អន្តរជាតិ
ចិន ធ្វើសមយុទ្ធនាវាដឹកយន្តហោះចម្បាំងនៅសមុទ្រចិនខាងត្បូង ក្នុងស្ថានភាពតានតឹង
× រដ្ឋាភិបាលក្រុងប៉េកាំង នៅថ្ងៃទី០២ មករា បានធ្វើសមយុទ្ធនាវាដឹកយន្តហោះចម្បាំងរបស់ខ្លួន Liaoning លើវិញ្ញាសារពីរគឺ ចុះចត និងហោះហើរនៅក្នុងសមុទ្រចិនខាងត្បូង។ សមយុទ្ធនេះ ធ្វើឡើងស្របពេលមានរឿងប្រទាំងប្រទើសខ្លាំងរវាងចិន និងអ្នកជិតខាងខ្លួន ដ្បិតមុនពេលនៃការធ្វើសមយុទ្ធនេះ នាវាដឹកយន្តហោះនេះ បានឆ្លងកាត់តំបន់មានរឿងចម្រូងចម្រាសមិនទាន់ដោះស្រាយដាច់ស្រេចនោះ។
សមយុទ្ធនាវាដឹកយន្តហោះចម្បាំង Liaoning ដែលធ្វើឡើងក្នុងសមុទ្រចិនខាងត្បូង មានការចូលរួមដោយយន្តហោះចម្បាំងប្រភេទ J-15 និងឧទ្ធម្ភាចក្រជាច្រើនគ្រឿងផ្សេងទៀត។ នេះបើយោងតាមការបញ្ជាក់របស់ប្រភពការពារជាតិចិននៅថ្ងៃទី០៣ មករា ដែលចុះផ្សាយដោយសារព័ត៌មានរដ្ឋចិន Xinhua ។
សូមជម្រាបផងដែរថា បញ្ហាសមុទ្រចិនខាងត្បូង គឺជាជម្លោះអធិបតេយ្យដែលមានរដ្ឋពាក់ព័ន្ធដូចជាព្រុយណេ ម៉ាឡេស៊ី ហ្វីលីពីន វៀតណាម នឹងចិន។ កន្លងមក មិនសូវមានប្រទេសពាក់ព័ន្ធអាស៊ានទាំងបួន ប្រើប្រាស់ដែនសមុទ្រជម្លោះនោះដើម្បីធ្វើសកម្មភាពយោធាប៉ុន្មាននោះទេ ពោលគឺ មានតែចិននោះទេ តែងតែធ្វើសមយុទ្ធយោធា ដែលត្រូវបានគេមើលឃើញថាជាសកម្មភាពសម្ងែងសាច់ដុំយោធារបស់ខ្លួននៅក្នុងតំបន់ជម្លោះ ខណៈពេលជម្លោះនោះ មិនទាន់មានដំណោះស្រាយច្បាស់លាស់នៅឡើយនោះ។
អ្វីគួរកត់សម្គាល់នោះ សមយុទ្ធនាវាដឹកយន្តហោះរបស់ចិននេះ ធ្វើឡើងក្នុងស្ថានភាពកំពុងតែមានភាពតានតឹងស្រាប់នោះ។ តានតឹងនោះ គឺមុនពេលនៃការធ្វើសមយុទ្ធនោះ មានការតវ៉ាខ្លាំងពីតៃវ៉ាន់ ដោយបានសម្តែងការព្រួយបារម្ភចំពោះវត្តមានរបស់នាវាដឹកយន្តហោះរបស់ចិនទៅកាន់តំបន់មានវិវាទ។
ជាក់ស្តែងនោះ ក្រោយពីវត្តមាននៃនាវាដឹកនាំយន្តហោះ បានទៅក្បែរនៃកោះតៃវ៉ាន់ រដ្ឋមន្ត្រីការពារជាតិតៃវ៉ាន់ Feng Shih-kuan ក៏បានប្រកាសទៅកាន់យោធារបស់ខ្លួនយ៉ាងដូច្នេះថា៖ «ការគំរាមកំហែងពីគូសត្រូវរបស់យើង កំពុងតែកើនឡើងពីមួយថ្ងៃទៅមួយថ្ងៃ។ យើង គួរតែរក្សាការត្រៀមខ្លួនការប្រយុទ្ធគ្រប់ពេលវេលា។ យើង ត្រូវតែពង្រឹងការបណ្តុះបណ្តាលយោធារបស់យើង ដូច្នេះ ពួកគេ(ទាហាន) មិនត្រឹមតែអាចរួចផុតពីការស្លាប់នោះទេ ក៏ប៉ុន្តែ ក៏អាច កម្ទេចសត្រូវ និងអាចបំពេញបេសកម្មផងដែរ»៕
Tag:
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com