សមាជិកសភាថៃ ថា ការបោះឆ្នោតជ្រើសរើសនាយករដ្ឋមន្ត្រីថ្មី មិនអាចធ្វើនៅឆ្នាំ២០១៧នេះបានឡើយ

អន្តរជាតិ

សមាជិកសភាថៃ ថា ការបោះឆ្នោតជ្រើសរើសនាយករដ្ឋមន្ត្រីថ្មី មិនអាចធ្វើនៅឆ្នាំ២០១៧នេះបានឡើយ

03, Jan 2017 , 9:59 pm

រូបភាព

លោកនាយករដ្ឋមន្ត្រីថៃ ប្រាយុទ្ធ ចន្ទ អូចា

ដោយ:

បើមិនមានការប្រែប្រួលនោះទេ រដ្ឋាភិបាលរបបសឹកថៃ នឹងរៀបចំឲ្យមានការបោះឆ្នោតសកលដើម្បីជ្រើសរើសមេដឹកនាំថ្មីតាមបែបលទ្ធិប្រជាធិបតេយ្យតាមផែនការមេរបស់ខ្លួននៅឆ្នាំ២០១៧នេះហើយ។ ក៏ប៉ុន្តែទន្ទឹមនឹងការមកដល់នេះ សមាជិកសភាថៃមួយរូប អះអាងថា ការបោះឆ្នោត មិនអាចទៅរួចនោះទេ ដ្បិត មានច្បាប់ពាក់ព័ន្ធជាច្រើន មិនទាន់បានបញ្ចប់ ខណៈ រដ្ឋាភិបាលរបបសឹក នៅតែហ៊ាននិយាយថា បោះឆ្នោតនៅតែកើតមាន។ តែបើមិនអាចទៅរួចមែននោះ វា នឹងក្លាយជាឆ្នាំបីនៃការកាន់អំណាចរបស់របបសឹកហើយ។

សមាជិករដ្ឋសភាថៃលោក Somjet Boonthanom នៅថ្ងៃទី០២ មករា បានអះអាងថា ការបោះឆ្នោតសកលឆ្នាំនេះ នឹងត្រូវពន្យារពេលដល់ឆ្នាំក្រោយដ្បិតថៃ ត្រូវការពេលវេលាបន្ថែមដើម្បីអនុម័តច្បាប់ ខណៈប្រទេសត្រូវផ្លាស់ប្តូរពីរបបដឹកនាំដោយយោធាមកកាន់ស៊ីវិលវិញ។ តំណាងរាស្ត្ររូបនោះ បានថ្លែងប្រាប់អ្នកសារព័ត៌មានថា ការបោះឆ្នោត អាចនឹងប្រព្រឹត្តនៅខែមិនា ឬមេសាឆ្នាំ២០១៨វិញ។
លោក Somjet Boonthanom បានសង្កត់ធ្ងន់ថា៖«នេះ មិនមានដោយសារការចង់លើកពេលនោះទេ ក៏ប៉ុន្តែ ក៏ព្រោះតែ មានរឿងចម្រូងចម្រាសជាច្រើនដែលពាក់ព័ន្ធនឹងច្បាប់ស្តីពីការបោះឆ្នោត ហើយ ការបោះឆ្នោត នឹងមិនអាចកើតឡើងឆ្នាំនេះនោះទេ»។ នេះបើយោងតាមការចុះផ្សាយរបស់សារព័ត៌មាន Aljazeera។

ដោយមិនទុកឲ្យការលើកឡើងនេះ ធ្វើឲ្យសាបរលាបការសន្យារបស់ខ្លួននោះ រដ្ឋាភិបាលរបបសឹក បានបញ្ជាក់ជាថ្មីថា មិនមានការប្រែប្រួលអ្វីទៀតឡើយ ពោលគឺការបោះឆ្នោត នៅតែធ្វើឡើងនៅឆ្នាំ២០១៧តាមផែនការមេខ្លួន។ អ្នកនាំពាក្យរដ្ឋាភិបាលថៃលោក Sansern Kaewkamnerd បានបញ្ជាក់ថា៖« យើង នៅតែធ្វើតាមមាគ៌ានៃផែនការរបស់យើង។ ហើយការលើកឡើងរបស់សមាជិករដ្ឋសភាពីការពន្យារពេលនោះ គឺគ្រាន់តែជាការយល់ឃើញរបស់គេប៉ុណ្ណោះ»។ នេះបើយោងតាមប្រភពព័ត៌មានដដែលនោះ។

សូមជម្រាបផងដែរថា រដ្ឋាភិបាលរបបសឹកថៃ ដែលមានលោកឧត្តមសេនីយ៍ ប្រាយុទ្ធ ចន្ទ អូចា ជាប្រមុខ បានដឹកនាំរាជាណាចក្រថៃ ក្រោយពីលោកឧត្តមសេនីយ៍ បានដឹកនាំរដ្ឋប្រហារទម្លាក់អតីតនាយករដ្ឋមន្ត្រីថៃ លោកស្រី យីងឡាក់ ស៊ីនណាវ៉ាត់ត្រា នៅថ្ងៃទី២២ ខែឧសភា ឆ្នាំ២០១៤។ ការដឹកនាំរបស់របបសឹក ធ្វើឡើងក្រោមហេតុផលថា អតីតរដ្ឋបាលរបស់លោកស្រី យីងឡាក់ ធ្វើឲ្យមានការបែងចែកនិន្នការនយោបាយរវាងប្រជាជនថៃ។

ក្រោយអតីតព្រះមហាក្សត្រថៃ បានតែងតាំងជានាយករដ្ឋមន្ត្រីអន្តរកាលដើម្បីធានាពីស្ថិរភាពប្រទេសឡើងវិញ លោកនាយករដ្ឋមន្ត្រី ប្រាយុទ្ធ បានសន្យានឹងនាំមកវិញនូវលទ្ធិប្រជាធិបតេយ្យតាមមាគារបស់ខ្លួន តាមរយៈការធ្វើរដ្ឋធម្មនុញ្ញថ្មី និងចុងក្រោយ រៀបចំឲ្យមានការបោះឆ្នោត។ តាមពិតទៅ រឿងបញ្ហាបោះឆ្នោតថៃ មិនមែនទើបតែកើតឡើងនោះទេ ពោលគឺ ផែនការនៃការបោះឆ្នោត ត្រូវបានលើកពេលជាច្រើនលើកច្រើនសារមកហើយ ដោយក្នុងនោះ ក៏មានហេតុផលពាក់ព័ន្ធនឹងការបរាជ័យក្នុងការធ្វើរដ្ឋធម្មនុញ្ញ។

យ៉ាងណាក៏ដោយនៅ នៅឆ្នាំមុន រដ្ឋាភិបាលរបបសឹកថៃ បានរៀបចំឲ្យមានការធ្វើប្រជាមតិលើសេចក្តីព្រាងរដ្ឋធម្មនុញ្ញថ្មី ដែលធ្វើឡើងក្នុងរដ្ឋបាលរបស់ខ្លួន ដោយជោគជ័យ ពោលគឺប្រជាជន បានសម្រេចយកសេចក្តីព្រាងរដ្ឋធម្មនុញ្ញ ដែលមតិមួយចំនួនមើលឃើញជារដ្ឋធម្មនុញ្ញដែលបម្រើផលប្រយោជន៍យោធានោះ។ នេះ ក៏មានន័យដែរថា ការបោះឆ្នោត ក៏នឹងប្រព្រឹត្តទៅនៅក្នុងឆ្នាំ២០១៧ផងដែរ។

អ្វីគួរកត់សម្គាល់នោះ បើទោះបីជាលោកនាយករដ្ឋមន្ត្រី ប្រាយុទ្ធ ចន្ទ អូចា តែងតែអះអាងម្តងហើយម្តងទៀត ថាការបោះឆ្នោតឆ្នោត ត្រូវតែធ្វើនៅឆ្នាំ២០១៧ ដោយកំហិតក៏ដោយ លោក តែងតែបន្សល់ទុកពាក្យសម្តីចុងក្រោយថា បើស្រុកទេស នៅតែមិនទាន់មានស្ថិរភាពនយោបាយ និងសន្តិភាពពេញលេញនៅឡើយនោះ លោក ក៏មិនចុះចេញពីតំណែងផងដែរ។ នេះ ក៏អាចនិយាយបានដែរថា ការលើកពេលបោះឆ្នោតអាច ធ្វើគ្រប់ពេល ប្រសិន រដ្ឋាភិបាលរបបសឹក យល់ឃើញថា ស្ថានភាពក្នុងប្រទេសថៃ មិនទាន់ល្អនោះ។

ងាកមកចាប់អារម្មណ៍អតីតនាយករដ្ឋមន្ត្រីថៃស្រីដំបូង លោកស្រី យីងឡាក់ បន្តិច ក្រោយពី ត្រូវបានទម្លាក់ចេញពីតំណែងហើយនោះ លោកស្រី ទំនងជាគ្មានឱកាសដើម្បីវិលត្រលប់មករកនយោបាយវិញបានទៀតឡើយ។ នោះ ក៏ព្រោះតែ ក្រៅពីសភា បានសម្រេចផ្អាកកិច្ចការនយោបាយរយៈពេលប្រាំឆ្នាំរបស់លោកស្រីហើយនោះ លោកស្រី ក៏កំពុងតែប្រឈមនឹងសំណុំរឿងព្រហ្មទណ្ឌ និងរដ្ឋប្បវេណី ដែលអាចឲ្យលោកស្រី មានទោសទណ្ឌ និងថៃមទាំងសងសំណងរាប់លានដុល្លារទៀតផង៕