក្សាសិទ្ធិដោយ thmeythmey.com